Gahua Kia a Koe mo e Fai Kakano?
1 Ko Iehova ko e Atua he finagalo. (Isa 55:10, 11) Kua fakamafana ki a tautolu ke fifitaki a ia. (Efeso 5:1) Kua kitia moli e mena nei ke he puhala ne kua taute e tautolu e fekafekauaga ha tautolu. Ti kua latatonu e huhu: “Gahua kia a koe mo e fai kakano?”
2 Ko e fakamatala hau he taha gutuhala ke he taha gutuhala, fakamatala nakai mau amaamanaki, mo e foaki e tau tohi ko e tau vala oti he fekafekauaga fai kakano. Ka e manatu ko e poakiaga ha tautolu kua nakai ni putoia e fakamatala ka e pihia foki e taute tutaki. (Mata. 28:19, 20) He mole e gana e tau tega he kupu moli he Kautu, kua lata ia tautolu ke liliu atu ke fakamalu ai mo e leveki tumau he ono atu a tautolu ki a Iehova ke fakatupu ai. (1 Kori. 3:6) Kua lata ia tautolu ke fakamakutukutu he taute e tau liu ahi atu mo e kamata e tau fakaako Tohi Tapu.
3 Fakalaulahi Atu Hau a Fekafekauaga: Fai logonaaga mitaki tumau ka liu a koe ono ki tua ke he mena ne taute e koe he fekafekauga mo e pehe hifo ki a koe ni: “Ne fakakatoatoa e au e mena ne fakatoka e au ke taute.” He fakamau he 2 Timoteo 4:5, ne fakamafana e Paulo: “Kia fakakatoatoa ni hāu a feua.” Putoia ai foki e fakalaulahi atu he hau a tau laliaga ke liu ahi atu a lautolu kua fiafia. He setulu fekafekau fakafahi tapu hau, pulega e magaaho tonu ke taute e tau liu ahi atu. Gahua atu ke he foliaga he lali ke kamata e tau fakaako Tohi Tapu mo lautolu kua hagahaga ke tututonu. Ko e kakano hau hanei kua lata ka fakalataha a koe ke he fekafekauaga.
4 Huhu ko e fefe e logonaaga he tau tagata fakailoa ka kitia ha lautolu a tau tagata fakaako Tohi Tapu kua papatiso he toloaga. Liga mua atu e olioli ha lautolu tuga a lautolu ne papatiso. Ne fakakatoatoa e lautolu e matagahua mua ue atu ha lautolu! Taha e tagata taute tutaki ne fakakite ai pehenei: “Ko e taute tutaki kua kakano ke fakatokologa atu foki e tau tagata fakaheke ha Iehova. Kakano ko e moui ma lautolu kua talia e kupu moli. Kua fiafia lahi au ke fakaako e kupu moli ke he falu—kua lahi ha e fulufuluola! . . . Tokologa ia lautolu kua o mai ke ofania a Iehova kua eke mo tau kapitiga uho haku.”
5 Manamanatu la he maeke ke lagomatai e tagata ke eke mo fekafekau tukulele ha Iehova! Kua tupu ai e olioli! Ti moua mai ni e tau fua pihia he gahua mo e fai kakano ke he fekafekauaga.—Kolo. 4:17.