Tau Fonoaga Fahimotu he “Kupu Fakaperofeta he Atua” he 1999
1 He tata lahi mahaki e tau Isaraela ke huhu atu ke he Motu he Maveheaga, ne fakalagalaga e Mose a lautolu ke loto fakaaue ke he tau hatakiaga he Atua. Ne tala age a ia ki a lautolu: “Ko e mena nakai ko e kupu fakateaga ia kia mutolu, nukua ha i ai ha mutolu a moui.” (Teu. 32:45-47) Nakai kia loto fakaaue a tautolu ki a Iehova kua uho lahi e tau momoui ha tautolu ki a ia ti matutaki a ia ke takitaki a tautolu he puhala he hana Kupu mua ue atu? Ko e mena ia kua fakamakai lahi a tautolu ke he tolu e aho he Fonoaga Fahimotu he “Kupu Fakaperofeta he Atua” mo e mena kua fakatoka e Iehova mai mua ma tautolu.
2 He tau nei, ko e tau fonoaga fahimotu kua fakatoka ai ke he fa e taone i Niu Silani. Kehe mai he faka-Peritania mo e faka-Samoa, to taute ai foki e fakaholoaga he fonoaga ke he Vagahau Matalima ma lautolu ne kuhukuhu.
3 Nakai fakauaua ai kua fita a koe he taute e tau fakatokaaga ke fina atu ke he tau aho takitaha he fonoaga ha kua talitonu a koe kua amanaki a Iehova ke fakalataha atu a koe ki ai. Kia mafanatia kua kitia e ia e tau laliaga mo e tau poa he tagata ne taute he tau fekafekau hana ke maeke ke hoko atu, ti manatu ai e ia mo e loto fakaaue. (Hepe. 6:10) He fina atu ke he tau aho takitaha he fonoaga mai he lologo hafagi ke he liogi fakaoti, kua fakatata e tautolu ki a Iehova kua uho hana kupu ki a tautolu. (Teu. 4:10) Fakakite foki e tautolu e loto fakaaue ma e gahua malolo he tau matakainaga tokologa ha tautolu ne putoia he tauteuteaga ma e fonoaga.
4 Ko e fakatokatoka ma e tau tagata tokoafe he Atua ke fakapotopoto ke he matakavi he fonoaga takitaha kua lata mo e pulega tuai mo e fakatokatokaaga mitaki. He iloa ai ko e tau fakatokaaga he fonoaga kua tauteute fakaalofa ai kua omoi a tautolu ke kaufakalataha, ke “eke e tau mena oti mo e fulufuluola mo e taute fakamitaki.” (1 Kori. 14:40) Ko e tau vala tala mo e tau fakamanatuaga nai kua foaki ke maeke ia koe ke hoko atu ke he fonoaga hau mo e mautauteute katoa ke olioli e tau mena kai fakaagaga mo e feoakiaga Kerisiano.
Ato Hoko e Fonoaga
5 Ki a hai ni a lautolu kua fakaako Tohi Tapu mo koe mo e falu tagata fiafia foki kua lata ke lagomatai he taute e tau fakatokatokaaga fakatagata ke hohoko atu ke he fonoaga? Ko e mena kua logona mo e kitia e lautolu i ai kua maeke ke omoi a lautolu ke eke mo tau tagata tapuaki a Iehova. (1 Kori. 14:25) Kua lata e tau motua ke mataala ke he ha tagata kua lata lagomatai ke he mena ke nofo ai po ke puhala, mua atu ki a lautolu kua momotua he fakapotopotoaga, mo e kitia fakamitaki kua maeke ke lagomatai atu ki a lautolu.—Kala. 6:10.
6 Kua mau maopoopo nakai e tau fakatokaaga hau ma e mena ke nofo ai? Kaeke ke nofo he motela, kua fakafano atu nakai e taha tupe hau ke toka aki e motela ti kua moua nakai e koe e risiti (receipt) ma e tupe ne fakafano atu? He mogonei, ko e ha laupepa fakapuke Special Needs Room Request kua talia he Komiti Fekafekau he Fakapotopotoaga kua lata ke fita e fakahu atu ke he kaina he fonoaga kua latatonu he taute he tohikupu he fakapotopotoaga. Ka foaki ki a koe e mena ke nofo ai i lalo hifo he fakatokaaga manako pauaki mo e kua lata ia koe ke nakai fakaaoga ai, fakamolemole kia fakailoa fakamafiti atu ke he Rooming Department he matakavi ke maeke e tau mena nonofo ia ke liu fakatokatoka foki. Moua e kaina i tua he laupepa Special Needs Room Request.
