Tau Mahani Mitaki​—Ko e Aga he Tau Tagata Mahani Atua

¹ Lavea e tau mahani mitaki he vaha nei. Ko e ha ne pihia ai? Ha kua fakatepetepe e tau tagata ti fa nimo e lautolu e tau kupu fakalilifu, tuga he talahau “Fakamolemole,” “Fakaaue,” po ke “Tulou.” Ne talahau tuai he Kupu he Atua e tutokolalo he tau mahani he vaha fakahiku nei he talahau ai ko e tau tagata to ‘ofaofa a lautolu ni, to hula noa, to fakatokoluga, to nakai fakaaue, nakai fai fakaalofa, to nakai taofi e tau manako he tino, nakai loto ke he mitaki, to mahani fakahanoa.’ (2 Timo. 3:1-4) Ko e tau aga ia kua fua mai e tau mahani kelea. Ha ko e tau tagata mahani Atua, kua lata e tau Kerisiano ke mataala ke nakai taute e aga nakai fakalilifu he lalolagi nei ke he falu.

² Ko e Heigoa e Tau Mahani? Kua fakamaama e tau mahani mitaki ko e mataala makutu ke he tau logonaaga he falu, ko e iloa ke nonofo mafola mo e falu. Ko e tau vala he tau mahani mitaki ko e fai manamanatuaga, aga mitaki, totonu, aga fakalaulau. Ko e tau aga nei kua puna mai he fakaalofa he taha ma e Atua mo e katofia. (Luka 10:27) Nakai fai totogi, ka e uho ai ke he tau mena oti he fakatolomaki e tau matutakiaga ha tautolu mo e falu.

³ Ne fakatoka e Iesu Keriso e fakafifitakiaga mitaki ue atu. Ne fakagahua tumau e ia e Fakatufono Auro: “Tuga ne loto a mutolu kia eke he tau tagata kia mutolu, kia eke pihia foki e mutolu kia lautolu.” (Luka 6:31) Nakai kia ofoofogia a tautolu ke he mahani fai manamanatu mo e fakaalofa ha Iesu he fehagai mo e hana tau tutaki? (Mata. 11:28-30) Ko e tau mahani mitaki hana ne nakai mai he tau fakatufono ne fakave he tau tohi mai he tau tagata. Ne puna mai ai he loto moli mo e fakamokoi. Kia lali a tautolu ke muitua hana fifitakiaga mitaki.

⁴ Magaaho fe ka lata e tau Kerisiano ma e tau mahani mitaki? He tau magaaho pauaki ni kia, ka kapaletu ke taute e fakakiteaga mitaki? Kua lata ni kia kaeke ke lali a tautolu ke fakalagalaga e falu? Nakai! Kua lata ia tautolu ke fakakite e tau mahani mitaki he tau magaaho oti. Ko e tau puhala pauaki fe kua lata ia tautolu ke manamanatu hagaao ke he mena nei he ha tautolu a feoakiaga mo e falu he fakapotopotoaga?

⁵ He Fale he Kautu: Ko e Fale he Kautu e matakavi ha tautolu he tapuakiaga. Kua uiina e Iehova ko e Atua a tautolu ki ai. He puhala ia, ko e tau tagata uiina a tautolu. (Sala. 15:1) Ko e tau tagata uiina fifitaki mitaki kia a tautolu ka o mai ke he Fale he Kautu? Kua mailoga mitaki nakai e tautolu e tau tapulu mo e tauteuteaga ha tautolu? Kua lata moli a tautolu ke fakamamao mai he tauteute nakai lilifu po ke molea lahi. He fina atu ke he tau fonoaga ha tautolu po ke tau feleveiaaga he fakapotopotoaga he tau fahitapu takitaha, kua mailoga e tau tagata ha Iehova ha ko e ha lautolu a tauteuteaga mitaki kua lata mo e ha lautolu a fakalilifu ke he Atua lilifu. (1 Timo. 2:9, 10) Ti fakakite e tautolu e manamanatuaga kua lata ke fakalilifu ke he Leveki ha tautolu he lagi mo e falu nukua uiina atu foki.

⁶ Ko e taha puhala kua fakakite e tautolu e tau mahani mitaki he matutaki mo e tau feleveiaaga he hohoko atu to kamata. Iloa ai, nakai mukamuka e mena nei. Ko e falu kua nonofo mamao ai po ke lahi e magafaoa ke fakatokatoka. Kua mailoga ke he falu fakapotopotoaga, tokologa ai ke 25 e pasene he tau tagata fakailoa kua mahani mau ke o mai ka oti e lologo hafagi mo e liogi. Ko e mena hagahaga kelea lahi anei. Mitaki ke manatu ko e tau mahani kua fakakite ai e mataala ha tautolu ke he tau logonaaga he falu. Ko Iehova, ko e Leveki fakaalofa totonu, kua fakatoka e tau galue fakaagaga nei ma e aoga ha tautolu. Fakakite e tautolu e loto fakaaue mo e manamanatu ma e hana tau logonaaga hana he hohoko atu tuai. Lafi ki ai, ko e hohoko mule ke he tau feleveiaaga kua fakalavelave mo e fakakite e nakai fakalilifu ma lautolu kua fita i ai.

