Kumi he Tala Mooli

Ke he afe he tau tau, nakai fai tagata ne iloa mooli e tali ke he hūhū ia. Ka e totou miliona e tau tagata ne mamate he tau gagao pikitia. Fakahiku ai, ne iloa he tau saienetisi e tala mooli. Moua e lautolu ne tupu mai e tau gagao he tau moko gagao​—ko e tau mena momoui ikiiki lalahi. He iloa e tala mooli ia kua lagomatai e tau tagata ke puipui mo e tului e tau gagao loga ne takitaki atu e piliona tagata ke momoui loloa mo e tino malolo.

Ka e kua e falu hūhū aoga? Lauia fēfē a koe he kumi e tala mooli ke he tau hūhū i lalo?

• Ko hai e Atua?

• Ko hai a Iesu Keriso?

• Ko e heigoa e Kautu he Atua?

• Ko e heigoa ne fakatoka mai he vahā anoiha?

Totou miliona e tau tagata ne kua moua e tau tali ke he tau hūhū ia ti kua fakaholo ki mua e tuaga he tau momoui ha lautolu. Maeke foki a koe ke aoga mai he tau tali.

TO MOUA NAKAI E KOE E TALA MOOLI?

Liga manamanatu a koe, ‘Maeke fēfē ke iloa e tala mooli ke he ha mena taha?’ Ha kua tuga kua uka lahi mahaki ke moua e tala mooli hagaao ke he tau mena loga. Ko e ha?

Tokologa e tagata ne nakai falanaki ke he tau fakatufono, tau pisinisi, po ke tau puhala uta tala ke tala age ki a lautolu e tala mooli. Uka a lautolu ke kitia mitaki e tau tala mooli mai he tau manatu fakatagata, tau vala tala ne nakai mooli katoatoa mo e tau tala pikopiko ne fakatoka mai ke tuga ko e tau tala mooli. He magahala nei ne loga e vala tala ne nakai mooli, ti nakai talia he tau tagata ke fakamaama e tau vala tala mooli mo e ke iloa foki e tau tala mooli.

Pete e tau paleko pihia, kua maeke ke moua e tau tali mooli ke he tau hūhū aoga lahi he moui. Puhala fe? He fakaaoga e tau lotomatala ne iloa e koe hagaao ke he tau tala mooli he tau aho takitaki.

KUMI HAAU KE HE TALA MOOLI

Liga kua fitā a koe he kumi e tala mooli he tau aho takitaha. Manamanatu ke he tuaga ha Jessica. “Kelea lahi e allergy he tama fifine haaku ke he tau fua pinati” he ui e ia, “ti maeke a ia ke mate he tama vala pinati tote.” Lata a Jessica ke iloa e tau mena kai ne fakatau e ia kua haohao mitaki ma e tama fifine haana. “Ko e lakaaga fakamua haaku ke totou e leipolo he tau pekete mena kai ke fakakia e tau mena ne taute aki. Ti kumikumi atu foki e au mo e hokotia ke hea ke he tau tagata ne taute ai ke iloa moolioli kua nakai fai mena ne lafi ki ai. Kumikumi foki e au e tau tala hako ne maeke ke fakakite e mitaki mooli he kamupanī ne muitua e fakaholoaga meā mitaki he tau mena kai ha lautolu.”

Ko e kumikumi haau he tau aho takitaha ke he tau tala mooli kua nakai kikili lahi ke tuga ha Jessica, ka e tuga a Jessica, liga fakaaoga e koe e puhala i lalo ke moua e tau tali ke he tau hūhū haau:

• Moua e tau tala mooli.

• Kumikumi atu foki.

• Iloa tonu kua hako e mouaaga he tau vala tala haau.

Ko e puhala ia foki ka lagomatai a koe ke moua e tala mooli ke he tau hūhū aoga lahi he moui. Puhala fe?

KO E TOHI NE OFOOFOGIA HE TALA MOOLI

He kumi e tala mooli he Tohi Tapu, fakaaoga e Jessica e puhala tuga ne fakaaoga e ia ke kumikumi aki e tau mena kai ne nakai lata ma e tama fifine haana. Pehē a ia, “He totou fakamitaki mo e kumikumi fakamakamaka kua lagomatai au ke moua e tala mooli he Tohi Tapu.” Tuga a Jessica, totou miliona e tau tagata kua fakaako e talahauaga he Tohi Tapu ke he tau hūhū nei:

• Ko e ha ne ha ha hinei a tautolu?

• Ko e heigoa ka tupu he mate?

• Ko e ha ne matematekelea ai?

• Ko e heigoa he Atua kua taute ke fakaoti e tau matematekelea oti?

• Ko e heigoa e puhala ke fiafia e moui magafaoa ha tautolu?

Maeke a koe ke moua e tau tali moolioli ke he tau hūhū nei mo e falu hūhū he totou e Tohi Tapu mo e kumikumi foki ke he initanete he www.pr418.com.