Fakaakoaga he Daniel’s Prophecy
1 Ke kamata he tapu a Aperila 17, to ako e tautolu e tohi Pay Attention to Daniel’s Prophecy! he Fakaakoaga Tohi he Fakapotopotoaga. Tokologa kua fita he totou e tohi fulufuluola nei, ka e kaufakalataha he magaaho nei ke moua e aoga he fakatutalaaga ke he tohi. Kua uiina atu ke he tau tagata fakamatala, kia lautolu kua fiafia, pihia ke he tau fanau, e, kua fakamafana atu, ke tolo mai he tau faahi tapu takitaha ke he fakaakoaga uho nei he tohi a Tanielu he Tohi Tapu.—Teu. 31:12, 13.
2 Fakaakoga he Setulu mo e tau Poakiaga: Ha he fufuta nei he Ha Tautolu a Fekafekauaga he Kautu e setulu katoa he fakaakoaga he tohi Daniel’s Prophecy. Mailoga ke toka taha lagaki i loto he tohi fakaako hau. Ne fakakite mai he setulu e tau veveheaga mo e paratafa he tohi pihia mo e tau faahi kupu ha ia Tanielu ka fakatutala he tau fahitapu takitaha. Kua fakamaama he matahuitala e puhala mo e magaaho ka fakaaoga falu a mena mai he tohi. He fakaotiaga he fakaako he tau fahitapu takitaha, kua fakamafana ke he takitaki ke liu fakatonutonu ke he matakau e tau kupu ha ia Tanielu ne fifili he setulu ma e fahitapu ia. Ka fai magaaho, kia totou e tau faahi kupu mo e tutala ki ai. Falu a faahi kupu ne fakalaulahi mai he taha fahitapu ke he taha fahitapu he matutaki tumau ke he ha lautolu a fakagahuahuaaga.
3 Tauteute ke Fakaako Fakamatafeiga: Kua fakatoka pauaki e magaaho he tau fahitapu takitaha ke fakatutala fakatekiteki e vala tohi ne kua fafati. Fa e vala he fakaakoaga ne kua ku. Naia, he fakaotiaga he fahitapu ia Iuni 5, lata lahi he takitaki tohi ke matutaki ki a Tanielu 2:1-40. He fahitapu ia Iuni 26, lata lahi ke matutaki atu ki a Tanielu 3:1-30. He fahitapu ia Sepetema 4, kua lata ke putoia e fakatutalaaga fakamatafeiga ke he tau fakatai mo e tau kupu Tohi he lau 139. Ko e fakafonua he lau 188 mo e 189 kua lata he fakatutala he fakaakoaga ke he fahitapu ia Oketopa 2.
4 Amaamanaki fakamitaki ke he tau fakaakoaga he tau fahitapu takitaha, mo e fakamalolo ke tali hake. Fakaaue he malolo hau ke fakalataha mo e fakatokatokaaga ne kitia ha Iehova ti aoga mai he iloilo mo e lotomatala ne foaki he tau tagata fakauku fakamoli hana. (Tani. 12:3, 4) Kia fakamalolo ke fakamafana atu e falu ke o tumau ke he tau fakaakoaga tohi. Kia fakateliga fakalahi ai a tautolu ke he kupu fakaperofeta he Atua ne kua fakakite he tohi ofoofogia a Tanielu.—Hepe. 10:23-25; 2 Pete. 1:19.