Tau Ulu Magafaoa—Kia Fakatumau e Fakaholoaga Fakaagaga Mitaki
1 Pete he moui ke he tau hogofulu tau ke he vahaloto he tapuaki tupua mo e mahani kelea a Papelonia, kua talahaua a Tanielu he “fekafekau mau” ki a Iehova. (Tani. 6:16, 20) Fakatumau fefe a ia ke he hana moui fakaagaga? Fakakite mai he fakamauaga he Tohi Tapu ne ha ha ia ia e fakaholoaga maopoopo ke fakaholo aki e tau gahua he tapuakiaga moli. Ma e fakatai, ko e aga mau hana ke liogi laga tolu he aho mai he hana poko. (Tani. 6:10) Nakai taumaleku ai, ne fai fakaholoaga tumau a ia ma e falu gahua fakaagaga foki, tuga e totou he Fakatufono. Ti, magaaho ne fehagai mo e tau kamatamata ke lauia e moui, ne nakai maluelue a Tanielu ke he hana mauokafua ki a Iehova, ti kua fakahao fakamana a ia.—Tani. 6:4-22.
2 Pihia foki he vaha nai, kua latatonu a tautolu ke fakamalolo ke ‘fakamakamaka ke mataala mau.’ (Efeso 6:18) Ko e lalolagi ne nonofo ai a tautolu kua “ha he pule hana kua mahani kelea.” (1 Ioane 5:19) Ko e tau totoko po ke tau kamatamata to mafuta hake fakaofo mo e kamatamata e tua ha tautolu. Ke he magahala he aho matematekelea lahi, ko e tau fekafekau he Atua to eke mo matapatu he totokoaga ha Koku mo Makoku, kua liga ke nakai fai fakahaoaga. Kua lata e mena nai ma e falanaki katoatoa ki a Iehova.—Eseki. 38:14-16.
3 “Taha foki e matapatu kakano aoga lahi ke lauia mitaki e totou Tohi Tapu, fakaako, mo e tau fakatutala fakamagafaoa he taute e tau mena ia mo vala he moui.” Ne pihia e hafagiaga ke he taute tala he fonoaga he fahimotu 1998 ne fakamataulu “Tau Magafaoa—Kia Taute e Totou Tohi Tapu he Tau Aho Oti mo Vala he Moui ha Mutolu!” Ne matutaki ai: “Magaaho ka muitua tumau e tau magafaoa ke he fakaholoaga pihia mo e ke he puhala kua fakaalaala aki e Tohi Tapu, to lahi e hufiaaga he fakaholoaga fakaako Tohi Tapu ke he magafaoa. Kua ati hake e iloilo ha tautolu. Kua fakamalolo e tua ha tautolu. Ti foaki mai ma tautolu e tau fakafifitakiaga—ko e tau tane mo e tau fifine tua fakamoli he vaha fakamua—ne maeke ke fakaohooho mo e fakamalolo aki a tautolu ke lalago e kupu moli.” He fakatutala a tautolu ke he tau vala kehekehe he fakaholoaga fakaagaga mitaki, kua lata e tau ulu he tau magafaoa ke kumi taha po ke ua e puhala ke fakatupu ki mua e ha lautolu a fakaholoaga fakaagaga fakamagafaoa.
4 Manamanatu ke he Kupu he Atua he Tau Aho Oti: “Ka pule ataina e Kautu he Atua mo e taute hana finagalo ke he lalolagi tuga ke he lagi, to nakai fai tagata—nakai fai manu vale foki—ka ‘mahani kelea po ke moumou mena ai.’ (Isaia 11:9; Mata. 6:9, 10)” Ko e tau kupu ia ne tohia ai he Examining the Scriptures Daily—2001 ko e talahauaga he kupu tohi ma Sepetema 11. Kua mafanatia ha e fakamanatuaga ia! Ke he tau ulu magafaoa, ko e aga nakai hau ke totou e kupu Tohi Tapu he lauga he aho mo e magafaoa hau? Kua aoga lahi e tauteaga nai. Kaeke nakai hagahaga mitaki ke taute auloa ke he magaaho pogipogi, liga maeke ke taute he taha magaaho he aho. Pehe e taha matua tane: “Ko e kai afiafi ko e magaaho hagahaga mitaki a ia ma mautolu ke fakatutala ke he kupu Tohi Tapu he lauga he aho.”
