Fakaako e Fanau Haau ke Fakalilifu

KO E fakatai Sihamani ne pehē: “Mo e pulou he lima, maeke he tagata ke fano he motu katoa.” Ke he loga e aga fakamotu, ko e utakehe e pulou ka finatu ke he kaina he taha po ke ka fakafeleveia, nukua onoono ki ai ko e aga totonu ti moua e ia e fakalilifu. Ti ko e kakano he fakatai ne totoku i luga, kua hihiga e tau tagata ke mua atu e totonu ti fiafia foki ki a lautolu ne mahani mitaki.

Ko e mena fakatotoka mooli ka mahani mitaki e tau fanau! Ko e leveki takaiaga i Honduras ne fakatauō mo e tau tagata fakailoa ne kehekehe e tau tau moui he gahua he taha gutuhala ke he taha gutuhala he gahua fakamatala ne pehē, “Fa mailoga e au ko e tama ne fakaako fakamitaki mo e fakalilifu kua mua atu e lauia mitaki ke he tagata he kaina ka fakatatai ke he tau kupu haaku.”

He tau magaaho nei ne tupu lahi e nakai fakalilifu, kua latatonu mo e aoga ke iloa e puhala ke fehagai mo e falu. Mua atu ke he mena ia, kua tomatoma e tau Tohiaga Tapu ki a tautolu ke “lata e tau mahani . . . mo e vagahau mitaki kia Keriso.” (Filipi 1:27; 2 Timo. 3:1-5) Kua aoga lahi ke fakaako e tautolu e tau fanau ha tautolu ke fakalilifu e falu. Maeke fēfē ke fakaako a lautolu ke nakai ni kitia hokoia e totonu ka e ke fakalilifu mai he loto?a

Tau Mahani Mitaki ne Fakaako ha ko e Fakafifitakiaga

Fakaako mai e tau fanau he muitua ke he tau fakafifitakiaga ne kitia e lautolu. Ti ko e matapatu puhala ke maeke he tau matua ke fakaako e tau mahani mitaki ke he tau fanau ha lautolu ko e mahani mitaki fakamua e tau matua. (Teu. 6:6, 7) Kua aoga ke tutala ke he tama haau hagaao ke he mahani totonu, ka e nakai koenaia. Lafi ke he tau fakamanatu, ko e fakafifitakiaga mitaki kua aoga lahi mahaki.

Manamanatu la ke he mena ne tupu ki a Paula,b ne feaki he kaina Kerisiano ne matua tokotaha. Ko e fakalilifu ke he tau tagata oti kua eke mo vala he aga haana. Ko e ha? Tali e ia, “Fakatoka e mami e fakafifitakiaga, ti eke e fakalilifu mo mena aga mau ki a mautolu e tau fanau.” Ko e Kerisiano ne higoa ko Walter ne fakaako e tau tama taane haana ke fakalilifu e matua fifine nakai tua ha lautolu. Pehē a ia, “Ne lali au ke fakaako e fanau taane haaku ke fakalilifu e matua fifine ha lautolu ha ko e fakafifitakiaga haaku ni, he nakai vagahau fakakelea hagaao ke he hoana haaku.” Ne matutaki a Walter ke fakaako e fanau taane haana ke he Kupu he Atua, ti liogi a ia ma e lagomatai ha Iehova. Taha ia lautolu mogonei hane gahua he la ofisa he Tau Fakamoli a Iehova, ti taha hane paionia. Ne ofaofa mo e fakalilifu he fanau taane haana a laua ko e tau matua ha lautolu.

Pehē e Tohi Tapu: “Ko e Atua nakai ko e Atua ha i ai e fakaagitau, ka ko e mafola.” (1 Kori. 14:33) Kua maopoopo e tau mena oti ha Iehova ne taute. Ti lata e tau Kerisiano ke eketaha ke muitua e mahani Atua nei mo e fakatumau ke fakamaopoopo e tau mena he kaina. Fakaako he falu matua e tau fanau ha lautolu ke taute e tau momoheaga ha lautolu he tau aho oti ato o he aoga, ke tuku e tau mena tui ha lautolu he tau tokaaga hako, mo e ke lagomatai e tau gahua he kaina. Ka kitia he tau fanau e takatakaiaga maopoopo mo e meā he kaina katoa, to liga eketaha a lautolu ke fakamaopoopo e tau poko mo e tau koloa ha lautolu.

