‘Kia Fanogonogo mo e Tolomaki Atu e Iloilo’
1 Kua fakatata he tohi a Fakatai e iloilo ke he mena kua ui atu: “Kia fanogonogo mai a a mutolu ha ko e mena to vagahau atu e au ke he tau mena mitaki ue atu; to vagahau atu haku tau laugutu ke he tau mena tonu. Ha ha ia au e pule mo e iloilo. . . . Kia fanogonogo mai a kia au; ha kua monuina a lautolu kua omaoma ke he haku a tau puhala. Ha ko ia kua moua au, kua moua e ia e moui; to moua foki e ia e fakaalofa mai ia Iehova.” (Fakatai 8:6, 14, 32, 35) Kua fakamaama fakamitaki mai he tau kupu ia e fakaakoaga ne amaamanaki atu a tautolu he Fonoaga Fahimotu “Tau Faiaoga he Kupu he Atua.”
2 Kua kumikumi tuai e tau manako he fematakainagaaki katoa he lalolagi, ti ko e fakaholoaga he fonoaga kua tauteute ke tali e tau manako ia. Ko e tau fakaakoaga fakaaga mo e tau puhala ke fakaaoga kua foaki mai, ka fakagahuahua, to lagomatai ke fakafiafia a tautolu, ke taofi mau e fakafetuiaga mitaki mo Iehova, mo e holo tumau he puhala ke he moui tukulagi. Moli ni, ha ha ia tautolu e kakano mitaki ‘kia fanogonogo mo e tolomaki atu e iloilo.’—Fakatai 1:5.
3 Ato Hoko e Fakaholoaga: Ke aoga ai katoatoa he tau lauga kua fakatoka, lata kia nonofo hifo he tau nofoa ha tautolu mo e loto amaamanaki ke he fakaholoaga ka kamata. Lata e mena nei mo e igatia e tagata ke tauteute tuai e tau mena fakamitaki. Kua aoga lahi he uhu matike mo e tauteute. Fano ke okioki tuai he po fakamua. Ala tuai ke fakata a lautolu he kau hau ke tauteute mo e taumafa ke he kaipogipogi. Uhu atu ke he fonoaga ti maeke ia koe ke moua e nofoa mo e tokaga ke he falu mena ne mahani ato kamata e fakaholoaga. Kua hafagi e tau gutuhala he hola 8:00 a.m., mo e kamata e fakaholoaga he hola 9:30 a.m. he tau aho takitaha.
4 Tali ko e kakano fakamua he fonoaga ke fakaheke atu ki a Iehova “ki mua he fakapotopotoaga,” kua lata ke hafagi e tau maga he polokalama ke he puhala ne fakamonu ai ha tautolu a Atua. (Sala. 26:12) Ko e mena ia, kua fakamafana atu ke moua e tau nofoa fakamua to fakailoa e lologo ke hafagi aki. Felauaki mo e tomatomaaga he Tohi e mena nei: “Kia eke e tau mena oti mo e fuluola mo e taute fakamitaki.” (1 Kori. 14:40) Heigoa e kakano he mena nei ma tautolu takitokotaha? Ka kitia e koe e tagata kua nofo he nofoa i mua he kamata e leo kofe, ti kumi fakavave e nofoa hau. To maeke ia koe ke lologo fakalataha mo e loto katoa e lologo ka hafagi aki e tau polokalama, lagaki hake e fakahekeaga ki a Iehova.—Sala. 149:1.
5 Ha Ha i Ai he Fakaholoaga: Kua “taute e Esera hana loto ke kumi ke he fakatufono a Iehova mo e eke ai.” (Esera 7:10) Maeke fefe ia tautolu ke taute ha tautolu a loto ke moua e fakaakoaga ne foaki e Iehova? He totou e koe e tau mataulu lauga kehekehe i ai he polokalama, huhu hifo a koe kia koe, ‘Heigoa anei kua talahau mai e Iehova kia au he fakaholoaga e? Fakaaoga fefe e au mo e haku a magafaoa e tau fakailoaaga nei? (Isa 30:21; Efeso 5:17) Fakaaoga tumau e tau huhu pihia ke he fonoaga. Fakamau hifo e tau manatu kua manako a koe fakaaoga. Ti fakaaoga e magaaho ke fakatutala he matahiku he aho ia. To lagomatai he mena nai a koe ke mauloto mo e fakagahuahua e tau fakailoaaga.
6 Ko e mena uka lahi ke nofo fakalogologo mo e fanogonogo fakatekiteki ke he magaaho loa. Heigoa e mena ke lagomatai aki a tautolu ke nakai fakahihiga kehe e onoonoaga ha tautolu? Fakaaoga e malolo he tau mata. He laulahi, ka onoono fakalahi a tautolu ke he taha mena, to manamanatu fakalahi ki ai. (Mata. 6:22) Ti, lali fakalahi ke aua kalo e ulu hau ke he ha leo noa po ke tau fagahuahua. Tukumata ke he tagata ne vagahau i mua. Muitua atu he hau a Tohi Tapu ke he tau kupu Tohi ne totou, ti tokai pihia tumau he fakatutala ke he kupu Tohi.
7 Ko e mahani faka-Kerisiano ka lagomatai a tautolu ke aua fakalavelave atu falu ka e holo agaia e fakaholoaga. (1 Kori. 13:5) Anei “ko e vaha ke fakanono ai” mo e fanogonogo. (Fakama. 3:7) Ko e mena ia, lali he aua o fano po ke talatala noa. Manatu ke o tuai ke he tau fale tote. Aua kai po ke inu ato hoko e magaaho ne fafati, kaeke ia kua lauia ai e malolo tino hau. Kia lautolu ne ta mai e tau telefoni, tau fakahoko fekau, tau pokiata vitio, mo e tau pokiata aua fakaaoga he puhala ne fakatauhele e falu. Lata he tau mamatua he pulega auloa ke he magafaoa ke nonofo fakalataha—pihia mo e tau tama fuata—ti kua maeke ke leveki fakamitaki e tau fanau ha lautolu.—Fakatai 29:15.
8 Taha motua ne fakalataha tumau he tau tau ke he fonoaga ne pehe he tau kua mole: “Kua homo atu e fonoaga nei he taha kakano foki. Teitei katoa e tau tagata ne fakamau hifo e tau lauga, pihia foki ke he tau tama ikiiki. Kua fuluola ha ke kitia. Fakaaoga fakalahi e Tohi Tapu he mogo kua fakamafana he tagata lauga ke fakaaoga ke he tau kupu Tohi.” Fuluola ha he kitia e tau puhala fanogonogo pihia. Nakai ni moua e tautolu e aoga pihia mo e tau matakainaga ha tautolu ka e mua atu ni kua fakaheke atu e Faiaoga Homo Ue Atu ha tautolu, ko Iehova ko e Atua.—Isa 30:20.