Lagomatai a Lautolu “ne Kotofa”
1. Ko hai ha Iehova hane fakapotopoto mai ki a ia he vaha ha tautolu?
1 Igatia e tagata mo e manatu malolo ne vakavaka ke he hana loto. (Mata. 12:35) Ne tutala e Tohi Tapu ke he tagata ne “faitaua ha he loto hana.” (Sala. 55:21) Falu ko e tau “tagata vale.” (Fakatai 29:22) Ka e ha i ai foki a lautolu ne kua “kotofa ke he moui tukulagi.” (Gahua 13:48) Ke he vaha ha tautolu, hane fakapotopoto mai e Iehova ki a ia a lautolu ne kotofa. (Hakai 2:7) Lagomatai fefe e tautolu a lautolu ke eke mo tau tagata tapuaki ha Iehova?
2. Ko e heigoa ne putoia ke he fakamoliaga he matagahua ha tautolu ke taute tutaki?
2 Liu Atu mo e Loto Manamanatu: Kua aoga lahi ke moua e onoonoaga hako ka taute e tau liu ahi atu ke maeke ia tautolu ke fakamoli ha tautolu a matagahua ke taute tutaki. (Mata. 28:19, 20) Fakamafiti nakai a tautolu ke liu matutaki ke he tau fiafia ia ne moua e tautolu? Liu nakai a tautolu ahi atu ki a lautolu oti ne talia e tau tohi po ke fakakite e fiafia ke he tala mitaki? Fakatumau nakai a tautolu ke lali ke lagomatai a lautolu ke tupu fakaagaga? Ha kua putoia e tau momoui, kua lata ia tautolu ke kumi mo e feaki a lautolu oti kua fiafia ne moua e tautolu.
3. Ko e heigoa ha tautolu kua lata ke taute ka oti e tutala mo e tagata ke he fekafekauaga?
3 He fou agaia ke he manamanatuaga e fakatutalaaga mo e tagata ne fiafia, fakaaoga taha magaaho ke tohi hifo e higoa mo e kaina hana. Tohi hifo e matapatu ne tutala ki ai, ha kupu tohi ne totou, mo e tohi ne toka hifo. Ka mole ia, manatu ke liu atu mafiti.
4. Maeke fefe ia tautolu ke taute e tau liu ahi atu lauia mitaki?
4 Taute e Liu Ahi Atu: Ka taute e koe e liu ahi atu, kua lagomatai lahi ke mafanatia mo e aga kapitiga mo e ke fakakite e fiafia fakatagata moli ke he tagata he kaina. Tuku fakamukamuka e fakatutalaaga mo e tumau ke he faka-Tohiaga Tapu. Tauteute taha matapatu omoomoi he Tohi Tapu ke tutala ki ai, mo e ke he matahiku he ahi atu, talahau e huhu ne maeke ke tali he ahi atu ka hau. Mitaki lahi ke kalo mai he fakafetoko teao ke he tau onoonoaga nakai faka-Tohiaga Tapu ne liga talahau he tagata he kaina. Eketaha ke atihake e tau talahauaga kua fetataiaki a mua ki ai.—Kolo. 4:6.
5. Ko e heigoa e laliaga ne taute he taha paionia, mo e ko e heigoa ne fua mai ai?
5 Ko e taute he tau liu ahi atu kua lata ma e laliaga, ka e makona e tau palepale. Ko e paionia i Sapani ne fakatoka e foliaga ke taute ke loga atu e liu ahi atu he tau mahina takitaha. Ne kamata a ia ke fakamau e tau tagata oti ne feleveia mo ia ke he gahua he taha fale ke he taha fale, ti kavi ke he fitu e aho, ne liu ahi atu a ia ki a lautolu. Ne tauteute fakamatafeiga e ia e tau mena hana ka talahau ti taute hana fekafekauaga mo e falanaki katoatoa ke he fekau ne hahamo e ia. Ke he taha he hana a tau liu ahi atu, ne maeke ia ia ke kamata e fakaakoaga mo e tagata ne pehe: “Ne fuluhi kehe tumau e au a mutolu. Ko e magaaho fakamua laia ne fanogonogo au.” Ko e fakatumau loto fakaalofa he paionia ne tamai e tau fua. He matahiku he mahina ne hokotaki e ia hogofulu e fakaakoaga Tohi Tapu.
6. Ko e ha kua latatonu ia tautolu ke fakatumau ke taute e tau liu ahi atu?
6 Ko e tau tutuaga he tau tagata kua fa hikihiki tumau. (1 Kori. 7:31) Fa mahani ke lagaloga e lali ato liu moua e tagata ne fiafia i kaina. Mai he ha tautolu a loto manamanatu he taute e tau liu ahi atu, maeke ia tautolu ke lagomatai a lautolu kua kotofa ke o mai ke he puhala he moui tukulagi.—Mata. 7:13, 14.