Veveheaga Hogofulu Ma hiva
Kia Tumau ke Talahau Fakamalolo e Kupu he Atua
1. (a) Ko e heigoa e tala mitaki ne fakapuloa he tau tutaki ha Iesu, ka e tali atu fefe he falu Iutaia? (e) Ko e heigoa e tau huhu ka liga huhu e tautolu?
TEITEI 2,000 he tau tau kua mole, ko e Tama he Atua, ko Iesu Keriso, ne fakauku ko e Patuiki anoiha ke he lalolagi oti. Ne tamate a Iesu ha ko e fakaohoohoaga he tau fi fakalotu, ka e ne fakatu mai e Iehova a ia he mate. Puhala mai ia Iesu, ati kua maeke ai e moui tukulagi mogonei. Magaaho ne fakapuloa he tau tutaki ha Iesu ke he tau tagata e tala mitaki nei, ne tupu ai e favale. Falu ia lautolu ne tuku he fale puipui, hokotia ke fahi mo e peehi ke aua neke vagahau hagaao ki a Iesu. (Gahua 4:1-3, 17; 5:17, 18, 40) Ko e heigoa ha lautolu ka taute? Ko e heigoa hau ka taute? To matutaki nakai a koe ke fakamatala fakamalolo?
2. (a) Ko e heigoa e tala mua atu e mitaki kua lata ke fakapuloa he vaha ha tautolu? (e) Ko hai ne ha ha ai e matagahua ke fakamatala e tala mitaki?
2 He 1914 ko e Patuiki he Kautu he Atua, ko Iesu Keriso, ne fakatu i luga he lagi ke pule ‘ki mua he tau fi hana.’ (Salamo 110:2) Holo atu ai, ne tolo hifo a Satani mo e hana tau temoni ke he lalolagi. (Fakakiteaga 12:1-5, 7-12) Ko e tau aho fakahiku he fakatokaaga kelea nei nukua kamata agataha. Ka fakaoti e magahala nei, to tuki malipilipi he Atua e fakatokaaga katoatoa fakasatani. (Tanielu 2:44; Mataio 24:21) Ko lautolu ne hao to ha ha i mua ha lautolu e amaamanakiaga he moui tukulagi ke he lalolagi ka eke mo parataiso. Kaeke ofania e koe e tala mitaki nei, to manako a koe ke tala age ke he falu. (Mataio 24:14) Ka e ko e heigoa e tali ka amanaki a koe ke moua?
3. (a) Tali atu fefe e tau tagata ke he fekau he Kautu? (e) Ko e heigoa e huhu kua latatonu ia tautolu ke fehagai ki ai?
3 Ka fakapuloa e koe e tala mitaki he Kautu, falu tagata to fiafia ki ai, ka e laulahi to nakai talia. (Mataio 24:37-39) Ko e falu to liga va po ke totoko ki a koe. Ne hataki e Iesu to liga totoko mai ni he tau magafaoa hau. (Luka 21:16-19) To liga hau foki he gahuaaga hau po ke he aoga. He falu vala he lalolagi, ko e Tau Fakamoli a Iehova kua hokotia ke pa malu he fakatufono. Ka fehagai mo e tau tutuaga pihia, to matutaki nakai a koe ke talahau fakamalolo e kupu he Atua mo e ‘tumau ke he tua’?—1 Korinito 16:13.
Nakai Falanaki ke he Malolo Ni ha Tautolu
4. (a) Ke fakamoli ko tautolu ko e tau fekafekau tua fakamoli he Atua, ko e heigoa e matapatu mena kua lata ke taute? (e) Ko e ha kua aoga lahi e tau feleveiaaga Kerisiano?
