Tohi Tapu​—Punaaga Hako he Kupu Mooli

Tali mai he fakamauaga tala, ko e tau tagata he tau feakiaga kehekehe kua manamanatu ko e Tohi Tapu ko e punaaga mauokafua he tala mooli. He vahā nei, totou miliona kua muitua e tau fakaakoaga he Tohi Tapu. Ka kua tokologa ne fakaheu e Tohi Tapu mo e pehē kua nakai aoga po ke nakai mooli. Fēfē e manatu haau? Maeke nakai a koe ke moua e kupu mooli he Tohi Tapu?

KAKANO KUA MAEKE A KOE KE FALANAKI KE HE TOHI TAPU

Iloa fēfē e koe kua lata ke falanaki ke he Tohi Tapu? Manamanatu ke he fakatai: Ka tala atu tumau he kapitiga e tau tala mooli ki a koe he loga e tau tau, liga manatu a koe kua falanaki mooli a ia. Fakatumau nakai e Tohi Tapu ke talahau e tala mooli tuga e kapitiga ne falanaki mooli ki ai? Hanei falu fakatai.

Mooli e Tau Tagata Tohia

Ne lahi e mahani fakamooli he tau tagata tohia Tohi Tapu he fakakite foki e tau hepehepe mo e tau mena ne kaumahala ai a lautolu. Ma e fakatai, ne tohia he perofeta ko Iona e nakai omaoma haana. (Iona 1:1-3) Talahau e ia he matahiku he tohi haana he Tohi Tapu e puhala ne fakatonu he Atua a ia, ka e nakai talahau e puhala ne fakahako e ia e mahani haana. (Iona 4:1, 4, 10, 11) Ko e mahani fakamooli ha lautolu oti ne tohia e Tohi Tapu ne fakakite e manamanatu lahi ha lautolu ke he tala mooli.

Aoga he Kupu Mooli

Talahau tumau nakai he Tohi Tapu e tau tomatomaaga mitaki ke he tau puhala kua aoga? Talahau mooli. Ma e fakatai, mailoga e talahauaga he Tohi Tapu ke fakatumau e tau fakafetuiaga mitaki: “Ko e tau mena oti kua loto a mutolu ki ai, ke eke he tau tagata kia mutolu; ati eke ā e mutolu e tau mena ia kia lautolu.” (Mataio 7:12) “Ko e tali totonu ke liliu kehe ai e ita; ka ko e kupu fakahukia kua tupu ai e ita.” (Tau Fakatai 15:1) Ē, ko e tala mooli he Tohi Tapu kua aoga agaia tuga ni he aho ne tohi ai.

Mooli e Fakamauaga Tuai

Loga e tau keliaga kelekele he tau tau kua mole ne fakakite hagaao ke he tau tagata mo e tau matakavi kehekehe mo e hakotika he tau mena tutupu ne talahau he Tohi Tapu. Tuga e fakatai, manamanatu ke he fakamooliaga he vala tala tote. Talahau he Tohi Tapu he vahā ha Nehemia, ko e tau tagata Turo (tau Foinike mai i Turo) ne nonofo i Ierusalema “ne ta mai ai e tau ika, mo e tau mena fakafua oti.”​—Nehemia 13:16.

Fai fakamooliaga nakai ke lalago e kupu Tohi Tapu nei? Ē. Ne moua he tau tagata keli kelekele e tau koloa Foinike i Isaraela, kitia ai kua fefakafuaaki e tau motu tokoua nei i tuai. Lafi ki ai, i Ierusalema ko e tau ika Mediterranean ne toe kua moua ai he keli hake. Talitonu e tau tagata keli kelekele kua tamai he tau tagata fakafua koloa e tau ika nei he kaukau tahi mamao. He mole e onoono fakahokulo ke he tau fakamooliaga, taha e pulotu ne pehē: “Ko e vala tala ia Nehe[mia] 13:16 kua hagaao ke he tau tagata Turo ne fakafua ika i Ierusalema kua hako.”

Mooli e Fakasaiene

Ko e Tohi Tapu ko e tohi fakalotu mo e fakamauaga tuai. Ka ko e magaaho ka hagaao ke he tau mena fakasaiene, kua felauaki tonu ai mo e tau mena fakasaiene. Hanei e taha fakatai.

Kavi ke he 3,500 e tau kua mole, ne talahau he Tohi Tapu ko e fua lalolagi kua “nakai ha i ai ha mena ke tautau” ai. (Iopu 26:7) Kehe mamao ai mo e tala fakatai ne fakamaama na hili e fua lalolagi he vai po ke totō ai he fonu lahi mahaki. Kavi ke he 1,100 tau he mole e tohia he tohi ha Iopu, ne matutaki e tau tagata ke talitonu kua nakai ni maeke e fua lalolagi ke tautau he ha mena; kua lata ke fai mena ke fakavē ki ai. He tolu ni e teau he tau tau kua mole he 1687, tohi e Isaac Newton e kumikumiaga haana ke he malolō gahuahua mo e fakamaama kua tautau e fua lalolagi ha ko e malolō galo ki luga he mena tokanoa. Ko e fakamooliaga lahi mahaki anei ne kua leva e totoku he Tohi Tapu he molea e 3,000 tau fakamua!