Maeke Nakai Ia Koe?

¹ Ne tupu taha mena ofoofogia he tau 778 F.V.N. He fakakiteaga, ne kitia he perofeta ko Isaia e “Iki kua nofo ki luga he nofoaiki tokoluga mo e nofoaiki ne mua he tokoluga.” Ti logona ai e Isaia e leo he tau sirafi ne pehe age ke he lilifu ha Iehova: “Kua tapu, kua tapu a Iehova Sapaota.” Ko e ofoofogia ha ia he mena ia! He fakatokaaga ia, ne fakatu e Iehova e huhu paleko: “Ko hai ke fakafano atu e au?” Nakai fai fakamaamaaga ne foaki ke he kotofaaga po ke to fai totogi e tagata foaki noa ka moua mai ai. Ka e, nakai fakauaua ai, he tali a Isaia: “Ko au hanai, kia fakafano atu e koe au.”​—Isa 6:1, 3, 8.

² Ko e aga nei he fakamakai ke taute e mena kua ole a Iehova ki ai na fakakite aki hana tau tagata. (Sala. 110:3) Ti ko e uiina pauaki anei ki a lautolu kua maeke ke fakaata e lautolu a lautolu. Kua mautali nakai a koe ke tali mo e aga fakamakai, tuga ia ha Isaia?

³ Manako agaia ma e tau matakainaga tane ke gahua he Peteli. Kua ui atu ki a lautolu ke moua e manako lahi ke tuku fakamua e Kautu mo e ke fakamakai ke taute e mena kua lata ke lagaki hake e gahua fakamatala he lalolagi katoa. (Mata. 6:33) Moha ia, he eke mo tagata he magafaoa Peteli kua foaki ki a ia e magaaho uho ke fekafekau ki a Iehova ke he puhala solu katoa. Pihia fefe?

⁴ Ko e Gahua ne Taute he Peteli: Manamanatu la ke he mena kua taute tumau ke he kaina Peteli i Auckland, i Niu Silani. Toko 43 e matakainaga katoa he magafaoa Peteli he matakavi nei nukua mau kotofa he gahua auloa ke lalago e matakau fekafekau fakamoli mo e loto matala mo e Kau Fakatufono he tufatufa e tau Tohi Tapu mo e tau tohi faka-Tohi Tapu ke fakaaoga he fonua i Niu Silani mo e fakaako fakatagata ai. (Mata. 24:45) Ma e fakatai, ko e tau he fekafekauaga e kua mole ko e 78,797 e tohi, 145,936 e tohi ikiiki mo e tau porosua, 3,077,604 e mekasini, mo e 10,460 e autiokasete ne taute mo e fakahu ha ko e fua he laliaga fakalataha he magafaoa Peteli i Niu Silani. Ko e gahua makimaki he tau matakainaga tane he tau matapatu ofisa he lalolagi kua tuku ke kumikumi mo e fifili e “tau kupu ke fiafia ai . . . ko e tau mena foki kua tohi ko e tonu ia, ko e tau kupu moli ni” ma e tau tohi nei. (Fakama. 12:9, 10) Ha ha i ai e takitakiaga kua foaki foki ke he tau tagata fakaliliu toko 10 nukua lagomatai ke taute e tau tohi ne fakaaoga he tau aelani ne leveki he la ha tautolu. Lahi e mena ne taute ke takitaki aki e gahua nukua fakakatoatoa he tau fakapotopotoaga 166 i Niu Silani. Foaki foki e lagomataiaga ke he tau Komiti Ta Fale Matakavi nukua putoia e fakatokaaga enesinia mo e talaga he tau Fale he Kautu ne manako ki ai mogonei. Tokologa e tau tagata foaki noa kua manako ke leveki e lolomiaga mo e fakahu he tau tohi, fakamea, levekiaga he kaina, tauteute e tau mena kai, fakatupe, leveki malolo tino, mo e falu gahuahuaaga he Peteli.