4 Ko e matapatu he eke mo fekafekau tua fakamoli ha Iehova ko e falanaki ke he hana tau foakiaga. Taha he tau mena nei ko e tau feleveiaaga fakapotopotoaga. Kua fakamalolo mai e tau Tohiaga Tapu ki a tautolu ke nakai tiaki e tau feleveiaaga. (Heperu 10:23-25) Ko lautolu ne matutaki ko e Tau Fakamoli tua fakamoli a Iehova kua eketaha a lautolu ke o atu tumau he tau feleveiaaga mo e tau matakainaga tapuaki. He tau feleveiaaga nei ko e iloilo ha tautolu ke he tau Tohiaga Tapu kua tupu ki mua. Pihia foki, kua tupu ki mua e loto fakaaue ha tautolu ke he tau kupu moli talahaua, mo e to mafiti e mataala ha tautolu ke he tau puhala ke fakagahua ai. Kua fakatata lahi a tautolu ke he tau matakainaga Kerisiano he tapuaki fakalataha mo e fakamalolo ke taute e finagalo he Atua. Kua foaki he agaga ha Iehova e takitakiaga puhala mai he fakapotopotoaga, ti puhala mai he agaga ia, ko Iesu hane fakalataha mo tautolu.—Mataio 18:20; Fakakiteaga 3:6.
5. Magaaho ne pa malu e Tau Fakamoli a Iehova, ko e heigoa kua taute ke lata ma e tau feleveiaaga?
5 Fano tumau nakai a koe he tau feleveiaaga oti, mo e fakagahua fakatagata nakai e koe e tau mena ne logona e koe ne kua fakatutala ki ai? Falu magaaho, he pa malu e Tau Fakamoli a Iehova, kua lata ke taute e tau feleveiaaga he tau matakau ikiiki he tau kaina tagata. Ko e matakavi mo e magaaho liga hikihiki mo e liga nakai hagahaga mitaki tumau, falu feleveiaaga kua taute he po. Ka e pete he nakai hagahaga mitaki fakatagata po kua hagahaga kelea e tuaga, ko e tau matakainaga tane mo e fifine tua fakamoli ne eketaha ke fakalataha ke he tau feleveiaaga takitaha.
6. Fakatata fefe e tautolu e falanaki ha tautolu ki a Iehova, mo e maeke fefe e mena nei ke lagomatai a tautolu ke tumau e vagahau fakamalolo?
6 Kua feaki e falanaki ki a Iehova he fuluhi tumau ki a ia he liogi mai he loto, mailoga kua manako a tautolu ke he lagomatai mai he Atua. Taute nakai e koe e mena ia? Ne liogi lagaloga a Iesu he hana fekafekauaga he lalolagi. (Luka 3:21; 6:12, 13; 22:39-44) Ti he po ato tamate a ia, ne fakamalolo e ia hana tau tutaki: “Kia mataala a, mo e liogi, neke hoko mai e kamatamata kia mutolu.” (Mareko 14:38) Ka fehagai a tautolu mo e nakai talia ha ko e fekau he Kautu, to liga kamatamata a tautolu ke fakamanou hifo he fekafekauaga ha tautolu. Ka va po ke favale e tau tagata ki a tautolu, to liga logona e tautolu e kamatamata ke fakanono ke kalo mai he tau lekua. Ka e ka liogi fakamakamaka a tautolu ma e agaga he Atua ke lagomatai a tautolu ke vagahau fakamalolo, to puipui a tautolu neke kaumahala ke he tau kamatamata ia.—Luka 11:13; Efeso 6:18-20.
Ko e Fakamauaga he Fakamatala Fakamalolo
7. (a) Ko e ha e fakamauaga ia Gahua kua aoga pauaki ki a tautolu? (e) Tali e tau huhu ne foaki mai he matahiku he paratafa nei, peehi e puhala kua aoga e vala tala ki a tautolu.
7 Ko e fakamauaga i loto he tohi a Gahua kua aoga pauaki ki a tautolu oti. Kua talahau e puhala he tau aposetolo mo e falu tutaki he vaha fakamua—tau tagata ne tatai e tau logonaaga mo e ha tautolu—ne kautu ke he tau fakatauhele mo e fakamoli ke fakamalolo mo e tua fakamoli ko e tau tagata fakamatala ha Iehova. Kia kumikumi a tautolu ke he vala he fakamauaga ia he onoono ke he tau huhu lagomatai kua mumui mai mo e tau kupu tohi ne fatiaki. He taute pihia e tautolu, manamanatu ke he puhala kua aoga fakatagata ki a koe e tau mena kua totou e koe.
