Kia Fakamalolo e Iehova

¹ Heigoa e manamanatuaga hau hagaao ke he aposetolo ko Paulo? He totou e tautolu e tohi a Gahua, ne mailoga e tautolu e makutu hana he fekafekau ki a Iehova. Kua maeke fefe ia Paulo ke fakakatoatoa e tau mena oti ne taute e ia? Pehe mai a ia: “Kua maeke ia au e tau mena oti kana ke he fakamalolo mai [hana] kia au.” (Filipi 4:13) Kua maeke ia tautolu foki ke aoga he fakamalolo ha Iehova. Fefe? He fakaaoga ai e tau foakiaga ono ne taute e ia ma tautolu ke fakafou e malolo mo e ke fakamalolo fakaagaga.

² Kupu he Atua: Tuga ni kua lata ia tautolu he kai ke malolo e tino ha tautolu, kua lata ia tautolu ke feaki e tautolu a tautolu aki e Kupu he Atua ke fakatumau e moui fakaagaga. (Mata. 4:4) Na foaki he Tohi Tapu e malolo ma tautolu ke lagomatai ai a tautolu. Ke maeke ia tautolu ke fakamakamaka mo e fiafia ke he kupu moli, kua lata ia tautolu ke taute e fakaakoaga fakatagata mo e kakano ti manamanatu hifo, ke he tau aho tumau ka maeke.​—Sala. 1:2, 3.

³ Liogi: Kua aoga lahi ke fakatata atu ki a Iehova, mua atu ke he tau magaaho ne lolelole lahi. He puhala he hana agaga, ne foaki e ia e malolo ke fakafou ai a lautolu ne ole atu ki a ia he liogi. (Luka 11:13; Efeso 3:16) Kua fakamafana mai e Tohi Tapu ki a tautolu “kia fakamakamaka ke he liogi.” (Roma 12:12) Pihia nakai e tauteaga hau?

⁴ Ko e Fakapotopotoaga: Kua moua foki e tautolu e malolo mo e fakaalofa mai he tau he fakapotopotoaga ti fefakamafanaaki he fakalataha auloa a tautolu mo e tau matakainaga tane mo e fifine ha tautolu. (Hepe. 10:24, 25) Ka fai matematekelea a tautolu, ne fakatu hake e lautolu a tautolu mo e foaki fakaalofa noa mai ki a tautolu.​—Fakatai 17:17; Fakama. 4:10.

⁵ Ko e Fekafekauaga he Fonua: He gahuahua tumau he fekafekauaga he fonua ne lagomatai ai a tautolu ke ono tonu ke he Kautu mo e hana tau fakamonuinaaga. Kua malikiti hake e tau agaga ha tautolu he lagomatai e tautolu e falu ke iloa a Iehova. (Gahua 20:35) Nakai maeke oti ia tautolu ke hiki atu mo e gahua ke he tau matakavi ne loga e tau saito ke helehele po ke gahua tumau he fekafekauaga he fonua, ka e maeke ia tautolu ke fakamakutu ke he falu puhala kehekehe he fekafekauaga.​—Hepe. 6:10-12.

⁶ Tau Leveki Kerisiano: Ne aoga ai a tautolu he tau fakamafanaaga mo e lagomatai ne foaki mai he tau motua. Kua fifili e Iehova a lautolu ke leveki e fuifui mamoe he Atua mo e leoleo ai. (1 Pete. 5:2) Ne ati hake he tau leveki he takaiaga e tau fakapotopotoaga ne leveki e lautolu, tuga he taute e Paulo he vaha hana.​—Roma 1:11, 12.

⁷ Fifitakiaga ha Lautolu ne Tua Fakamoli: Kua fakamalolo ha ia ke kikite e tau fifitakiaga mafanatia he tau ekegahua tua fakamoli, he vaha i tuai mo e he vaha fou. (Hepe. 12:1) He magaaho ne manako ke fakafou e malolo hau, ne ha he totou ai e tau tala mafanatia he tau mouiaga i loto he tau mekasini ha tautolu, e tau fakailoaaga fakamalolo he Yearbook, po ke falu fakamauaga fulufuluola ha i ai he tohi Proclaimers ke he vaha fou he Tau Fakamoli a Iehova?

⁸ Taha matakainaga tane, mogonei he atu tau 90 hana, kua talia e ia e kupu moli he magaaho ne fuata ai. Ka e mogo ne tote agaia a ia, kua kamatamata tuai e tua hana. Fakamua, ko e falu ne gahuahua fakalataha he fakapotopotoaga ne tiaki e fakatokatokaaga a Iehova. Ko e gahua he taha fale ke he taha fale, ne kitia kua uka lahi ki a ia. Pete ia, ne falanaki tumau a ia ki a Iehova. Nakai leva mo e moua e ia e fiafia he fekafekauaga. He magaaho nei? Pete ne nakai malolo mitaki e tino, ka e gahua agaia a ia mo e magafaoa ha Peteli i Brooklyn, fekafekau i ai he Kau Fakatufono. Nakai tokihala a ia ha kua pipiki ke he fakatokatokaaga a Iehova.

⁹ Taha matakainaga fifine he magafaoa Peteli i Peritania ne papatiso ai a ia he 13 e tau tau. He tau hake, ne kamata ai a ia he gahua paionia mo e hana tugaane, ka e he mole atu e tau ia, ne tuku e matua tane hana ke he fale puipui ha he tu tokotaha a ia ha i ai e Felakutaki II he Lalolagi. Ne falanaki tumau a ia ki a Iehova ke fakamalolo mai, mo e hagaaki a ia ke fekafekau tumau ke he Atua moli. Nakai leva, ti fakamau a ia mo e taha matakainaga tane tua fakamoli, ti gahua tokoua a laua ke taute e finagalo a Iehova. Ka e 35 e tau tau he fakamauaga, ne mate fakalutukia e tane hana. Ka e liu foki a ia falanaki ke he malolo a Iehova, ti tutaki hifo ai ke he aho nei, ne amaamanaki a ia ke fekafekau tukulagi ko e taha matakainaga he magafaoa ha Iehova he lalolagi.

¹⁰ Ne lagomatai mo e fakamalolo e Iehova e tau fekafekau tua fakamoli hana. “To foaki atu e ia e malolo kia lautolu kua lolelole; ka ko lautolu kua nakai fai malolo to fakatupu fakalahi e ia e malolo kia lautolu.” Maeke ia tautolu ke moua e malolo punaaga lahi nei he fakaaoga ai e tau foakiaga ono kua totoku i luga. Kia manatu: “Ko lautolu kua tatali kia Iehova, to fakafou ai ha lautolu a malolo, . . . to tafepoi a lautolu ka e nakai mategugu; to o a lautolu, ka e nakai lolelole ai a lautolu.” (Isa 40:29-31) Kua falanaki lahi a Paulo ke he malolo a Iehova, ti lata foki ke pihia a tautolu.