Manako​—Ke Loga e Tau Fakaako Tohi Tapu

¹ Kua fakamonuina he Atua ko Iehova hana a fakatokatokaaga he lalolagi ke tumau e tupu ki mua. Ko e tau he fekafekauaga kua mole, 375,923 ne papatiso he lalolagi katoa​—ko e avelesi molea e 1,000 he tau tutaki fou he taha e aho, po ke kavi ke 43 he tau tula takitaha! Pete ni kua totou hogofulu tau e tau mena uka ne fehagai mo e tau matakainaga ha tautolu he tau fahi kehekehe he lalolagi, kua kitia ai ke tupuolamoui mo e mua atu e tupu he gahua he Kautu. Ko e fiafia lahi ha ia ke totou hagaao ke he tupuaga he folafolaaga he tala mitaki!

² He la i Niu Silani he tau he fekafekauaga kua mole, ne kitia foki e tautolu e tupu ki mua he tau paionia fakaku, ke he tau tula he fakamatala, mo e ke he numera he tau tohi ikiiki, tau porosua, mo e tau mekasini ne foaki. Ko e tapunu mua eu atu ke he fakalatahaaga he Fakamanatuaga. Ka e kua e gahua liu ahi atu mo e fakaako Tohi Tapu? Ne tupu ki mua a tautolu ke he liu ahi atu, ti lahi e nava atu. Pete ia, ke he magaaho taha ne to hifo e tau fakako Tohi Tapu ke 15 e pasene. Ka ko e kakano hanei he fekafekauaga ke lata mo e gahua taute tutaki. Ko e heigoa ha tautolu takitokotaha ke taute ke lagaki hake e puhala nei he taute e tau fakaako Tohi Tapu?

³ Fakamalolo e Manako ke Taute e Fakaakoaga: Kua lata ia tautolu ke hagaaki ke malolo mo e hakahakau fakaagaga. Ko e tau tutaki moli he Keriso kua “fakamakutu ke he tau gahua mitaki.” (Tito 2:14) Ka liu a tautolu ke manamanatu ke he fekafekauaga ha tautolu, to talahau nakai a tautolu kua makai lahi a tautolu ke liu fakakia e tau tohi ne toka he fonua? Kua fakamakamaka nakai a tautolu ke foaki e tau fakaako Tohi Tapu he kaina ki a lautolu oti kua fakakite e fiafia? (Roma 12:11) Po ke kua lata kia a tautolu ke fakatupu e manako lahi ke taute e tau liu ahi atu mo e kamata e tau fakaako Tohi Tapu he kaina?

⁴ To fakatumau he totou Tohi Tapu fakatagata, fakalataha tumau ke he feleveiaaga, mo e fakaako ke he tau tohi a tautolu ke moui fakaagaga mo e fakamalolo ha ko e agaga he Atua. (Efeso 3:16-19) To fakamalolo he mena nei e tua mo e mauokafua ha tautolu ki a Iehova mo e fakaalofa ke he tau katofia ha tautolu. To omoomoi a tautolu ke fakaako e kupu moli ke he falu, he taute e fekafekauaga ha tautolu ke fiafia, kautu, mo e fakaohooho. E, kua manako a tautolu ke loga e tau fakaakoaga Tohi Tapu!

⁵ Fakaako Fakamua mo e Magafaoa: Ko e tau matua Kerisiano kua ha ha ai e tau fanau kua nonofo he kaina kua lata he manamanatu ke he fakaholoaga ha lautolu he fakatumau e fakaakoaga Tohi Tapu fakamagafaoa. (Teu. 31:12; Sala. 148:12, 13; Fakatai 22:6) Kua aoga lahi ma e tau matua ke fakaako e porosua Manako ti holo ke he tohi Iloilo mo e tau fanau ke tauteute a lautolu ke lata mo tau tagata fakailoa kua nakai la papatiso ti tukulele ai mo e papaptiso. Moli ia, ko e tau tohi lafi ki ai kua liga ke manamanatu, falanaki ni ke he lata mo e tau he tama. Ko e matua kua fakaako mo e tama nakai la papatiso ke totou e fakaakoaga, tula, mo e liu ahi atu, tuga he fakatoka mai he Puha Huhu he Our Kingdom Ministry ia Me 1987.