7 Ka manako a koe ke he vala tala hagaao ke he fonoaga, ko e tohikupu he fakapotopotoaga ka foaki atu ki a koe e kaina he matakavi pauaki, i tua he laupepa fakapuke Special Needs Room Request. Kia nakai telefoni po ke tohi ke he takitaki he matakavi ka fono ai.
8 Ha ko e Fahi Lagomatai Matematekelea he fonoaga kua fakatu pauaki ni ke lata mo e tau tuaga tu fakaofo, kua fakamafana atu e mautolu ki a koe ke ta mai ni e koe e tegavai, tau ufiufi matamotu, tau pamu, tau lagomatai manava, mo e tau mena pihia ke he fonoaga kaeke kua manatu a koe kua lata. Kaeke ko koe po ke fakahele kua matematekelea pihia, tuga e kelea e ate, gagao suka, po ke taufetului mo e tau matematekelea lahi pihia, fakamolemole ta mai e tau levekiaga fakaekekafo kua lata ke he fonoaga ke leveki ke he tuaga nei tuga ni he nofo a koe i kaina po ke fano evaeva. Kua pulotu ma e tagata he magafaoa po ke kapitiga tata kua maama e tuaga ke fakalataha tumau mo e tagata matematekelea, ha ko ia ni kua tutonu ke foaki e lagomataiaga kua lata.
9 Ko e tau magaaho ke taute e fakamatala nakai mau pauaki ka liga tutupu ka fina atu ki ai mo e liu mai he fonoaga. Mau amaamanaki nakai a koe ke tauteute ke talahau e kupu moli ke he falu? Ko tautolu oti, fakalataha mo e tau fanau ikiiki, kua putoia he foaki e tau tuleke ke he tau tagata utu penisini, mo e falu kua feleveia mo koe he fenoga. To tutonu e tau magaaho ke foaki e tau mekasini, tau porosua, po ke falu tohi mo lautolu kua fiafia. Kia mautauteute ke fakamatala nakai mautali pauaki ke he tau tagata ne liga nakai moua he tau magaaho ka o atu ke fakamatala.
He Fonoaga
10 To hafagi e tau hala he matakavi fonoaga he 8:00 a.m. he tau aho takitaha. Kia toka e koe e tau nofoa ke lata ni mo e magafaoa tata hau po ko lautolu ne heke he motoka hau. To toka ai e tau nofoa kua mukamuka ma e tau matakainaga momotua, mo e taha fahi pauaki ma lautolu kua kulikuli mo lautolu kua fakaaoga he nofoa fakataveli. Kua nakai maeke ke toka pauaki taha poko he fonoaga ma lautolu kua moua he tau allergy. He tau aho takitaha he toka e koe e mena kua nofo ai a koe, fakamolemole kia fakakia ke kitia moli kua uta oti e tau koloa hau.
11 Ke maeke ke fakapotopoto ke he numera lahi ma e tau fonoaga fahimotu ha tautolu, kua lata ia tautolu ke mailoga e tau matafakatufono, tau matafakatufono afi, mo e falu puhala haohao mitaki he matakavi. Ko e mena ia, ko e tau peleo tama mo e tau nofoa nofo fafo kua nakai lata ke ta mai ki loto he fonoaga. Ko e tau mena hagahaga kelea anei ke fakaapiapi aki e tau mena o hui po ke vahaloto he tau atu nofoa ti veveli ai. Pete ia, kua fakaata e tau nofoa motoka tama ka hao he nofoa he tapa ke he tau mamatua mo e pipi ai ki ai.
12 Amaamanaki kia a koe ke papatiso he fonoaga fahimotu? Ma e fakaholoaga he pogipogi Faiumu, ha ha i ai e tau nofoa ka toka ma lautolu ka papatiso, mo e to takitaki atu he tau tagata leveki a koe ke he matakavi nei. Ka maeke, fakamolemole kia nonofo i ai ato kamata e fakaholoaga. Ta mai hau a Tohi Tapu, tohi lologo, tauela, mo e mena tui koukou kua gali. Ko e tau mena tui helehele fakakuku, tau miti ne tu fakatino, mo e tau taute pihia kua nakai latatonu ma e magaaho lilifu ia. Ka liu fakamanatu he tau motua e tau huhu he tohi Our Ministry mo e tau tagata ka papatiso kua lata ke iloa moli kua maama e lautolu takitaha e tau manatu nei. Ha ko e papatisoaga ko e fakamailoga he tukuleleaga fakatagata ki a Iehova ko e Atua, kua nakai lata tonu ma e tau tagata papatiso ke tui lima ka papatiso.
13 Maeke ia koe ke fakaaoga e tau pokiata, tau pokiata vitio, mo e tau tapaki autiokasete ke he fonoaga. Pete ia, ko e tuaga po ke fakaaoga ha lautolu kua nakai lata ke fakalavelave e hala, po ke onoonoaga he falu, po ke fakatauhele e fanogonogoaga ke he polokalama. Kua lata ke ta mai katoatoa—he nakai matutaki ai ke he fakatokaaga hila po ke tau leo.
