“Kia Fakaheke Fakalataha a Tautolu ke he Hana Higoa”
1. Ko e heigoa e magaaho ka moua e tautolu ke fakaheke auloa e higoa he Atua, mo e ko e heigoa ha tautolu ka tauteute mogonei?
1 ‘Kia nava atu a tautolu ki a Iehova mo e kia fakaheke fakalataha a tautolu ke he hana higoa,’ ne lologo he salamo. (Sala. 34:3) Ko e ha tautolu a Fonoaga he Fahimotu ka hau “O Fano mo e Atua” ka foaki ki a tautolu e magaaho ke fakaheke auloa e higoa a Iehova mo e tau matakainaga ha tautolu mai he tau fakapotopotoaga loga. Kua taute nakai e tau fakatokatokaaga hau ma e nofoaga, puhala, mo e ole ke nakai gahua he magaaho ia? Kua pulotu a tautolu ke taute tuai e tau mena nei.—Fakatai 21:5.
2. Ko e ha kua aoga ai ke fakatokatoka ke hohoko tuai ke he matakavi fonoaga?
2 Hohoko Atu ke he Fonoaga: Kua loga lahi e tau mena ke taute ka o atu a tautolu he fonoaga. He o atu tuai to lagomatai a tautolu ke fehagai ka feleveia mo e ha fakatuai tupu fakaofo mo e to maeke ia tautolu ke nonofo tuai he tau nofoa ke kamata mo e loto katoatoa ke he lologo mo e liogi hafagi. (Sala. 69:30) He fai minuti ato kamata e fakaholoaga, kua fita e tagata ka nofoa he nofo i mua ka e fakatagi e tau lologo he Kautu he hafagiaga. Kua lata ia tautolu oti ke nonofo he tau nofoa ha tautolu he mogoia ke kamata e fakaholoaga ke he puhala lilifu.—1 Kori. 14:33, 40.
3. Fakakite fefe e tautolu e manamanatu ke he falu ka kumi nofoa?
3 Kua tomatoma e Kupu he Atua ki a tautolu ke ‘eke e tau mena oti ha tautolu mo e fakaalofa.’ (1 Kori. 16:14) Ka hafagi e tau gutuhala he 8:00 a.m., he manamanatu ke he falu to taofi a tautolu mai he tafepoi, fakatepetepe, taupoka, po ke tauomoi he lali ke moua e nofoa ne manako a tautolu ki ai neke moua he falu. Lata ke toka ni e tau nofoa ma lautolu ne fakatauo mo koe he taha e motoka po ke nonofo mo koe he taha e kaina.—1 Kori. 13:5; Filipi 2:4.
4. Ko e heigoa e tau fakatokaaga ma e okioki pale la, mo e aoga fefe e mena nei?
4 Fakamolemole tamai e kai la ka e ua o kehe mai he matakavi fonoaga ke kumi mena kai he okioki pale la. To fakaata he mena nei e tau tagata oti ke olioli e lafiaga atihake mo e fita e mau ke kamata e fakaholoaga he magaaho afiafi. Ka lata, maeke ke fakaaoga e puha tuku kai tote ne hao he lalo nofoa. Ko e tau puha tuku kai lalahi, tau lupo kalase, mo e tau kava kua nakai fakaata ke he matakavi fonoaga.
5. Ko e heigoa e foakiaga kua taute ma lautolu ne nakai logona mitaki?
5 Ke aoga a lautolu ne nakai logona mitaki, to fakapuloa e fakaholoaga ke he takatakai ia ni he fale ke he letio FM. To taute e fakailoaaga ke he mena nei he kamataaga he fakaholoaga fakamua. Ke fakaaoga e foakiaga nei, lata ia koe ke tamai e tama letio FM mo e tau mena fanogonogo teliga.
6. Tauteute fefe e tautolu e tau loto ha tautolu ma e tau fakaakoaga ka fakatoka mai?
6 Hane Fakatali e Galue Fakaagaga ki a Tautolu: Ko e Patuiki ko Iehosafata taha ne ‘tauteute e ia hana loto ke kumi ke he Atua.’ (2 Nofo. 19:3) Tauteute fefe e tautolu e tau loto ha tautolu ato hoko e fonoaga? Kua foaki mai e tau vala tala he lau i tua he tau fufuta Awake! ia Me 22 mo e Iuni 8 ke kamataaki e galue fakaagaga ka fakatoka mai. Ko e ha he fai magaaho ke manamanatu ke he tau vala tala ia, ke atihake e amaamanaki ke he tau mena kua tanaki e Iehova ma tautolu? Putoia foki he tauteute e loto ko e ole ki a Iehova ke lagomatai a tautolu ke maama e tau fakamaamaaga ke he tau mena ka logona e tautolu ti fakagahua ai.—Sala. 25:4, 5.
7. Ko e heigoa e manako ha tautolu, mo e ko e ha?
7 Kua manako oti a tautolu ke ako mai he Kupu he Atua, he mailoga kua maeke ia tautolu ke tupu ke he fakamouiaga ha ko e mena ia. (1 Pete. 2:2) Ko e mena ia, kia o atu a tautolu ke he Fonoaga he Fahimotu “O Fano mo e Atua” mo e ‘fakaheke auloa e higoa ha Iehova.’—Sala. 34:3.
[Puha he lau 3]
Tau Puhala ke Fakaheke e Higoa he Atua
◼ Fakatokatoka tuai
◼ Fakakite e fakaalofa ma e falu
◼ Tauteute e loto hau