⁶ Fakatupu ki Mua e Fakatokatokaaga Fakatagata: Manamanatu ke he numera he tau mekasini, tau porosua, mo e tau tohi ne toka, nakai fakauaua ko e loga e tega kua gana fano. Ko e tau tega nei he kupu moli ne kua gana kua lahi ue atu e amaamanakiaga ke moua mai e tau tutaki fou. Ka kua makona moli kia e tagata gahua fonua po ke katene kaeke ke fakatumau a ia ke to mo e he tau laliaga oti hana, nakai fai fua ne moua mai ai? Nakai pihia. Ti pihia foki e lata he liu ahi atu ke he fekafekauaga.

⁷ Fakatoka tumau nakai e tau magaaho hau ke taute e tau liu ahi atu? Liu atu fakamafiti ka kitia e fiafia. Taute e liu ahi atu mo e foliaga ke kamata e fakaako Tohi Tapu. Ha ha i ai nakai e fakamauaga mitaki, fou, mo e maopoopo he hau a tau liu ahi atu? Fakalataha mo e higoa mo e kaina he tagata, kia manatu ke fakamau e aho ne fina atu fakamua, mo e tau foakiaga, mo e fakamauaga ku ke he mena kua fakatutala ki ai, mo e manatu ke fakatupu ki mua he liu atu ka hau. Toka taha maaga he fakamauaga hau ma e falu vala tala he mole e tau liu ahi atu takitaha.

⁸ Kumikumi e Puhala ke Liu Ahi Atu: Ko e heigoa falu manatu ke tokaloto ka taute e tau liu ahi atu ke he tagata fiafia? (1) Kia mafanatia, kapitiga, fakamakai, mo e nakai mao niniva. (2) Fakatutala e tau matakupu po ke tau huhu kua fiafia a ia ki ai. (3) Kia fakamukamuka e fakatutalaaga mo e fakave ke he Tohi Tapu. (4) Ke he tau liu ahi atu, amanaki ke fakaako ke he tagata he kaina taha mena ke mailoga e ia kua fai aoga ki a ia. (5) Kia ati hake e fakaveaga he vala tala ka fakatutala ke he ahi mai ka hau. (6) Ua nofo leva. (7) Ua huhu e tau huhu ne fakama aki e tagata he kaina po ke fakalauia a ia. (8) Fakalototmatala ke nakai talahau e tau manatu hehe po ke tau aga kelea he tagata he kaina ato feaki e fakaaueaga ke he tau mena fakaagaaga.​—Kikite e uho he Our Kingdom Ministry, Mati 1997, ma e falu lagomatai ke he puhala ke kautu he taute e tau liu ahi atu mo e kamata e tau fakaako Tohi Tapu.

⁹ Kumikumi e Tau Puhala Kehekehe kua Lata: He taha fakapotopotoaga, kua maeke ke moua e tau higoa mo e tau numera he tau poko he tau tagata he fale kua tokoluga lahi e puipuiaga. Ne igatia ni e tagata kua nofo ai mo e moua e tohi, mo e ua e tuleke ne tuku i loto. He fakaotiaga he tohi, ne foaki ai e fakaako Tohi Tapu mo e tohi foki e numera telefoni ke maeke he tagata ka moua e tohi ke tali atu. Ke he tau aho gahoa, ne hea e tagata tane fuata ke ole ke fakaako. Ne taute ai e liu ahi atu he aho hake, mo e kamata e fakako ke he tohi Iloilo. Ke he po taha ia ne fina atu a ia ke he Fakaako Tohi he Fakapotopotoaga, ti fakatumau a ia ke fina atu ke he tau feleveiaaga oti. Teitei mafiti, ne kamata a ia ke totou tumau e Tohi Tapu mo e mauokafua e tupu ki mua hana ke he papatisoaga.

