Puhala ke Kaufakalataha Katoatoa e Tau Tagata he Magafaoa—Ke he Fakaakoaga he Tohi Tapu
1 Kua lafi he kupu moli e kakano mo e amaamanakiaga moli ke he moui magafaoa, ka ko e kautuaga he fekafekau ki a Iehova kua nakai hau noa. Kua lata ke fai magaaho mo e laliaga ke ati hake fakaagaga e magafaoa malolo. Kua lata lahi ma e tau tagata he magafaoa ke gahua fakatata auloa ke he mena nei. Ko e vala tala fakamua nei he tau tala ne tolu e vala to kitekite ai ke he puhala kua maeke he tau magafaoa ke kau fakalataha he ati hake e tau puhala fakaako mitaki.
2 He Totou e Tohi Tapu he Tau Aho Oti: Kua fakakite mai he Tau Fakatai 24:5 ko e “tagata lotomatala kua tolomaki atu hana malolo.” Ko e lotomatala ne moua mai he totou tumau e Kupu he Atua kua foaki ke he tagata e malolo he loto ne kua lata ke totoko e tau ekefakakelea a Satani ke he hana fakaagaga. (Sala. 1:1, 2) Totou nakai e koe e Tohi Tapu he tau aho oti ko e magafaoa? Kua fakatoka mai he Setulu he Aoga Fekafekau Fakateokarasi e “Setulu he Totouaga he Tohi Tapu Lafi ki Luga” ma e tau fahitapu takitaha he tau. Ke muitua ki ai kua lata ke hogofulumaka ni e minuti he magaaho he magafaoa he tau aho takitaha. Fifili e magaaho kua hagahaga mitaki, tuga he magaaho kai pogipogi, he oti e kai afiafi, po ke to o ke momohe, ke totou e Tohi Tapu mo e onoono ke he kupu ma e aho mai he Examining the Scriptures. Kia taute e mena nei ko e vala he fakaholoaga fakamagafaoa hau he tau aho takitaha.
3 He Fakaako Auloa he Tau Fahitapu Takitaha: Ko e fakaakoaga Tohi Tapu he magafaoa kua lata mo fakakatoatoaaga he fahitapu he magafaoa. Kua lata e tau tagata takitaha ke lagomatai he tali fakamakai ai he fakaakoaga. Ko e ulu he magafaoa ke onoono ke he tau mena kua lata ma e magafaoa he fifili e tohi ke fakaako, mo e aho, magaaho, mo e loa he fakaakoaga. Kia tuku fakamua e fakaakoaga magafaoa ke he setulu he fahitapu. Aua neke fakaata e tau mena nakai aoga lahi ke fakalavelave aki.—Filipi 1:10, 11.
4 Ko e matua tane fa moua e tau hea telefoni ke he tau mena gahua kia vevete kehe e telefoni he fakaakoaga he magafaoa. Ka o mai e tau tagata gahua ke he fale, kia uiina atu ke fakalataha ke he fakaakoaga po ke fakatali ato oti ai. Kia fifili he matua tane ke nakai fai mena ke fakatauhele aki e fakaakoaga fakamagafaoa. Ko e fakakiteaga mitaki lahi anei ke he fanau hana, mo e ke he gahua hana, kua monuina ai.
5 Ko e mitaki ha ia ka kaufakalataha e tau tagata he magafaoa ke he tau gahua fakaagaga! Ko e mahani fakamoli he tau laliaga ha tautolu ke fakalataha katoatoa ke he fakaakoaga he Tohi Tapu fakamagafaoa to ta mai e fakamonuinaaga a Iehova.—Sala. 1:3.