Fakapotopoto Auloa ke Fakaheke a Iehova
1. Ko e heigoa e matapatu he fonoaga, mo e ko e ha kua lata a Iehova ke fakaheke e tautolu?
1 Kua mua ue atu e malolo ha Iehova, nakai fai fakatataiaga e pulotu, mitaki katoatoa e fakafili tonu, mo e ko e peresona he fakaalofa. Ha ko e Tufuga, Foaki Moui, mo e Pule Katoatoa he Lalolagi mo e Lagi Katoatoa, ko ia tokotaha maka kua lata ia tautolu ke tapuaki ki ai. (Sala. 36:9; Fakakite. 4:11; 15:3, 4) He Fonoaga he Fahimotu “Kia Fakaheke Atu ke he Atua” he magahala tau tupu nei to fakamalolo e fifiliaga ha tautolu ke fakaheke a ia ko e Atua moli tokotaha maka.—Sala. 86:8-10.
2, 3. Maeke fefe he fakatokatokaaga mitaki ke aoga katoatoa ki a tautolu?
2 Lata e Fakatokatokaaga Mitaki: Ke moua katoatoa e tautolu e aoga mai he galue fakaagaga kua fofola mai e Iehova, kua aoga lahi e fakatokatokaaga mitaki. (Efe 5:15, 16) Kua oti nakai e tau fakatokatokaaga hau ke lata mo e mena ke nofo ai, puhala ke finatu ai, mo e ke nakai gahua po ke nakai fano he aoga? Ua toka e tau mena aoga lahi nei ke he magaaho fakahiku. Ka fakamule a koe ke ole ma e taha magaaho ke nakai gahua, to liga fai vala a koe ka nakai moua mai he magaaho fiafia nei. Lata ia tautolu oti ke fakalataha ke he tau lauga oti.
3 Taute e foliaga ma hau ke hoko tuai ke he matakavi he fonoaga he tau aho takitaha. To lagomatai he mena nei a koe ke nofo he nofoa hau ato kamata e lologo hafagi mo e lagomatai a koe ke fakatotoka e loto ke moua e tau fakamatalaaga ka fakatoka mai. To hafagi e tau gutuhala he 8:00 a.m. he tau aho takitaha. Fakamolemole ua toka e tau nofoa ma lautolu ne nakai ko e magafaoa tata hau po ke nakai fakatauo he taha e motoka.
4. Ko e ha ne ole ai ki a tautolu oti ke tamai e tau kai la ha tautolu ke he fonoaga?
4 Kua ole atu ke he tau tagata oti ke tamai e tau kai la ka e ua toka e matakavi he fonoaga ke o atu ke kumi kai he magaaho okioki kai la. Ko e kaufakalataha ha mutolu ke he fakatokatokaaga nei ka lafi ke he tuaga mafola mo e lahi e magaaho ka fakaata ke lafi mo e tau matakainaga he tua. (Sala. 133:1-3) Fakamolemole manatu na nakai fakaata e tau lupo kalase mo e tau kava ke he tau matakavi he fonoaga.
5. Kamata fefe a tautolu ke tauteute e tau loto ha tautolu ma e fonoaga?
5 Fanogonogo mo e Ako: Ne liogi a Esera he tauteute e loto hana ke moua e kupu he Atua. (Esera 7:10) Ne hihiga e hana loto ke he tau fakaakoaga ha Iehova. (Fakatai 2:2) Maeke ia tautolu ke kamata tauteute e tau loto ha tautolu ato toka e tau kaina he manamanatu ke he matapatu he fonoaga mo e tutala ki ai mo e magafaoa ha tautolu.
6. Ko e heigoa ka lagomatai a tautolu ke tumau e fanogonogo ke he fakaholoaga? (Kikite e puha.)
6 Ke he fale tolo ne lahi, to loga e tau mena ke onoono mo e fakateliga ki ai ka liga ke fofo e fanogonogoaga ha tautolu. Mukamuka e tau fakatauhele pihia ke fuluhi kehe e tau manamanatuaga ha tautolu mai he tagata lauga. Ka tupu e mena ia, to nakai moua e tau manatu uho. Ko e tau manatu fakakite he puha he vala nei ka lagomatai a tautolu ke fakatupu ki mua e fanogonogoaga ha tautolu.
7, 8. Maeke fefe ia tautolu ke fakakite e manamanatu ke he falu, mo e ko e heigoa e foakiaga kua tuku mai ma lautolu ne ukauka ke logona?
7 Fakakite e Manamanatu ke he Falu: Maeke ke fakaaoga e tau pokiata mo e tau pokiata vitio he fakaholoaga, ka e ke kalo mai he fakatauhele e falu, kia poki mai ni he nofoaga hau. Ko e tau telefoni uta fano mo e tau fakahoko fekau kua lata ke fakatoka ke nakai fakatauhele e falu. Ke aoga ki a lautolu ne ukauka ke logona, to fakapuloa e fakaholoaga ke he letio FM ke he takatakai ia he tau fonoaga lalahi oti. To fakailoa e tau vala tala kua lata ma e tauteaga nei he kamataaga he fakaholoaga. Tamai ni e koe e tama letio FM hau mo e tau mena fanogonogo teliga. Nakai fai koloa fakatagata ka tutaki ke he hila po ke fakaholoaga leo fakatagi he matakavi he fonoaga.
8 Kua amaamanaki lahi a tautolu ke fakapotopoto auloa ke fakaheke a Iehova! Kia mauokafua a tautolu ke fakaheke a ia he hohoko atu ke he tau vala oti, he fanogonogo fakalahi, mo e he fakagahua e tau mena ne ako e tautolu.—Teu. 31:12.
[Puha he lau 3]
Fanogonogo he Tau Fonoaga
▪ Manamanatu ke he mataulu he tau lauga
▪ Kumi e tau kupu tohiaga tapu
▪ Tohi hifo fakaku e tau manatu
▪ Fakamahao e tau vala ke fakagahua
▪ Liu fakamanatu e tau mena hau ne ako