Fēfē e onoonoaga he tau fanau ha mutolu ke he tau mena ha lautolu hane fakaako he aoga? Talahau nakai e lautolu e loto fakaaue ke he tau mena ne taute he ha lautolu a tau faiaoga ma lautolu? Ko e matua, talahau nakai e koe e loto fakaaue pihia? To liga hihiga e fanau haau ke fakakite e aga ia foki ke he tau gahua aoga mo e tau faiaoga ha lautolu tuga ne fakakite e koe. Ko e ha he nakai fakamalolō a lautolu ke fakamahani ke fakaaue ke he tau faiaoga ha lautolu? Ko e fakaaue ke he tau gahua ne taute ko e puhala mitaki lahi mahaki ke fakakite e fakalilifu, ke he faiaoga, ekekafo, tagata gahua he fale koloa, po ke ha tagata ni. (Luka 17:15, 16) Ko e tau fanau Kerisiano ne kehe mai he tau kapitiga aoga ha lautolu ha kua mahani totonu mo e mahani mitaki, ti lata ke nava ki ai.

Kua lata e tau tagata he fakapotopotoaga Kerisiano ke fakatoka e fakafifitakiaga mitaki lahi he tau mahani. Ko e mitaki ha ia ke kitia e tau fuata kua fakalataha ke he fakapotopotoaga hane fakakite e mahani mitaki he pehē “fakamolemole” mo e “fakaaue”! Ka fakakite he tau tagata lalahi e fakalilifu he fanogonogo ke he tau fakamaamaaga ne foaki mai he tau feleveiaaga, kua fakamalolō a lautolu ne ikiiki ke fifitaki a lautolu. Maeke e tau fanau ke fakaako ke fakalilifu ke he tau tuutakaina ha lautolu he onoono ke he tau fakafifitakiaga he tau mahani mitaki he Fale he Kautu. Ma e fakatai, ko Andrew ne fā e tau kua fitā he iloa ke talahau, “Tulou,” ka fano i mua he tau tagata lalahi.

Ko e heigoa foki ka taute he tau matua ke fakaako e tau fanau ha lautolu ke iloa e lautolu e mahani kua latatonu? Kua lata mo e maeke he tau matua ke fakaaoga e magaaho ke tala age ke he tau fanau ha lautolu e tau fakaakoaga ne iloa mai he tau fakafifitakiaga loga i loto he Kupu he Atua.—Roma 15:4.

Fakaako ke he Tau Fakafifitakiaga he Tohi Tapu

Ne liga tauteute he matua fifine ha Samuela e tama taane haana ke fakaveli ki mua he Ekepoa ne Mua ko Eli. Magaaho ne ta atu e ia a Samuela ke he faituga utafano, liga ko e tolu po ke fā laia e tau haana. (1 Samu. 1:28) Maeke nakai ia koe ke fakamahani ke he tama tote haau e tau fakafeleveia tuga e “fakaalofa atu ke he pogipogi,” “fakaalofa atu ke he pale laā,” “fakaalofa atu ke he afiafi,” po ke fakafeleveia kua aga mau mo e matakavi ne nofo ai a koe? Tuga e tama tote ko Samuela, maeke foki e tau fanau ha mutolu ke “ofania . . . e Iehova katoa mo e tau tagata.”—1 Samu. 2:26.

