Puha Huhu

◼ Kua lata nakai e fakaakoaga Tohi Tapu fakamagafaoa ke hokotaki ke he fakapotopotoaga?

Kaeke taute he matua Kerisiano e fakaakoaga Tohi Tapu fakamagafaoa ti putoia e tau fanau ne nakai la papatiso ia, maeke e matua ke hokotaki taha ni e tula he taha e fahi tapu, taha e liu aahi atu he taha e fahi tapu, mo e taha e fakaakoaga Tohi Tapu he kaina he taha e mahina. Taute pihia agaia ni kaeke molea e taha e tula he fakaakoaga, he taute lagaloga he taha e fahi tapu, po ke taute takitokotaha mo e tau fanau.​—Kikite e tohi Our Ministry, lau 104.

Kaeke ko e tau Fakamoli kua papatiso oti e tau tagata he kaina, ti nakai totou e tula po ke fakaakoaga ko e gahua he fonua (kehe ai ka hane fakaako agaia e tama ke he tohi ke uaaki he mole e papatisoaga). Kakano ha ko e hokotaki he fakapotopotoaga ke he gahua he fonua kua fakaata e matapatu gahua hane taute ai he gahua fakamatala he tala mitaki mo e fakaako e kupu moli he Tohi Tapu ki a lautolu ne nakai la tukulele mo e papatiso ko e tau fekafekau ha Iehova. (Mata. 24:14; 28:19, 20) Pete ia, kia nakai eke e tauteaga nei ke fakatote hifo e aoga he taute tumau e tau fakaakoaga pihia.

Ko e kotofaaga he tau mamatua Kerisiano a ia ke fakaako mo e tau fanau ha lautolu. Ko lautolu ne manako lagomatai ke fakatu po ke fakatolomaki e tau fakaakoaga fakamagafaoa ha lautolu kua maeke ke ole ke he tau motua ma e lagomatai. Kaeke ko e tau tutuaga kua lata e taha tagata fakailoa ke taute e fakaakoaga Tohi Tapu mo e tama tane po ke tama fifine ne nakai la papatiso ia he magafaoa Kerisiano ne fakalataha ke he fakapotopotoaga, kua lata ke tutala ke he leveki fakapotopotoaga po ke leveki fekafekau. Kaeke kua talia e tau fakaakoaga pihia, kua lata ia ia ne taute e fakaakoaga ke hokotaki ni tuga e ha fakaakoaga Tohi Tapu hana.

Ko e fakaako he tau fanau ke he tau puhala ha Iehova kua lahi atu e magaaho mo e malolo ne putoia ki ai mai he mena ka hokotaki hifo ke he gahua he fonua. (Teu. 6:6-9; Fakatai 22:6) Kua nava ke he tau mamatua Kerisiano ha kua hahamo e kotofaaga mamafa ha lautolu ke feaki ha lautolu a tau fanau ‘ke he tau kupu akonaki mo e tau kupu fakamafana ha Iehova.’​—Efeso 6:4.