⁵ Ko e fakakatoatoa he tau gahua oti nei kua foaki mai e gahua lahi mahaki ka e makona fakaagaga. He iloa kua fakaaoga e tau malolo katoatoa ha tautolu ke lalago aki e gahua fakamatala mo e fakaako nukua fua mai e olioli lahi. Ko e gahua he Peteli kua lagomatai a tautolu ke iloa matafeiga e fakatokatokaaga ha Iehova. Kua fakamanatu ki a tautolu na fakamalolo he salamo e tau Isaraela ke iloa lahi e matapatu he pule fakateokarasi he lalolagi he vaha ha lautolu.​—Sala. 48:12, 13.

⁶ Tau Monuina he Fekafekau he Peteli: Fefe e logonaaga ha lautolu kua fekafekau he Peteli ke he kotofaaga ha lautolu? Mailoga e tau talahauaga nai mai he tau tagata fuata mo e momotua he magafaoa Peteli. Taha e matakainaga he magafaoa Peteli ne tolu ia e tau fiafia he fekafekau he Peteli, ne talahau: “He nofo he Peteli kua fakamalolo e fakafetuiaga haku mo Iehova. Ko e leva he fekafekau haku hinei kua lahi e iloaaga haku ke he puhala ne fakaholo aki e Peteli, ko e lahi he mena nukua fakaako au hagaao ke he aga ha Iehova. Ko e fekafekauga he Peteli foki ko e mena ofoofogia ki a au ke kitia a Iehova kua fakaaoga e tau tagata​—tau tagata kehekehe. Ti nakai lata ia koe ke mitaki katoatoa ke talia ki a ia.”

⁷ Taha e matakainaga tane fuata ne talahau: “Ne manatu e au ki a au, ‘Ko e mitaki ha ia ka moua e lalolagi fou mo e tala age ke he tau tagata tane tua fakamoli i tuai na fekafekau au ke loga e tau he Peteli, nakai gahua i fafo he uku koloa.’”

⁸ Kua fakakite he matakainaga fuata e fakaakoaga ne moua e ia: “Ko e ako hagaao ki a au ni mo e mena kua lata ke gahua au ki ai ti feaki mogoia e tau fua ia ne eke mo monuina lahi. Kua logona e au mogonei kua lata lahi ia au ke fekafekau ki a Iehova. Mogonei kua lahi tuai e fakauka haku, lahi tuai e mahani fakalatalata, ti maeke au mogonei ke fakakite fakalahi e fakaalofa.”

⁹ Kua manatu he matakainaga fifine hana tau monuina kua moua ke hoko mai ke he magaaho nei: “Ko e fakaholoaga fakaagaga i hinai ne fakaako fakalahi au hagaao ki a Iehova mo e puhala ke muitua fakamitaki au ki a ia ke he manatu, logonaaga, mo e gahua. Ti ko e fakaakoaga ko e mena holo tumau, ti ko e monuina hololoa.”

¹⁰ Ko e matakainaga tane ne fakamoli ke katoatoa e 59 e tau tau he fekafekauaga mau, molea e 43 e tau tau he Peteli, ne pehe: “Nakai tuga e kaina pope e Peteli, tuga he manatu he falu. Lahi e mena ne taute e mautolu ha ko e fakaholoaga he puhala moui ha mautolu. . . . Nakai la fai aho kua hau au ke gahua mo e nakai fiafia ke he mena ne taute e au. Ko e ha? Ha ko e mena ka foaki solu katoa a mautolu ki a Iehova, kua makona a mautolu he iloa kua ‘eke e mautolu e tau mena ia kua eke e mautolu.’”​—Luka 17:10.

