Takitaki Atu e Tau Liu Ahi Atu ke he Tau Fakaakoaga Tohi Tapu
1. Ko e ha ne aoga lahi ai e liu ahi atu?
1 Ne poaki e Iesu hana tau tutaki ke nakai fakamatala hokoia ka e pihia foki ke “eke e tau motu oti kana mo tutaki, . . . ti fakaako atu a mutolu kia lautolu.” (Mata. 28:19, 20) Kua fakapuloa e tagata fakamatala, ka e lahi atu e gahua he faiaoga. Kua fakaako, fakamaama, mo e foaki e ia e tau fakamoliaga. Taha puhala ne fakaako e tautolu e falu ko e taute e tau liu ahi atu ki a lautolu ne fiafia mo e foliaga ke kamata e tau fakaakoaga Tohi Tapu mo lautolu.
2. Ko hai ha tautolu ka liu ahi atu ki ai?
2 Ko hai hau ka liu ahi atu ki ai? Kia manatu ke liu ahi atu ki a lautolu oti ne talia e tau tohi po ke fai fiafia ne fakakite ke he tala mitaki. Ka fai ne moua e koe kua fiafia he fakamatala ke he matakavi tolo, lali ke moua e kaina po ke numera telefoni he tagata ia ke maeke ke feaki e fiafia ia. Kia moua e onoonoaga mitaki ke kamata e tau fakaakoaga Tohi Tapu. Matutaki ke kumi a lautolu ka talia e foakiaga ke fakaako e Tohi Tapu, ti to liga moua e koe a lautolu ia.—Mata. 10:11.
3, 4. Ko e heigoa ne putoia he taute e tau liu ahi atu lauia mitaki?
3 Fakakite e Fiafia Fakatagata: Ko e tauteuteaga ma e liu ahi atu lauia mitaki kua kamata mai he feleveiaaga fakamua. Ko e tau tagata uta fekau ne kautu ha kua mailoga e lautolu e tau mena ne fiafia e tau tagata he kaina ki ai, ti fakaaoga e lautolu e mena ia mo fakaveaga ke matutaki aki e fakatutalaaga. Kua moua he falu e mitaki ke talahau e huhu he matahiku he ahi atu ke fakaohooho aki e tagata he kaina ke lata mo e magaaho ka liu ke ahi atu ai. Ko e fiafia moli ha tautolu ke he tau tagata ka taute a tautolu ke manamanatu tumau ki a lautolu pete kua fai magaaho he oti e fakatutalaaga, ti fakaohooho a tautolu ke nakai fakamule ke liu ahi atu. Ka maeke, lali ke liu atu he magaaho ne fou agaia e fiafia—liga tatai ni ka taha po ke ua e aho he mole.
4 He taute e liu ahi atu, lali ke matutaki atu e fakatutalaaga fakamua hau. Kia foli ke talahau taha e manatu faka-Tohiaga Tapu atihake he tau magaaho oti, mo e makai ke fanogonogo. Lali ke iloa mitaki e tagata he kaina. Ti ma e tau ahi atu foki i mua, talahau e tau kupu moli he Kupu he Atua ne felauaki mo e tau tupetupe hana.
5. Ko e heigoa e puhala mukamuka ka liga fakaaoga ke kamata aki e tau fakaakoaga Tohi Tapu?
5 Kia Manamanatu Fakaako-Tohi Tapu: Taute e tau liu ahi atu mo e foliaga ke kamata e fakaakoaga Tohi Tapu. Taute fefe e mena nei? Tala age kua manako a koe ke fakatutala e taha manatu aoga mo ia, ti veveu ke he paratafa he tohi Iloilo po ke porosua Manako ne manatu a koe to mahuiga ke he tagata. Totou e paratafa, totou e huhu, ti fakatutala ke he taha po ke ua e kupu tohi ne tu i ai. Maeke ke taute e mena nei he gutuhala he lima ke he hogofulu e minuti. Fakahiku aki he huhu foki e taha huhu mo e taute e tau fakatokaaga ke matutaki e fakatutalaaga he taha magaaho foki.
6. Fakakite fefe e tautolu e loto fakaaue ke he aoga he taute e tau liu ahi atu?
6 Ko e mena aoga lahi ke feaki e tau fiafia oti ne moua e tautolu ke he fekafekauaga ha tautolu. Ko e mena ia, fakatoka kehe e taha magaaho he setulu hau he fahi tapu ke taute e tau liu ahi atu. Ko e taute pihia ka lafi ke he lauia mitaki he fekafekauaga hau mo e tamai e olioli moli.