Ko e tau tagata fakaako tokoluga kia e tau aposetolo? Ko lautolu kia ko e tau tagata ne nakai matakutaku pauaki pete ko e heigoa ne tupu? (Ioane 18:17, 25-27; 20:19; Gahua 4:13)
Ko e heigoa ati maeke a Peteru ke vagahau fakamalolo ki mua he hopoaga faka-Iutaia ne fakahala e Tama fuataha he Atua? (Mataio 10:19, 20; Gahua 4:8)
Ko e heigoa he tau aposetolo ne taute he tau fahi tapu ato ta atu a lautolu ki mua he Saneheturini? (Gahua 1:14; 2:1, 42)
Magaaho ne poaki he tau pule ke fakaoti e fakamatala he tau aposetolo ne fakave ke he higoa ha Iesu, fefe e tali ha Peteru mo Ioane? (Gahua 4:19, 20)
He mole e fakatoka mai ha lautolu, ko hai he tau aposetolo ne liu kumi lagomatai ki ai? Ne liogi kia a lautolu ke oti e favale, po ke heigoa? (Gahua 4:24-31)
Ko e heigoa e puhala lagomatai ne foaki e Iehova he magaaho ne lali e tau tagata totoko ke fakaoti e gahua fakamatala? (Gahua 5:17-20)
Ne fakakite fefe he tau aposetolo kua maama ia lautolu e kakano ne fakahao a lautolu? (Gahua 5:21, 41, 42)
Pete he tokologa e tau tutaki ne kua vehe fano ha ko e favale, ko e heigoa ne matutaki a lautolu ke taute? (Gahua 8:3, 4; 11:19-21)
8. Ko e heigoa e tau fua ofogia ne moua mai he fekafekauaga he tau tutaki fakamua, mo e putoia fefe a tautolu i ai?
8 Ne nakai teao e gahua fakamatala he tala mitaki. Kavi ke he 3,000 tutaki ne papatiso he Penetekoso 33 V.N. “Ka kua au atu ai he lafilafi ke he Iki a lautolu ne tua, tokologa e tau tane katoa mo e tau fifine.” (Gahua 2:41; 4:4; 5:14) Magaaho fakamui, hokotia foki e tagata favale lahi ke he tau tagata he Atua, ko Saulo i Taso, ne eke mo Kerisiano mo e kamata agataha ke fakamatala fakamalolo e kupu moli. Ne iloa a ia ko e aposetolo ko Paulo. (Kalatia 1:22-24) Ko e gahua ne kamata he senetenari fakamua ne nakaila fakaoti ia. Kua malolo lahi he tau aho fakamui nei ti kua hoko tuai ke he tau fahi oti he lalolagi. Kua ha ha ia tautolu e kotofaaga ke fakalataha ki ai, ti he taute pihia e tautolu, kua maeke ia tautolu ke ako mai he tau fakafifitakiaga ne fakatoka he tau tagata fakamatala mahani fakamoli ne fekafekau mua ia tautolu.
9. (a) Ko e heigoa e tau magaaho mitaki ne fakaaoga e Paulo ke fakamatala? (e) Ko e heigoa e tau puhala kua folafola e koe e fekau he Kautu ke he falu?
9 Magaaho ne ako e Paulo e kupu moli hagaao ki a Iesu Keriso, ko e heigoa ne taute e ia? “Ti fakamatala agataha e ia . . . ko ia ni ko e Tama he Atua.” (Gahua 9:20) Ne loto fakaaue a ia ke he fakaalofa totonu he Atua ki a ia, ne mailoga e ia kua lata e tau tagata oti ke moua e kupu moli ne kua moua e ia. Ko Paulo ko e Iutaia, ti hagaao ke he aga fakamotu he magahala ia, ne fano a ia ke he sunako ke fakamatala. Ne fakamatala foki a ia mai he taha fale ke he taha fale mo e tutala ke he tau tagata he makete. Ti makai a ia ke fano ke he tau matakavi fou ke fakamatala e tala mitaki.—Gahua 17:17; 20:20; Roma 15:23, 24.
10. (a) Fakakite fefe e Paulo he fakamalolo, ne manamanatu foki a ia ke he puhala ne fakamatala a ia? (e) Liga fakaata fefe e tautolu e tau mahani ha Paulo he fakamatala ke he tau magafaoa, tau kapitiga gahua, po ke tau kapitiga aoga?