¹¹ Ko e taha matakainaga tane foki, ne fekafekau he Peteli ke 62 e tau tau, ne pehe: “Kua talitonu mauokafua au ko e matakavi mua ue atu e Peteli he lalolagi nei ato hoko mai e lalolagi Parataiso. Nakai tokihala au he eke e fekafekauaga tumau mo feua tukulagi haku. Ko e olioli ha ke kitia mo e fai vala he tupuaga lahi ke he fakatokatokaaga ha Iehova he lalolagi! Ko e fifiliaga haku fakalataha mo e lagomataiaga ha Iehova, ke fakatumau ke eke e Peteli mo kaina haku mo e fakaaoga solu katoa au ke fakalaulahi e tau mena he Kautu.”

¹² Ne tokutoku he tau tagata nei he magafaoa Peteli gahoa ni a ia he tau monuina loga ka olioli e koe kaeke ka fakaata e koe a koe ma e fekafekauaga he Peteli. Ha kua moli e moua e kotofaaga ke fekafekau, kua lata fakamua ia koe ke hokotia ke he tau lataaga. Ko e heigoa falu he tau lataaga ke eke mo tagata he magafaoa Peteli?

¹³ Tau Lataaga ma e Fekafekau he Peteli: Ko e tau lataaga aoga ma lautolu ka ole ke gahua he Peteli ne fakakite he puha i loto. Lafi ki ai, kua aoga ke fakamakai a lautolu ke gahua malolo, nakai ke “manako ke he tau mena ke fiafia ai.” (2 Timo. 3:4; 1 Kori. 13:11) Kua lata e tau tagata he magafaoa Peteli ke eke mo tau tagata tane mo e fifine fakaagaga ne kua feaki e aga fakaako fakatagata mitaki ti fakamahani ke “mailoga e tau mena mitaki mo e tau mena kelea.” (Hepe. 5:14) Ko e motua faka-Kerisiano ha lautolu kua lata ke fita he fakatata ke he tau fahi oti he moui, lauia ha lautolu a tau mena tui, tauteuteaga, fifiliaga he leo kofe mo e fakafiafiaaga. Ko e tau tagata loto makai he magafaoa Peteli kua gahua ke he mena kua manako tagata gahua. Ko e tau tagata fuata kua moua e tau matagahua ke he tau lima, putoia ke he vali, taute mo e fakahu e tau tohi, leveki e fale, kanakana, fakamea, unu, mo e tauteute e tau mena kai. (Fakatai 20:29) Nakai tuga e gahua tupe, ko e tau matagahua takitaha kua ta mai e makona lahi ha kua tapu e fekafekauaga nukua ta mai e lilifu ki a Iehova.​—Kolo. 3:23.

¹⁴ Ko e leva ha lautolu kua uiina ke gahua he Peteli ko e taha e tau. Kua fakamalolo he mena nei a lautolu ke fakamahani ke eke mo tau tagata gahua fua mitaki. Ko e amanakiaga ke maeke ia lautolu ke eke e Peteli mo kaina ha lautolu. Ko e fakaalofa ma Iehova kua omoi a lautolu ko e tau tagata he magafaoa Peteli ke tuku fakamua e gahua he Kautu ke he tau mena fakatagata, nukua fakafiafia ki a Iehova.​—Mata. 16:24.

¹⁵ Tau Manako Fou: Ha ko e tuaga he gahua ne taute he Peteli, ko e manako ha mautolu mogonei kua matapatu ke he tau matakainaga tane nofo tokotaha. Pete ni nakai ko e fakaveaga, ka kua manako ki a lautolu nukua paionia mau, ha kua fita a lautolu he gahua mau. He falu magaaho fa hafagi ai ke he tau matakainaga fifine nofo tokotaha mo e tau hoa mau mai he 19 ke he 35 e tau he moui kua fai pulotu pauaki nukua lata mo e Peteli. Lafi ki ai, falu matakainaga tane mo e fifine kua liga molea fakatote e 35 mo e fai pulotu pauaki mo e fakaakoaga ka lata ke fakaaoga he Peteli kua fakamalolo ke tuku e tohi ole. Ma e fakatai, kua putoia ai e tau tagata kamuta, tau tagata vali, tau tagata taute hila, tau nosi pauaki, po ke tau makeniki, ke totoku ni e falu. Pete ia, nakai fakamalolo e mautolu e tau tagata ke moua e fakaakoaga pauaki po ke fakamahaniaga mo e manatu to fakaholo ki mua he mena nei e puhala ke o mai ke he Peteli. Ko lautolu ne fita e moua e fakaakoaga pauaki, liga to hau ke he kupu moli, kia tohi e talahauaga mo e tuku fakalataha mo e laupepa ole ke he Peteli.