14 Ha kua tupu lahi e fakaaoga he tau telefoni mo e tau fakahoko fekau, fakamolemole kia fakaeneene ko e tau talagaaga nei kua nakai fakalavelave e fanogonogoaga hau ke he polokalama po ke falu kua nonofo viko ia koe. Kua nakai lata ke fakaata e tau talagaaga nei ke tagi fakalahi he nofo a koe he toloaga. Kaeke kua lata ia koe ke fakaaoga e telefoni ka e fono agaia, fakamolemole taute i fafo he fale fono.
15 He fakaaoga e magaaho mo e fakamukamuka, kua ole atu e Sosaiete ki a tautolu ke ta mai ni e tautolu e tau mena kai la ha tautolu ke he fonoaga he tau aho takitaha. Tokologa e tau matakainaga kua muitua ke he takitakiaga nei mo e kua moua ai he mole e mavehevehe ma e okioki pale la, maeke ia lautolu ke nonofo mo e tau magafaoa ha lautolu mo e kai fakalataha e tau mena ne ta mai e lautolu ma e aho. Tokologa kua talahau ko e magaaho ke okioki he pale la mo e fakaaoga e taha magaaho mo e tau matakainaga ha lautolu kua olioli moli. Kua lata e mena nei mogoia he fakatau tuai e tau mena kai mo e tau mena inu ti fafao ai ke he puha tuku kai tote kua hao i lalo he nofoa. Kua ole atu a mautolu ke he tau tagata oti ke muitua e hatakiaga nei mo e amanaki ke ta mai ni ha mutolu a tau mena kai mo e tau mena inu ke he fonoaga he tau aho takitaha. Ko lautolu kua fiafia ne o mai mo koe ke he fonoaga kua lata ke ta mai foki ni e lautolu ha lautolu a tau mena kai. Nakai fakaata e tau lupo hio mo e tau kava ke ta mai ke he mena ne fono ai.
16 Maeke nakai ia koe ke gahua foaki noa he lagomatai ke fakamea e matakavi fono ka oti e tau fakaholoaga he tau aho takitaha? Po ke gahua a koe ke he falu fahi gahua he fonoaga? Kaeke ke lagomatai mai a koe, fakamolemole hokotia atu ke he Volunteer Service Department he fonoaga. Ko e tau fanau 16 e tau ki lalo kua uiina atu ke gahua fakalataha mo e matua po ke taha tagata lahi lotomatala. Moli, maeke he tau tagata oti ke lagomatai ke fakamea e matakavi fono he lagalagaki e tau veve kua kitia mo e tuku fakamitaki ai ke he puha veve.
17 Kua moua e tautolu e tau puipuiaga mitaki ke he puhala kua lata ma e tau tapulu mo e tauteuteaga kua gali he tau fonoaga ha tautolu. Ma e fakatai: Ha ha ia tautolu e takitakiaga ke he mena nei he tau uho he Ha Tautolu a Fekafekauaga he Kautu, ha ha ia tautolu e tau fakataiaga mo e tau fakatino he tau tohi ha tautolu, mo e mua atu e aoga, ha ha ia tautolu e kupu ha Iehova he Tohi Tapu. (Roma 12:2; 1 Timo. 2:9, 10) Iloa he tau tagata ko hai a tautolu mo e ko e ha kua fakapotopoto ai a tautolu ke he taone ha lautolu. Ti, ko e tau tapulu mo e tau tauteuteaga ha tautolu ko e fakamatala malolo hokoia a ia. Ko e tokologa he tau tagata a Iehova kua fakatoka e fakafifitakiaga mitaki ke he fahi nei. Fa mahani ai, kitia e tautolu e agaga he lalolagi ne fakaata ke he tau tapulu mo e tau tauteuteaga he falu kua o mai ke he tau fonoaga ha tautolu. Ko e fakatata he tau mena tui kehekehe kua ta mai e fakauaua ki a ia kua talahau ke eke mo tagata fakaagaga. Ko e foliga kua gali, mea, mo e maopoopo kua mua atu. Kua lata e tau ulu he magafaoa, mogoia, ke mailoga e tau mena ne amanaki e tau tagata he magafaoa ha lautolu ke tui. To lauia foki e mena nei ka o kehe mai a tautolu he matakavi fono. Ko e tau e tau pine fakamailoga ha tautolu ato mo e fakaoti e fakaholoaga he aho kua fakakite ai a tautolu fakalataha mo Iehova mo e hana tau tagata mea.—Fakatatai Mareko 8:38.
