Mautauteute—Ko e Kei ke he Tau Liu Aahi Atu Lauia Mitaki
1. Puhala fe kua fakalaulahi atu e fekafekauaga Kerisiano he vahā fakamua?
1 Ne fakaako fakamatafeiga e Iesu e tau tutaki haana ke eke mo tau tagata fakamatala lauia mitaki ke he ‘tala mitaki he kautu.’ (Mata. 4:23; 9:35) Ne taute ni e fakamahaniaga i Palesitaina. Ato hake a Iesu ke he lagi, ne fakailoa e ia to fakalaulahi atu e fekafekauaga Kerisiano he “[taute] e tau motu oti kana mo tutaki.”—Mata. 28:19, 20.
2. Ko e heigoa kua putoia he omaoma ke he poakiaga ha Iesu ‘ke taute tutaki’?
2 To putoia ke he gahua ia e liliu aahi ki a lautolu ne fakakite e fiafia ke he tala mitaki he Kautu he Atua mo e fakaako a lautolu ke omaoma ke he tau mena oti ne poaki he Keriso. Ke taute e tau liu aahi atu lauia mitaki pihia, kua lata ia tautolu ke mautauteute mitaki.
3. Pihia foki he fina atu fakamua, liga hafagi fēfē e koe e puhala ma e liu aahi atu?
3 Fakatoka Tuai: Ne eketaha e falu tagata fakailoa ke talahau e hūhū he matahiku he fina atu fakamua ti mavehe ke liu atu mo e fakatutala ke he tali. Ne moua e lautolu ko e hagaaki ke he vala tala he tohi Fakaako he Tohi Tapu he liu aahi atu kua lagomatai a lautolu ke kamata ni mogoia e fakaako Tohi Tapu.
4. Ko e ha kua nakai lata ke leo a tautolu ke moua e tau fufuta mekasini foou ato liu aahi atu?
4 Ha kua taha ni e fufuta mekasini he tau mahina takitaha, ne nakai kakano ke fakatali a tautolu ato moua e fufuta foou to fina atu mogoia. Liga maeke ke fakalagalaga e fiafia he fakatutala ke he vala tala i loto he mekasini ne fitā he moua he tagata.
5. Ko e heigoa e aoga he tokaloto taha fakavēaga?
5 Fai Fakavēaga: Ato liu atu, fakaaoga taha magaaho ke liu kitekite ke he tau fakamauaga haau ti fifili e mena kua manako a koe ke taute. Ma e fakatai, fakatutala ke he manatu he taha tohi ne toka e koe he magaaho kua mole. Po ke toka falu tohi ne hagaao ke he fakatutalaaga kua mole. Ka talahau e koe e hūhū he magaaho fakamua, ko e fakavēaga haau to putoia mooli e tali ke he hūhū ia. Ka fakamaama e kupu tohi ne peehi e manatu ne talahau, eketaha ke totou fakahako mai he Tohi Tapu.
6. Ko e heigoa e foliaga ha tautolu he taute e tau liu aahi atu?
6 Ko e Foliaga ha Tautolu: Mooli, ko e foliaga ha tautolu ke kamata e fakaako Tohi Tapu. Taha e matakainaga taane ne foaki e fakaako Tohi Tapu he liu aahi atu, ka kua nakai talia he tagata taane. Ne liu atu e matakainaga taane mo e tau mekasini foou ti pehē: “He hohoko mai ha mautolu, kua tali e mautolu taha e hūhū ma e tau tagata he aho nei.” He moua e tali he tagata taane, ne totou he matakainaga taane e kupu tohi mo e paratafa ne felauaki ki ai mai he taha tohi ne fakaaoga ma e tau fakaako Tohi Tapu. Ne takitaki atu ai ke fakaako tumau e Tohi Tapu.
7. Lagomatai fēfē he mautauteute mitaki a koe ke kamata e fakaako Tohi Tapu?
7 He fakatoka e magaaho ke mautauteute ma e tau liu aahi atu kua aoga mooli. To tupu ki mua e olioli ha tautolu, ti liga moua ai e kotofaaga ke lagomatai a ia kua “kotofa ke he moui tukulagi.”—Gahua 13:48.