¹⁶ Ka ole a koe ti nakai uiina ke gahua he Peteli, ua fakalolelole. Liga manamanatu a koe ke fakafou e laupepa ole hau he tau tau takitaha. Kua fakaata he falu matakainaga tane kua fai fakaakoaga mo e pulotu pauaki a lautolu ke gahua fakaku he Peteli. Kua liga ole a lautolu ke gahua fakaku he Peteli ke he taha, ua, tolu, po ke fa e fahitapu po ke tolu e mahina. Kia ota e tau laupepa ole gahua fakaku he Literature Request Form.

¹⁷ Ko e fekafekau ki a Iehova he feoaki fakatata mo e tau matakainaga ha Keriso ko e kotofaaga mua ue atu ma lautolu kua gahua he Peteli. Kua fakaaue e Kau Fakatufono ke he aga foaki noa ha lautolu kua fakaata e tau magaaho ke lagomatai e tau manako he tau matakainaga he lalolagi katoa.​—Filipi 2:20-22; 2 Timo. 4:11.

¹⁸ Lautolu ne Ikiiki​—Tauteute a Mutolu Mogonei ma e Gahua Peteli: Ko e tauteuteaga ma e gahua he Peteli kamata fakamua ato hoko e 19 e tau he moui. Ko e heigoa ha lautolu ne ikiiki ka taute ke fakatoka ma e fekafekauaga he Peteli? Ne pehe a Iesu: “Ko hai taha ia mutolu kua manako ke ati e kolo, ka e nakai nofo fakamua ki lalo ke totou e tau tupe.” (Luka 14:28) Ha ko e tauteute mo e pulega kua aoga ke kautu ha matagahua talaga, kua aoga ha ia ke he tau fuata ke onoono fakamitaki ke he puhala hane talaga e lautolu e vaha i mua ha lautolu ke he fekafekauaga ha Iehova! Ko e fakaveaga malolo kua lata ke fakave tuai he ikiiki ke maeke ia lautolu ke moua e tau foliaga fakaagaga. Ko e fuata, mitaki fefe e puhala fakatoka he fakaveaga hau? Ka manako a koe ke fekafekau he Peteli, to aoga a koe he manamanatu fakamitaki ke he tau mena nei.

¹⁹ “Maeke ke Talia” ma e Kotofaaga Uho Nei he Fekafekauaga: He fakamau ia Mataio 19:12, ne fakamalolo e Iesu hana tau tutaki ke “maeke ke talia” e tuaga nofo tokotaha. Ko e ha? Nakai ma e tau kakano fakatagata, ka e ‘fakaeunuka ha ko e kautu he lagi.’ Ne fakamalolo e Paulo e tuaga pihia he “fekafekau fakamitaki ke he Iki mo e loto nakai fakalavelave.” (1 Kori. 7:32-35) Momoko ai, tokologa ne to noa mai he kotofaaga he fekafekau ko e tagata tane nofo noa he Peteli ha kua tutuli e ia e hoa he mau tuai. Manako a mautolu ke fakamalolo e tau matakainaga tane fuata ha tautolu ke fakaaoga e tau malolo ke he fekafekauaga mau he ataina agaia mai he tau matagahua fakamagafaoa. Ti, ka fai magaaho mogoia, kua maeke ia lautolu ke fifili ke mau, to eke a lautolu mo tau tane mitaki ha kua moua e lautolu e puhala he moui mo e he fekafekauaga Kerisiano. He fai magaaho he fekafekau he Peteli ne mau falu mo e maeke ke fakatumau e fekafekau tokoua i ai. Ka fai kotofaaga foki a laua he magaaho fakamui, tuga e gahua o fano po ke misionare, kua maeke ia laua ke nakai tokihala ha kua fakaata e laua e magaaho ma e fekafekauaga he Peteli.