¹⁰ Ne fakatokatoka he tua tagata fakailoa he taha motoka ke taute auloa e tau liu ahi atu. He mogo ne fano e matakainaga fifine ke he taha liu ahi atu hana, ne nakai nofo e tagata ne fano a ia ki ai, ka e tali he taha fifine fuata e gutuhala, mo e pehe: “Ko e fa e leo au ia koe.” Kua moua he tagata he kaina e tohi Iloilo he magaaho fakamua mai he kapitiga. He magaaho ne o atu e tau matakaianaga fifine ke he gutuhala hana, ne fita e lagaua he totou e ia e tohi ti kua lahi e nava ke he tau vala tala i loto. Ne pehe a ia kua nakai ofo a ia ke kitia e Tau Fakamoli ka o mai ki a ia he aho ia kakano kua liogi a ia ke o mai a lautolu mo e fakaako e Tohi Tapu mo ia. Ne kamata e fakaakoaga, ti kamata a ia ke fina atu ke he tau feleveiaaga he fakapotopotoaga, mo e mafiti lahi e holo ki mua hana.

¹¹ Ko e matakainaga fifine, ne papatiso ke teitei 25 e tau, ne nakai la leva e age e ia e tohi Iloilo ke he matua fifine hana. Ko e tagata fano lotu e matua fifine hana, ne kamata ke totou e tohi. He mole e ua e veveheaga ne totou e ia, ne hea a ia ke he tama fifine hana, ne ofo lahi e tama fifine hana, he pehe: “Manako au ke eke mo Fakamoli a Iehova!” Kua kamata e matua fifine ke fakaako mo e kua papatiso tuai.

¹² Lali e Tau Lagomataiaga Nei: Kua fakaaoga nakai e koe e talahau fakahako ke kamata e tau fakaakoaga? Liga ke talahau fakahako e koe: “Ka manako a koe ma e fakaako Tohi Tapu nakai fai totogi he kaina, maeke ia au ke fakakite ki a koe e puhala ke taute aki ke he tau minuti gahoa. Ka fiafia a koe, to matutaki ai.” Tokologa e tau tagata kua nakai fakauaua ke talia e foakiaga pihia, mo e mautali a lautolu he kitia e fakatataaga he fakaako Tohi Tapu.

¹³ Ke he kamataaga he fakaako, fakakite ke he tagata fakaako e puhala ke tauteute tuai he totou e tau kupu tohi ne tohi ai mo e hihika e tau matapatu kupu he tali e tau huhu ne tohi. Hagaaki ni ke he tau matapatu manatu. Pete ni kua lata ia tautolu ke molulu ke he tau fakaakoaga gahoa fakamua, kua aoga ke taute tumau e fakaako Tohi Tapu. Kia tokaloto e puhala ka talahau e koe ko e liogi ko e vala kua mua atu he fakaakoaga mo e puhala hau ka fakaaoga e Tohi Tapu ke tauteute e tagata fakaako ke he ha totokoaga. Fakakatoatoa ai, kia taute e fakaakoaga ke fiafia!

¹⁴ Moli, nakai ta tatai oti e tupu ki mua he tau tagata fakaako Tohi Tapu. Nakai mafiti falu ke hagahaga fakaagaga tuga e falu po ke mafiti ke hufia e tau mena ne fakaako. Ko e falu kua lavelave lahi mo e nakai maeke ke foaki e magaaho kua lata ke oti e veveheaga katoa he tau fahitapu takitaha. Ti, ke he falu magaaho kua lata ke taute lagaloga e fakaako ke oti e falu veveheaga mo e falu mahina foki ke oti e tohi. He falu magaaho liga ke fakako fakamua e tautolu e porosua Manako ti holo atu ke he tohi Iloilo. Ko e fakakatoatoa he mena nei he fakalataha mai a lautolu ke he tau feleveiaaga he fakapotopotoaga, ka lagomatai e tau tagata fakaako takitaha ke moua e fakaveaga malolo ke he kupu moli.

¹⁵ Mua atu, ke liogi ma e fakaako Tohi Tapu! (1 Ioa. 3:22) Ko e taha palepale kua mua atu ma e Kerisiano he fakaagoa e Iehova ke lagomatai taha tagata ke eke mo tutuaki ha Iesu Keriso. (Gahua 20:35; 1 Kori. 3:6-9; 1 Tesa. 2:8) Ko e magaaho anei ke fakakite e fakamakai lahi he gahua fakaako Tohi Tapu, mauokafua katoatoa ke he fakamonuinaaga lahi a Iehova ke he tau laliaga ha tautolu ke kamata e tau fakaako loga!

[Blurb he lau 3]

Liogi nakai a koe ke kamata e fakaako Tohi Tapu fou?