Mitaki ke Fakamukamuka
1 Ko e ha kua fanogonogo e tau tagata ke he tau fanau ikiiki he fakamatala e lautolu e Kautu? Taha e kakano nukua mukamuka e tau puhala vagahau ha lautolu. Fa manamanatu e falu tagata fakamatala na lata ni ke fakaaoga e puhala mahifi lahi. Ka e, kua kitia maali ko e puhala he vagahau mukamuka mo e mahino mitaki naia kua lata.
2 Ne fakapuloa e Iesu e Kautu he Atua ke he puhala mahani mukamuka, mo e kupu tonu ti fakaako foki e tau tutaki hana ke taute pihia. (Mata. 4:17; 10:5-7; Luka 10:1, 9) Kamata a ia mo e manatu mukamuka, tau huhu, mo e tau fakataiaga ke futiaki mai e tau tagata fanogonogo ki a ia mo e hokotia ke he tau loto ha lautolu. (Ioane 4:7-14) Aoga lahi ma tautolu ke fifitaki e puhala hana mo e taute e tau lauga ne mukamuka mo e maama.
3 Ko e ‘tala mitaki he kautu’ e fekau ha tautolu ke fakamatala. (Mata. 24:14) He fakaaoga e koe e matapatu tala he Kautu to lagomatai atu a koe ke fakamukamuka e kamataaga hau. Talahau e tau mena ne lauia mo e tau tagata fanogonogo hau. Tuga ni fa mahuiga lahi e tau fifine ke he tau tala fakamagafaoa nakai ke he tau tala fakapolitika. Ko e tau matua tane, fa lau lahi ke he tau gahuaaga mo e levekiaga he hana magafaoa. Kua fiafia lahi e tau fuata ke he tau mena hagaao ki a lautolu anoiha; ko e tau momotua, e tino malolo mo e haoaga ha lautolu. Manako lahi e tau tagata ke iloa e tau mena ne tutupu he tau matakavi ha lautolu, nakai lahi ke he tau mena he tau motu mamao. Ti ka oti e tau fakafelevia, ti matutaki ke he tau fakamonuinaaga ka moua he tau tagata omaoma i lalo hifo ni he pule Kautu he Atua. Ko e tau kupu gahoa, lafi mo e kupu Tohi ne kua fifili tuai ka aoga lahi ke fakaohooho aki e manamanatuaga he tagata ne tutala mo koe.
4 Maeke ia koe ke kamata e tutalaaga pehe:
◼ “Liga talia e koe kua loga lahi e tau gagao kelea ne fakamatematekelea aki e tau tagata he lalolagi. Ka e iloa nakai e koe e maveheaga he Atua ne pehe mai, ato nakai leva ti holoholo kehe e ia e tau gagao oti, ti nakai tuai fai mate?” Tatali ke tali mai, ti totou age e Fakakiteaga 21:3, 4.
5 He fakaaoga e tau lauga mahino mitaki ti mukamuka, kia aamo ai e koe e tau manamanatu mo e tau loto he tau tagata he matakavi hau, ti lagomatai ai a lautolu ke iloa a Iehova mo e amaamanakiaga ke he moui tukulagi.—Ioane 17:3.