²⁰ Aua Neke Fakalavelave he Tau Koloa: Igatia e fuata mo e huhu fakamitaki ki a ia: ‘Ko e foliaga kia haku ka oti mai he aoga ke tutuli e feua fakatufono po ke fekafekau mau ki a Iehova?’ Moli, kua felauaki e vala fakahiku mo e foaki noa. Ka e pihia foki ka tutuli e feua fakatufono! He fakahikuaga, ha fe e puhala ka moua mai e fua tumau tukulagi mo e aoga? Ne foaki e Iesu e tali hako. Hagaao ki a Mataio 6:19-21, ne pehe a ia: “Aua neke tanaki e mutolu e tau koloa ma mutolu ke he lalolagi, ha ha i ai e moko mo e pala ke fakaoti ai, ha ha i ai foki e tau tagata kaiha ke keli atu mo e kaiha ai. Ka kia tanaki e mutolu e tau koloa ma mutolu ke he lagi, nakai ha ha i ai e moko mo e pala ke fakaoti ai, nakai ha ha i ai foki e tau tagata kaiha ke keli atu mo e kaiha ai; Ha ko e mena ha i ai ha mutolu a tau koloa, ha ha i ai foki mo e tau loto ha mutolu.” Aua neke takitaki e tautolu e tau loto ha tautolu ke tutuli e feua fakalalolagi po ke tau mena fakatino ka e gahua solu katoa ki a Iehova. Kua lata ia tautolu oti ke mailoga ko e tanakiaga kua latatonu ko e tutuli e fakafetuiaga mitaki mo Iehova, ke maeke ia tautolu ke fakafiafia hana loto. (Fakatai 27:11) He tuku fakamua a Iehova he tau momoui ha tautolu ka e ikiiki agaia, kua fakakite e tautolu e tuaga ha tautolu mo e aoga he Kautu ki a tautolu. Manatu, “ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.” (Fakatai 10:22) Ko e magaaho mitaki lahi ma lautolu ne ikiiki ke fakakite e tau tuaga he tau loto ha lautolu he foaki atu taha mena mitaki ki a Iehova ma e tau mena oti kua foaki mai e ia ki a lautolu. Kua fakaata he fekafekauaga he Peteli e magaaho homo ue atu pihia ma lautolu kua hokotia ke he tau lataaga ia.

²¹ Lautolu ne Fekafekau he Peteli kua Lata ke Mea e Tau Mahani: Ne huhu e salamo: “To eke ha kia e fuata ke fakamea hana tau mahani?” Ne tali a ia: “Kia leoleo ki ai ke lata mo e . . . tau kupu [ha Iehova].” (Sala. 119:9) To lauia ai foki e tiaki e tau mena oti kua matutaki mo e mahani kolokolovao he fakatokaaga ha Satani. Ko e tohi telefua he Internet, mahani kelea ke he vahaloto he tagata tane ke he fifine, tau leo kofe fakalialia, tau fakafiafiaaga teteki, mo e inu kava tuai ko e falu na nei he tau matahele kua fakaaoga e Satani ke puipui aki e tau fuata ha tautolu he foli atu ke he tau foliaga fakaagaga. Ko e fifiliaga malolo kua lata ke totoko e tau lagatau nei. Ko e tagata fuata, kaeke kua lauia a koe ke he tau mena nei, tutala ke he tau motua he fakapotopotoaga ti fakamea e tau mena nei ato ole a koe ke fekafekau he Peteli. He moua e manamanatuaga mea kua aoga ma e fekafekau katoatoa ki a Iehova.​—1 Timo. 1:5.