5 Kaeke kua fita a koe he fai fakaholoaga mitaki ke fakatutala e lauga he aho ke he tau aho takitaha ko e magafaoa, kua nava ki a koe. Liga maeke foki a koe ke fakalahi atu ke he mena ia he totou taha vala he Tohi Tapu he magaaho taha na. Ko e falu kua fakamahani ke totou e veveheaga katoa ia ne moua mai ai e kupu tohi ma e lauga he aho. Ko e falu ne totou fakapapahi, muitua ni ke he tohi kua fifili mai he Tohi Tapu. Ko e totou tumau he Tohi Tapu he tau aho oti ka lagomatai e magafaoa hau ke feaki e matakutaku mea ke nakai fakaita a Iehova mo e fakahokulo e manako ke taute hana finagalo.—Teu. 17:18-20.
6 To mua atu e aoga he fakaholoaga totou Tohi Tapu mo e taute e lauga he aho he magafaoa hau kaeke fakamole e koe falu minuti ke fakatutala ke he puhala ka fakagahua aki e kupu tohi ia. Ko e tohi Ministry School, lau 60, ne foaki e puhala nai: “Liga . . . fifili mai e falu kupu tohi he setulu ma e totouaga he Tohi Tapu fakafahi tapu, fakatutala ke he tau kakano, ti huhu e tau vahega huhu pehenai: ‘Maeke fefe e mena nai ke foaki mai e takitakiaga ma tautolu? Maeke fefe a tautolu ke fakaaoga e tau kupu tohi ia ke he fekafekauaga? Ko e heigoa ne fakakite hagaao ki a Iehova mo e hana tauteaga mena, mo e ati hake fefe he mena ia e fakaaue ha tautolu ki a ia?’” Ko e tau fakatutalaaga fakaagaga pihia ka lagomatai a lautolu oti he kaina hau “ke iloa e mutolu e finagalo he Iki.”—Efeso 5:17.
7 Fakaakoaga Fakamagafaoa: Ko e taute tumau he tau fahi tapu oti e fakaakoaga fakamagafaoa ko e puhala mitaki ma e tau ulu magafaoa ke fakakite ke he fanau ke tuku fakamua e tau mena fakaagaga. Taha e fuata tane ne liu manatu: “Falu magaaho kua lolelole lahi a Tete he hau he gahua ti tauveli mohe, ka e taute agaia ni e fakaakoaga, ti lagomatai he mena nai a mautolu ke talia e kakano uho he fakaholoaga ia.” Maeke foki he fanau ke lagomatai ke kautu e fakaholoaga nai. Taha e magafaoa ne hiva e tama ne aala tuai tumau he matahola lima ke taute e fakaakoaga fakamagafaoa ha kua nakai fai magaaho mitaki foki.
8 Ke lauia mitaki e fakaakoaga fakamagafaoa, kua latatonu e ulu magafaoa ke ‘onoono a ia ki a ia ni katoa mo e hana a fakaako atu.’ (1 Timo. 4:16) Ko e tohi Ministry School, lau 32, ne pehe: “Kua maeke ke talahau ko e fakaakoaga fakamagafaoa lauia mitaki kua kamata mai ka onoono fakamitaki a koe ke he tau manako he magafaoa ni hau. Kua tupu tolomaki ki mua fakaagaga fefe e tau tagata takitokotaha he magafaoa? . . . Magaaho ka fina atu a koe mo e fanau hau ke he fonua, kua mafanatia nakai a lautolu ke fakakite a lautolu ki mua he tau atu taha ha lautolu ko e Tau Fakamoli a Iehova a lautolu? Fiafia nakai a lautolu ke he fakaholoaga totou Tohi Tapu mo e fakaakoaga fakamagafaoa ne fakatoka e koe? Kua taute moli kia e lautolu e puhala moui ha Iehova ma lautolu? Ko e onoonoaga fakamakutu kua maeke ke kitia ko e heigoa hau, ko e ulu he magafaoa, kua lata ke taute ke fakave mo e ati hake aki e moui fakaagaga he tau tagata takitokotaha he magafaoa.”
9 Tau Feleveiaaga he Fakapotopotoaga: Kua lata e tauteute tuai mo e o atu ke he tau feleveiaaga he fakapotopotoaga ke eke mo vala aoga he fakaholoaga he fahi tapu. (Hepe. 10:24, 25) Ke he tau magaaho, liga maeke a koe ke tauteute tuai auloa ko e magafaoa ke lata mo e falu feleveiaaga. He nakai fakatali ke he minuti fakahiku, maeke nakai ke fakatokatoka fakamitaki ke tauteute tuai? Ke he mena nai ko e fakaholoaga maopoopo ka fakatupu ki mua e mitaki he tauteute tuai mo e tau fua ka moua mai e koe he tau feleveiaaga.—Fakatai 21:5.