10 Ne fakamalolo a Paulo ti manamanatu foki, ati kua lata foki a tautolu ke pihia. Ke he tau Iutaia ne ole fakamakamaka a ia fakave ke he tau maveheaga ne taute he Atua ke he tau tupuna ha lautolu. Ke he tau Heleni he tutala a ia fakave ke he tau mena ne aga mo e mahani ki a lautolu. Ke he tau magaaho ne fakaaoga e ia e puhala ne ako e ia e kupu moli ke eke mo puhala ke fakamatala ai. Ne pehe a ia: “Kua eke foki e au e mena nai ha ko e vagahau mitaki kia igatia fakalataha a tautolu mo au.”—1 Korinito 9:20-23; Gahua 22:3-21.
11. (a) Ko e heigoa ha Paulo ne taute ke kalo mai he fehagai tumau mo e tau tagata totoko? (e) Magaaho fe ka fifitaki fakapulotu e tautolu e fakafifitakiaga ha Paulo, mo e fefe? (i) Mai i fe e malolo ke fakatumau a tautolu ke vagahau fakamalolo?
11 He mailoga e Paulo mai he totokoaga nukua lauka a ia he fano kehe ke fai magaaho ke fakamatala he taha matakavi, ati ne taute pihia e ia ka e nakai fetoko fakamalolo tumau mo e tau tagata totoko. (Gahua 14:5-7; 18:5-7; Roma 12:18) Ka e ne nakai ma a ia he tala mitaki. (Roma 1:16) Pete he logona e Paulo e hemu—hokotia ke favale—he muitui e ekefakakelea he tau tagata totoko ki a ia, ne “fakamalolo a [ia] ha ko e Atua ha tautolu” ke fakatumau ke fakamatala. Ne pehe a ia: “Ha ha ia au e Iki, mo e fakamalolo mai kia au; kia fakakatoatoa ha ko au e fakamatalaaga.” (1 Tesalonia 2:2; 2 Timoteo 4:17) Ko e Ulu he Fakapotopotoaga Kerisiano, ko Iesu, ne matutaki ke foaki e malolo kua lata ma tautolu ke taute e gahua ne talahau tuai ma e vaha ha tautolu.—Mareko 13:10.
12. Ko e heigoa ne fakamoli e fakamalolo faka-Kerisiano, mo e ko e heigoa e fakaveaga ma e mena ia?
12 Ha ha ia tautolu e tau kakano oti ke vagahau fakamalolo tumau e kupu he Atua, tuga ne taute e Iesu mo e falu fekafekau tua fakamoli he Atua he senetenari fakamua. Nakai kakano e mena nei ke nakai manamanatu ke he falu po ke lali ke peehi e fekau ki a lautolu ne nakai manako ki ai. Ka e nakai fiu a tautolu ha kua nakai talia e tau tagata; po kua fakanono a tautolu ha kua totoko. Tuga a Iesu, ne tuhi a tautolu ke he Kautu he Atua ko e fakatufono tonuhia he lalolagi katoa. Kua vagahau a tautolu mo e mauokafua kakano kua hukui e tautolu a Iehova, ko e Pule Katoatoa he Lagi mo e Lalolagi, mo e kakano ko e fekau ne fakamatala e tautolu kua nakai mai ia tautolu ka e mai ia ia. Ti kua lata he fakaalofa ha tautolu ma Iehova ke eke mo fakaohoohoaga malolo ha tautolu ke fakaheke a ia.—Filipi 1:27, 28; 1 Tesalonia 2:13.
Fakatutala Fakamanatu
• Ko e ha ne aoga ai ke tufatufa e fekau he Kautu ke he tau tagata oti kua maeke, ka e ko e heigoa e tau tali kua amanaki a tautolu ke moua?
• Maeke fefe ia tautolu ke fakakite kua nakai falanaki a tautolu ke he malolo ni ha tautolu ke fekafekau ki a Iehova?
• Ko e heigoa e tau fakaakoaga uho ne ako e tautolu mai he tohi a Gahua?
[Tau Fakatino he lau 173]
Tuga ni fakamua, kua fakamatala he tau fekafekau ha Iehova he vaha nei e kupu he Atua mo e fakamalolo