18 Ne omoomoi e patuiki pulotu ko Solomona ke manamanatu kua “lili ai e goagoa ke he loto he tama” ti “ko e tama kua toka noa kua fakamā ai e ia hana matua fifine.” (Fakatai 22:15; 29:15) Ha kua fakalago e tau mamatua ki a Iehova ma e tau mahani he tau fanau ha lautolu, kua mauokafua e matua fifine po ke matua tane kua mahani mitaki mo e fanogonogo e tau fanau ke he tau fakaakoaga a Iehova kaeke ni ke nonofo fakalataha e tau fanau ha lautolu mo lautolu. To hokotia atu e tau tagata leveki ki a ia kua fakatupu e miha mo e ole ke oti e gahua ia, fakamanatu totonu ki a lautolu ke fanogonogo ke he fakaholoaga.
19 Ha kua uiina e tautolu e tau tagata ke he fonoaga ha tautolu, kua pulotu ke mataala hagaao ke he tau fanau mo e tau koloa fakatagata. Ko e tau fanau ha tautolu ko e koloa uho mai ia Iehova. Ka e iloa e tautolu ko e lalolagi kua fakaata e tau eke lagatau ha Satani. Ti, fakamolemole iloa ko fe e tau fanau hau he tau magaaho oti. Pihia foki, kia uta ni e koe hau a tau pokiata, tau kato, mo e falu koloa uho hau mo koe he tau magaaho oti ua toka he nofoa hau. Kia mailoga kua loka e motoka hau, ti tuku e tau koloa fakatagata he pusi po ke uta ai mo koe. Kua fakatote hifo he mena nei e kamatamata ma e taha tagata ke moumou e motoka hau.
20 Matutaki ai mo e mena ke nonofo ai, fakamolemole mailoga e tau mena nai:
▪ Ha kua tokologa e tau tagata a Iehova kua nonofo he tau motela, to nakai maeke he tau tagata oti ke moua e tau poko ne nakai ula, pete foki ka ole e koe e mena nei ka taute e fakamau hifo hau.
▪ Fakamolemole mailoga e tau magaaho ka hohoko atu mo e ka toka ai e motela ka nofo ai a koe. Ka ole tuai, kua talia he tau motela e aahi atu tuai po ke mule e o kehe mai ai.
▪ Kua ha ha ai e tau televisoni mo e tau vitio he tau motela kua maeke ke fakakite e tau polokalama nakai mitaki. Tuga he kaina, fakamolemole leveki e fanau hau he fakaaoga e televisoni.
21 Kua fakamalolo he kitia e tau matakainaga hane fakamau hifo e tau fakaholoaga he fonoaga. Ko e tau manatu kuku ka lagomatai a koe ke hagaaki mo e manatu e tau matapatu manatu. Liu ai kikite e tau fakamauaga hau he magaaho fakamui mo e magafaoa mo e tau kapitiga kua fakaata a koe ke manamanatu hokulo ke he tau fakamaamaaga he fonoaga ke nakai nimo ai.
22 Kua fakamokoi tumau e tau tagata a Iehova he foaki ke he tau mena fakateokarasi. (Esoto 36:5-7; 2 Nofo. 31:10; Roma 15:26, 27) Ko e tau mena fakaalofa foaki noa hau ke he gahua he lalolagi katoa kua fakaaoga ai ke totogi aki e tau fakamoleaga he matakavi fono ne kua fakahoko ai e tau fonoaga. Ka taute e mena fakaalofa hau he sieke, fakamolemole kua lata ke fakaata e totogi atu ke he “Watch Tower Society.”
23 He fakamau he Amosa 3:7, ne pehe ‘to nakai eke e Iehova ha mena, ka e fakakite ai e ia hana finagalo ke he hana tau fekafekau ko e tau perofeta.’ Ha ko e ‘Atua ne fakakite mai e tau mena galo,’ ne kua fita he fakamau e Iehova totou teau e tau perofetaaga kua hakotika mo e kua fakamoli katoatoa ai. (Tani. 2:28, 47) Ko e tau maveheaga mua ue atu kua nakai la fakahoko ia. Ko e Tau Fonoaga Fahimotu he “Kupu Fakaperofeta he Atua” he 1999 to fakamalolo e tua hau he tau maveheaga he Atua. Fanogonogo fakatonu ai ke he kupu ha Iehova ma hau. Fakagahua e mena ka kitia mo e logona e koe—he fekafekauaga, he fakapotopotoaga, mo e he moui fakatagata hau. Liogi a tautolu ma e fakamonuina lahi ha Iehova ke lata mo e tau fakatokaaga hau ke fina atu ke he galue fakaagaga lahi nei he tau aho takitaha!
[Blurb he lau 9]
Pulega ke fina atu aho katoa he Aho Faraile, Aho Faiumu, mo e Aho Tapu!