²² Ako ke Femataaki mo e Falu: Ko e lataaga aoga ma e kautuaga he gahua he Peteli ko e ako ke femataaki mo e falu. Ko e magafaoa Peteli i Niu Silani kua moua mai he tau matakainaga tane mo e fifine he tau puhala moui kehekehe. He lafilafi e tau aga kehekehe nei ke he fulufuluola he Peteli, ko e paleko ai ke he falu magaaho. Ka manamanatu a koe ke gahua he Peteli, kia huhu hifo fakamitaki a koe ki a koe ni: ‘Mukamuka nakai au ke ita ka nakai talia he falu e manatu haku? Mukamuka nakai falu ke femataaki mo au?’ Ka manako a koe ke tolomaki he tau fahi nei, kamata gahua he magaaho nei. Ko e taute hau ki ai ka lagomatai a koe ke hiki mafiti ke nofo mo e gahua mo e tau tagata he magafaoa Peteli.

²³ Gahua fakamalolo ke eke mo tagata fakaagaga he feaki e fakafetuiaga tata mo Iehova. Feaki e fakaholoaga mitaki he fakaako fakatagata, ka lauia ai e totouaga he Tohi Tapu he tau aho takitaha. Kia malolo he tutala e tala mitaki ke he falu. He tuku e tau mena nei ke he gahuahuaaga, to kitia mafiti hau a tuaga fakaagaga. (1 Timo. 4:15) Ko e tau monuina moli a ia kua tatali mai ki a lautolu kua tauteute mogonei ma e feua gahua mau!

²⁴ Tau Matua, Fakamahani e Tau Fanau ha Mutolu: Ko e heigoa he tau mamatua ka taute ke fakamalolo aki e tau fuata ke tutuli e fekafekauaga tumau? Ne pehe a Iesu: “Kua takitaha mo e tuga hana [faiaoga] a lautolu kua fakaako.” (Luka 6:40) Ko e fakamahani fakamitaki e tagata fakaako ka pauaki ke fakakite e tau fua mitaki he hana faiaoga tukulele. Kua lata e matapatu fakaakoaga nei ke manatu he tau mamatua Kerisiano he gahua malolo a lautolu ke fakaako e tau fanau ha lautolu he “fakamahani ke he mahani Atua.” (1 Timo. 4:7) Ha kua hihiga e tau fanau ke fakakite e aga he tau mamatua ha lautolu ke he tau mena fakaagaga, kua lata e tau mamatua ke huhu hifo ki a lautolu ni: ‘Kua uho fakatagata nakai ki a mautolu e gahua ne taute he Peteli ke fakatolomaki e fiafia he tapuakiaga moli ha Iehova? Kua mailoga nakai e mautolu e monuina ha Iehova ke he fakatokaaga he Peteli? Talitonu nakai a mautolu ko e fekafekauaga ha Iehova ko e feua mua atu ke taute he tau fanau ha tautolu?’ Ko e fakaaue mai he loto ma e fekafekauaga he Peteli mo e gahua kua taute i ai ka lagomatai a tautolu ke tuku e loto fakaaue i loto he tau fanau ha tautolu.

²⁵ Ne ha ha ia Elekana mo Hana e loto fakaaue hokulo ma e tapuakiaga moli. Ne fakatoka e laua e fakafifitakiaga uho lahi ma e tau mamatua Kerisiano he vaha nei. I Isaraela i tuai, ko e tau tagata tane Isaraela ni hokoia ne lata ke ‘tutu ki mua he Iki, ko Iehova’ taki lagatolu he tau ke he faituga. Moha ia, ne fenoga a Elekana kavi ke 32 e kilomita, liga o hui mo e magafaoa katoa hana “he taha tau mo e taha tau” ke eke poa he tapuakiaga ha Iehova. (Eso 23:17; 1 Samu. 1:3, 4, 9, 19; 2:19) Kua mailoga ai ko e ulu he magafaoa nei ne manako ke he magafaoa katoa hana ke fakalataha mo e manamanatuaga fakatagata hana ke he tau mena fakaagaga.