⁷ Ka fakapotopoto a tautolu, kua mailoga nakai e tautolu a lautolu kua fou he toloaga? He fakafeleveia a lautolu ko e vala he tau mahani. (Mata. 5:47; Roma 15:7) Ko e fakafeleveia totonu, mo e fakaalofa e lima, ko e mamali totonu​—ko e tau mena ikiiki oti ka e lafi atu ke he fakakiteaga ha tautolu ko e tau Kerisiano moli. (Ioane 13:35) He mole e hau fakapa ke he Fale he Kautu, ne pehe e tagata tane: “Ne tokologa e tau tagata fakaalofa moli, ko e tau tagata kehe, ne feleveia mo au he taha e aho, na nakai la feleveia pihia e au he tapu haku ne tupu hake ai. Kua maaliali ai kua moua e au e kupu moli.” Ko e fua, ne hiki e ia hana puhala moui, ti fitu e mahina he mole ti papatiso a ia. E, lahi mahaki e lauiaaga ke he tau mahani mitaki!

⁸ Ka mahani mitaki a tautolu ke he tau tagata kehe kua feleveia mo tautolu, nakai kia pihia atu a tautolu ke he “faoa ne tua”? (Kala. 6:10) Kua aoga e matapatu fakaakoaga: “Kia fakalilifu atu foki ki mua he tagata motua.” (Levi. 19:32) Nakai lata ke tiaki a lautolu ia he tau fakalatahaaga ha tautolu.

⁹ Fanogonogo Fakalahi: He tau feleveiaaga he fakapotopotoaga, ko e tau fekafekau Kerisiano he Atua kua vagahau ke maeke ke folafola falu mena fakaalofa fakaagaga ke atihake a tautolu. (Roma 1:11) To fakatata moli e tau mahani kelea lahi he fahi ha tautolu ka mohe, fakapako e pililole, fanafana tumau ke he tagata he tapa, totou e tohi kehe, po ke taute mena kehe he feleveiaaga. Kua lata e tau motua ke fakatoka e fakafifitakiaga he mena nei. Ko e tau mahani Kerisiano mitaki to omoi a tautolu ke fakakite e fakalilifu mitaki ke he tagata lauga mo e hana ogo ne mai he Tohi Tapu he fanogonogo katoatoa ki a ia.

¹⁰ Lafi atu, mai he manamanatu ke he tagata lauga, mo e toloaga, kua lata ia tautolu ke nakai fakatauhele he tau uta fekau eleketono, mo e tau telefoni e tau feleveiaaga ha tautolu.

¹¹ Tau Mahani mo e Tau Fanau: Kua lata e tau matua ke mataala tumau ke he tau mahani he tau fanau ha lautolu. Ka kamata a ia kua tote ke tagi po ke fakafi he feleveiaaga ti fakatauhele he mena nei e falu, kua mitaki ke uta fakamafiti e tama ki fafo ke fakanana a ia. Kua liga uka e mena nei he falu magaaho, ka e manatu, kua fakakite he mena nei kua mailoga e koe e tau logonaaga he falu. Ko e tau matua kua fai tama ikiiki kua fa fakafi tumau kua fifili ke nonofo i tua ke nakai fakatauhele e tokologa ti mukamuka foki ia lautolu ke mamatike he feleveiaaga. Moli, ko lautolu ne toe he fakapotopotoaga kua fakakite e manamanatuaga ma e tau magafaoa he toka e tau atu i tua ma lautolu ke fakaaoga, ka manako.

¹² Kua lata foki e tau matua ke mataala foki ke he mahani he tama ha lautolu ato kamata mo e ka oti e tau feleveiaaga. Kua nakai lata e tau fanau ke tafepoi i loto, ha kua tupu mai he mena nei e pakia. Ko e tafepoi viko i fafo he Fale he Kautu kua hagahaga kelea foki, mua atu ke he tau afiafi pouli. Ko e tutala lalahi i fafo kua fakatauhele e tau katofia mo e fakakie e fakama ke he ha tautolu a tapuakiaga. Ko e tau mamatua maimaina ke leveki e tau fanau ha lautolu i loto mo fafo he Fale he Kautu kua nava ki ai ha kua lafi e mena nei ke he fulufuluola he fakalataha auloa ha tautolu.​—Sala. 133:1.

¹³ He Fakaakoaga Tohi: Kua loto fakaaue a tautolu ke he fakamokoi he tau matakainaga ha tautolu kua hafagi ha lautolu a kaina ma e tau feleveiaaga he fakapotopotoaga. Ka o atu, kua lata ia tautolu ke fakakite e fakalilifu mo e manamanatu ma e tau kaina ha lautolu. Fakamua to huhu ki fale, kua lata ia tautolu ke fakamea fakamitaki e tau tevae ke nakai takiva e timeni po ke kapete. Lata e tau matua ke leveki e tau fanau ha lautolu, he mailoga kua nonofo a lautolu he lotopa he kaina kua kotofa ma e fakaako tohi. Pete ne liga tote e matakau mo e tokogahoa, nakai lata ia tautolu ke fakahanoa ke he tau kaina he falu. Kua lata e matua he tama tote ke uta a ia ke fakaaoga e fale tote. Lafi atu, ha ko e feleveiaaga he fakapotopotoaga e fakaako tohi, kua lata ke tauteute a tautolu tuga he o ke he Fale he Kautu.

¹⁴ Aoga e Tau Mahani Mitaki: Ko e taute e tau mahani Kerisiano nakai ni fakaata mitaki e fekafekauaga ha tautolu ka e fakatolomaki foki e tau fakafetuiaga mitaki mo e falu. (2 Kori. 6:3, 4, 6) Ko e tau tagata tapuaki he Atua fiafia, kua lata ia tautolu ke mukamuka ke mamali, ke talia, mo e taute e tau mena ikiiki, tau mahani totonu kua ta mai e olioli ke he falu. Ko e tau aga mitaki nei ka fakafulufuluola aki e tau momoui ha tautolu ko e tau tagata mahani Atua.