Tau Mamatua—Fakatoka e Fakafifitakiaga Mitaki ma e Fanau ha Mutolu
1 Kua talahau mai he Kupu he Atua ki a tautolu “kua olioli lahi ni e matua tane [mo e matua fifine] he tagata tututonu.” (Fakatai 23:24, 25) Ko e fakamonuina ha ia ma e tau mamatua kua fakatoka e fakafifitakiaga mitaki ma e fanau ha lautolu! Ne pehe e tagata he La Komiti hagaao ke he tau mamatua hana: “Ko e kupu moli e moui katoa ha laua, ti manako au ke eke foki mo moui katoa haku.” Ko e heigoa kua lata ke kitia mai he tau fanau he ha lautolu a tau mamatua?
2 Tau Mahani Mitaki mo e Fakalilifu Hokulo: Ko e kotofaaga he tau mamatua ke to e tau aga ati hake he tau fanau ha lautolu. He fakaako e tau mahani mitaki, nakai ni ke he tau fakaakoaga he tau kupu, ka e pihia ke he kitekiteaga mo e fifitakiaga. Ko e mena ia, ko e heigoa e tau mahani ka fakatata e mutolu? Logona nakai he fanau hau a koe he pehe “tulou,” “fakamolemole,” mo e “fakaaue”? I loto he magafaoa, hokulo nakai e fakalilifu hau ma e falu? Fanogonogo nakai a koe ka vagahau e falu? Fanogonogo nakai a koe ka vagahau e fanau hau ki a koe? Fakakite nakai e tau aga mitaki nei he Fale he Kautu mo e he loto kaina?
3 Malolo Fakaagaga mo e Gahua Fakamakai: Ko e matakainaga ne molea e 50 e tau he fekafekauaga fakatumau ne talahau: “Ko e matua fifine mo e matua tane haku ko e tau fakafifitakiaga homo ue atu he ha laua a loto fakaaue ma e tau feleveiaaga mo e ha laua a fakamakai ke he fekafekauaga.” Fakatata fefe e koe ke he fanau hau na tupetupe a koe hagaao ke he fakatumauaga fakaagaga ha lautolu he magafaoa hau? Taute auloa nakai e mutolu e kupu ma e aho? Taute tumau nakai e fakaako fakamagafaoa ha mutolu? Kitia nakai he fanau hau a koe hane totou e Tohi Tapu mo e tau tohi he Sosaiete? Ko e heigoa ha lautolu kua logona ka liogi a koe ke lata mo e magafaoa? Fa fakalataha nakai a koe he tau fakatutalaaga fakaagaga ati hake mo e fanau hau, tutala ai ke he tau mena aoga hagaao ke he kupu moli mo e he fakapotopotoaga? Makaukau nakai a koe ke fina atu ke he tau feleveiaaga oti mo e fakalataha ke he gahua he fonua ko e magafaoa?
4 Tau mamatua, fakaata e fakafifitakiaga kua fakatoka e mutolu ma e fanau ha mutolu. Kia mitaki lahi mahaki ai, mo e to tanaki ai e lautolu ke he tau momoui katoa ha lautolu. Ko e hoana he leveki faifano, mogonei ha he atu tau 70 a ia, ne pehe: “Fai aoga agaia au mai he fakafifitakiaga mitaki he tau mamatua Kerisiano fakahele haku. Ti ko e liogi fakamakutu haku to fakamoli e au e loto fakaaue katoatoa haku ma e tufaaga nei he fakaaoga fakamitaki ai ke he tau tau oti e ne hau.”