“Maeke e Tau Mena Oti ke he Atua”
1 Ko e matapatu gahua he fakapotopotoaga Kerisiano ke fakamatala e fekau he Kautu ke he lalolagi katoa. (Mata. 24:14) Ko e gahua makimaki. Ke he tokologa he tau tagata kitekite, kua tuga ko e pule ke he tau koloa kehe ue atu nukua moua e tautolu. Ke he falu, ko e taute e kotofaaga nei kua uka ke moli, ha kua felauaki a tautolu mo e fa va, totokoaga, mo e favaleaga. (Mata. 24:9; 2 Timo. 3:12) Nukua talahau he tau tagata totoko kua nakai maeke e gahua nei ke taute. Pete ia, ne pehe a Iesu: “Maeke e tau mena oti ke he Atua.”—Mata. 19:26.
2 Tau Fakafifitakiaga Mitaki ke Muitua: Ne kamata e fekafekauaga ha Iesu ko e tagata ne totoko ke he fakatokatokaaga katoa nai. He lali ke puipui a ia mai he kautuaga, ne tuku he tau tagata totoko a ia ke he ekefakakelea muikau, fakahiku fakahoko a ia ke he mate mamahi. Ka e, ke he fakaotiaga, ne fakapuloa mauokafua e Iesu: “Kua kautu au ke he lalolagi.” (Ioane 16:33) Moli, ko e fakakatoatoaaga mata kehe!
3 Ne fakakite he tau tutaki ha Iesu e aga mo e makai malolo pihia he fekafekauaga faka-Kerisiano. Tokologa ne keli, tafolo, tolo ke he fale puipui, mo e tamate foki. Ka kua “fiafia [a lautolu], ha kua eke ni kua aoga a lautolu ke eke fakakelea ha ko e hana higoa.” (Gahua 5:41) Pete ne totoko ki a lautolu, kua taute e lautolu e gahua fakalata kua nakai maeke he fakamatala e tala mitaki “ke hoko ni ke he fakaotiaga he lalolagi.”—Gahua 1:8; Kolose 1:23.
4 Puhala ke Kautu he Vaha ha Tautolu: Kua fakamakai foki a tautolu he taute e gahua fakamatala he Kautu pete he fakalata kua nakai maeke. Pete e pa, favale, tuku fale puipui, mo e falu laliaga vale ke taofi aki a tautolu, kua kautu a tautolu. Maeke fefe e mena nei? “Nakai ko e toa, nakai ko e malolo, ka ko e haku Agaga, kua pihia mai a Iehova Sapaota.” (Saka. 4:6) Ha ko Iehova i tua ha tautolu, nakai fai mena ke taofi e gahua ha tautolu!—Roma 8:31.
5 Ka fakamatala a tautolu, nakai fai kakano ke ma po ke matakutaku po ke logona kua nakai iloilo a tautolu. (2 Kori. 2:16, 17) Ha ha ia tautolu e tau kakano malolo ue atu ke fakaholo ki mua he folafola e tala mitaki he Kautu. Mo e lagomatai a Iehova, to fakakatoatoa e tautolu e “mena nakai maeke”!—Luka 18:27.