10 Ko e fai kakano mo e taute tumau ko e tau fakamailoga he fakaholoaga fakaagaga kua lauia mitaki. Ka e kua ka fakatauhele he falu tutuaga a koe he tauteute tuai ke lata mo e tau feleveiaaga? Ko e tohi Ministry School, lau 31, kua fakakite e manatu nai: “Kalo mai he matahele ke fakaako fakatepetepe e tohi ka e oti po ke, mua atu e kelea, ka nakai fakaako e tohi ha kua nakai fahia a koe ke taute ke oti. Ka e, fuafua ko e lahi fefe e mena kua fahia a koe ke fakaako ki ai, ti taute fakamitaki. Taute he tau fahi tapu takitaha. Ka levaleva, ti fakamakamaka ke lauia foki falu feleveiaaga.”
11 Ka hohoko mai tuai e tau magafaoa ke he tau feleveiaaga, to lagomatai a lautolu ke fakatoka fakahako e tau loto ha lautolu ma e fakahekeaga ki a Iehova mo e ke moua e aoga mai he tau hatakiaga ka foaki mai e ia. Pihia nakai e aga he magafaoa hau? Kua latatonu ke fakatokatoka fakamitaki mo e kaufakalataha a lautolu oti he kaina. Kaeke kitia e koe e magafaoa hau he fa fakatepetepe tumau ti fa tupetupe he tau afiafi he feleveiaaga, lata nakai ke fai hikihikiaga ke he tau fakaholoaga hau? Fai mena nakai ne maeke ke taute tuai? Kaeke taha he magafaoa ne loga lahi hana tau gahua ke taute, maeke nakai he falu ke lagomatai? Liga fakatote hifo nakai e tupetupe kaeke mau oti ke o atu tuai ke he feleveiaaga? Ko e fakatokatokaaga mitaki ka lafi ke he agaga mafola i loto he magafaoa mo e i loto he fakapotopotoaga.—1 Kori. 14:33, 40.
12 Fekafekauaga he Fonua: Ko e fakatoka pauaki e magaaho ke fakalataha ke he fonua ko e taha vala he fakaholoaga fakaagaga mitaki. Ko e tama tane fuata ko Jayson ne liu manatu: “Ke he magafaoa haku, ko e tau pogipogi Faiumu oti ne fakatoka pauaki ma e fekafekauaga he fonua. Ne mitaki e mena nai ki a au ha ko e lahi e fano haku he fekafekauaga, mo e loga e tau fua mitaki ne moua e au ti lahi e olioli haku.” Tokologa ne tutupu hake he tau kaina Fakamoli kua pihia foki e kitiaaga, ko e fai magaaho fakatoka pauaki ma e gahua he fonua he tau fahi tapu takitaha ne lagomatai a lautolu ke tupu tolomaki ki mua ko e tau fekafekau Kerisiano.
13 Ko e fakaholoaga maopoopo ka lagomatai foki ke he tau magaaho ne fakamole he magafaoa hau he fonua ke moua e fiafia mo e fua loga mai. Maeke fefe ke moua e mena nai? Ko e Kolo Toko, Iulai 1, 1999, lau 31, ne talahau pehenai: “Kua fakaaoga nakai e koe taha magaaho he fakaakoaga fakamagafaoa hau ke lagomatai falu he kaina ke tauteute tuai ma e fekafekauaga he fonua he fahi tapu? Ko e taute pihia ka moua e aoga lahi. (2 Timoteo 2:15) Kua maeke he mena ia ke foaki e kakano mitaki mo e fakatupu ki mua e fekafekauaga ha lautolu. He falu magaaho, liga fakatoka kehe e koe taha e fakaakoaga fakamagafaoa ke tauteute pihia. Ke he loga he tau magaaho, liga tutala fakaku a koe ke he fekafekauaga he fonua he fakaotiaga he fakaakoaga fakamagafaoa po ke he falu magaaho ni he fahi tapu.” Kua lali nakai e magafaoa hau ke taute pihia?
14 Kia Fakatumau ke Tupu Tolomaki ki Mua: Mai he fakatutalaaga nai, kua mailoga nakai e koe ko e tau fahi fe he magafaoa hau kua hagahaga mitaki? Nava ki a lautolu, ti fakamakamaka ke ati hake ke he tau mena ia. Kaeke kitia e koe loga e tau fahi kua lata ke tupu tolomaki ki mua, fifili taha po ke ua ke gahua fakamua ki ai. Ti ka eke ai mo taha vala he fakaholoaga fakaagaga, gahua ke he taha po ke ua foki. Kia mitaki e onoonoaga ki mua mo e fai kakano. (Filipi 4:4, 5) Na lahi mahaki e malolo kua lata ke kamata aki e fakaholoaga fakaagaga mitaki ma e kaina hau, ka e to fua mitaki, ha kua fakamafana mai e Iehova: “Ko ia foki kua taute hana mahani, to fakakite e au kia ia e fakamouiaga he Atua.”—Sala. 50:23.