Ko e ha he nakai fakaaoga e tau tala Tohi Tapu ke fakamaama e kehekehe he fakalilifu mo e nakai fakalilifu? Ma e fakatai, magaaho ne manako e patuiki nakai fakamooli ha Isaraela ko Ahasaia ke kitia e perofeta ko Elia, ne fakafano age e ia “e takitaki he tokolimagofulu mo e hana tokolimagofulu” ke aahi mai a ia. Ne poaki e takitaki ke fina atu e perofeta mo ia. Nakai ko e puhala a ia ke vagahau ke he hukui he Atua. Fēfē e tali ha Elia? “Kaeke ko e tagata he Atua au,” he talahau e ia, “kia to hifo e afi mai he lagi ke fakaoti ai a koe mo e hau a tokolimagofulu.” Ko e mena tonu ia ne hoko. “Ti to hifo ai e afi mai he lagi, kua fakaoti ai a ia mo e hana tokolimagofulu.”—2 Patu. 1:9, 10.

Ne fakafano age foki e takitaki ke uaaki he toko 50 ke tamai a Elia. Ne lali foki a ia ke poaki a Elia ke o mo ia. Ne liu foki e afi to hifo mai he lagi. Ka ko e mogoia, ne hau e takitaki ke toluaki he 50 ki a Elia. Ne fakalilifu e tagata nei. He nakai talahau e poaki ki a Elia, ne fakatokotui a ia ke he haana tau tulihui mo e olelalo: “Ko e tagata he Atua [mooli] na e, kia fakaalofa mai a koe ke moui ai au nai, ke momoui foki e tokolimagofulu nai ko e hau a tau fekafekau. Kitiala, ne to hifo e afi mai he lagi, ti fakaoti ai e na takitaki tokoua fakamua he tau tokolimagofulu, mo e tau tokolimagofulu ha laua; ka ko e hanai, kia fakaalofa mai a koe ke moui au nai.” To ui atu nakai e perofeta he Atua ke to hifo e afi ke he tagata ne liga matakutaku ka e vagahau fakalilifu pihia? To mamao ligo e mena ia! He nakai pihia, ne tala age e agelu ha Iehova ki a Elia ke o hifo mo e takitaki nei. (2 Patu. 1:11-15) Nakai kia fakamaama he mena ia e aoga he fakakite e fakalilifu?

Magaaho ne tapaki he tau kautau Roma e aposetolo ko Paulo he faituga, ne nakai fuafua manatu e ia e tonuhia haana ke vagahau. Ne ole fakalilifu a ia ke he takitaki ne leveki: “Kua aoga nakai ke tala atu e au ha kupu kia koe?” Ko e fua, ne foaki age e magaaho ki a Paulo ke vagahau ke lalago a ia.—Gahua 21:37-40.

Magaaho he fakahala, ne poki atu ai e mata ha Iesu. Pete ia, ne iloa e ia e puhala hako ke totoko: “Kaeke kua kelea haku a kupu, ti talahau la e koe hana a kelea; kaeke kua mitaki, po ke heigoa e mena ne poki mai ai e koe au?” Nakai maeke ha tagata ke moua ha kelea ke he puhala ne vagahau a Iesu.—Ioane 18:22, 23.

Foaki mai foki he Kupu he Atua e tau fakafifitakiaga ke he puhala kua lata ia tautolu ke tali atu ke he fakatonuaga malolō mo e puhala ke fakalilifu he mailoga e tau hehē kua mole po ke he fakahanoa. (Kene. 41:9-13; Gahua 8:20-24) Ma e fakatai, ne fakamolemole a Apikaila ma e puhala fakaikaluga ne taute he taane haana ko Napalu ki a Tavita. Lafi ke he fakamolemole haana ne age foki e ia loga e tau mena kai. Ne ofo lahi a Tavita ke he mena ne taute e Apikaila ati mole e mate ha Napalu ne fifili e ia a Apikaila mo hoana haana.—1 Samu. 25:23-41.

Fakaako e tau fanau haau ke fakalilifu, he fakakite e mahani fakalilifu he tau tuaga vihi po ke he fakatātā e tau mahani mitaki. He “kikila atu pihia ha [ta]utolu a maama ki mua he tau tagata,” ko e puhala nei kua ‘fakaheke atu ai ke he Matua ha tautolu he lagi.’—Mata. 5:16.

[Tau Matahui Tala]