Setulu he Magafaoa—Ko e Fakaakoaga Fakamagafaoa
1 Ko e mena fakaalofa ne mua kua maeke ia koe e matua Kerisiano ke foaki ke he fanau hau ko e fakaalofa hau ma Iehova. Kua aoga ai ke fakatokatoka ke taute e mena nei “ka nofo a koe he hau a fale” ma e fakaakoaga fakamagafaoa he Tohi Tapu he tau fahi tapu takitaha. (Teu. 6:5-7) Pete ko e Fakamoli e hoa hau, nofo he kaina ne kehekehe e tau lotu, po ke matua tokotaha, maeke ia koe ke lagomatai e fanau hau ke fakatata atu ki a koe mo e ki a Iehova he taute tumau e fakaakoaga fakamagafaoa.
2 Amanaki ke Kamata: Ko e lakaaga fakamua ke fakatoka e puhala ke fakaako auloa e magafaoa. Ka nakai iloa mitaki e koe e magaaho ke kamata e fakaakoaga, he ha he tutala ke he magafaoa katoa? (Fakatai 15:22) Ka fai tama ikiiki a koe, liga manako a koe ke taute falu a fakaakoaga kuku he fahi tapu. Lali ke kitia e mena ne mitaki ma e magafaoa hau. Fakatoka e magaaho tonu ma e fakaakoaga he setulu he magafaoa hau, mo e lali ke muitua ki ai.
3 Ko e heigoa ka liga fakaako e koe? Ne tauteute he falu e tau vala tala ka fakaako he Fakaakoaga Tohi he Fakapotopotoaga po ke Fakaakoaga he Kolo Toko he tapu ia. Ka e fiafia falu ke fakaako e falu vala tala ne talaga pauaki ma e tau fuata. Ne pehe e matua tane he tama tane mo e tama fifine tote: “Taha e mena ne mahuiga lahi he fakaakoaga ha mautolu he fahi tapu ma e fanau ko e taute tala a mautolu hagaao ke he My Book of Bible Stories. Ko e lauiaaga mo e maamaaga hokulo ne fua mai kua mahomo atu e aoga ke he tau paratafa loga ne totou e mautolu.”
4 Fakaako he Tau Fahi Tapu Takitaha: Ko e fakaakoaga fakamagafaoa kua lata ke taute tumau mo e lata ke fiafia e tau tagata oti he magafaoa he fakalataha ki ai. Kua lata ke hikihiki he falu aho mo e falu matahola ke felauaki mo e tau tutuaga fakalutukia. Kua ha ha ai foki falu magaaho ka lata ke taute e tau hikihikiaga ke he tau matakupu. Ka kua nakai lata e tau hikihikiaga ke toka loa ke fakatauhele e fakatokaaga mau he fakaakoaga fakamagafaoa. He taha magafaoa, ne talahau he tama fifine: “Kaeke ke hiki e tula he fakaakoaga ha mautolu, ne pili e Tete e tula fou he gutuhala he filisa ke kitia ai e mautolu oti.” Kua nava lahi ke he tau laliaga pihia ke taute tumau e fakaakoaga fakamagafaoa! He fakaholo atu a koe ke feaki e fanau hau ke he “tau kupu akonaki mo e tau kupu fakamafana [a Iehova],” kua fakatata e koe e fakaalofa hau ki a lautolu mo e Matua ha tautolu he lagi.—Efeso 6:4.