²⁶ Ne fakalataha a Hana ke he fiafia he tane hana ma e tapuakiaga moli. Ne logona lahi e ia e kotofaaga hana ke lagomatai e tapuakiaga mea he faituga. Ne omonuo a Hana ka age e Iehova e tama tane ma hana, to foaki e ia a ia ke gahua he faituga. (1 Samu. 1:11) Ne fakaata he Fakatufono faka-Mose e tonuhia ke he tane ke moumou e omonuo nakai lata he hana hoana. (Nume. 30:6-8) Pete ia, ne talia e Elekana e omonuo ha Hana, he fakakite kua lalago foki e ia e tauteaga he tapuakiaga mea!​—1 Samu. 1:22, 23.

²⁷ Lauia nakai e tama ha laua ko Samuela ke he puhala aoga he loto fakaaue mo e aga mitaki ne fakatata he hana tau mamatua? E, pihia. Ko e tama tane, kua leveki fakamakai mo e mahani fakamoli e Samuela hana matagahua kotofa mo e fakamahani foki ma e falu kotofaaga uho i loto he fekafekauaga he Atua. Ko e fiafia ne fakakite e Elekana mo Hana ke he fekafekauaga ha Samuela he faituga ne nakai oti he taute e ia hana tau matagahua i ai. Ne fakatumau a laua ke ahi atu tumau a ia ke foaki e fakamaloloaga mo e lalagoaga he tutuli e ia e gahua mau.​—1 Samu. 2:18, 19.

²⁸ Ko e fakafifitakiaga kehe lahi ha ia ne fakatoka e Elekana mo Hana ma e tau mamatua Kerisiano he vaha nei! Ka logona he tau fanau ha tautolu e tau talahauaga mai he loto fakaaue ma e kotofaaga he gahua he Peteli mo e kitia e aga foaki noa kua fakakite e tautolu he fakalaulahi atu e tau mena he Kautu, to feaki foki e lautolu e loto kua manako ke fekafekau ma e falu. Tokologa e tau mamatua kua to fakamitaki e manako nei i loto he tau fanau ha lautolu. Taha e tama fitu tau ne tohi: “Ka lahi au, manako au ke nofo he Peteli, ti ha ha ia au falu mena ka manako au ke taute i ai. (1) Lomi he tau mekasini Watchtower mo e Awake! (2) gahua he fahi ta fakatino, (3) fatufatu he fale unu. Ha mena ni kua fakaata mai. Nakai popole au.” Ko e mafanatia ha ia e loto ke kitia e aga makai pihia ka tupu he loto he tau fanau ha tautolu!

²⁹ Tau fanau, manatu “ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.” (1 Ioane 2:17) Fakatumau ke kumi e tau foliaga fakaagaga, putoia e tau kotofaaga uho he fekafekau he Peteli. Tau mamatua, kia muitua ke he fakafifitakiaga he tau tagata fakamoli i tuai ne fakamalolo e tau fanau ha lautolu ke feaki e mahani Atua. (2 Pete. 3:11) Kia taute e tautolu oti e vala ha tautolu ke lagomatai e tau matakainaga tane mo e fifine fuata ha tautolu ke fekafekau katoatoa ke he Tufuga Homo Ue Atu, he “toka ai e mena kua talahaua mai ke he mouiaga nai katoa mo ia kua tatali.”​—1 Timo. 4:8; Fakama. 12:1.

[Puha he lau 4]

Tau Lakaaga Aoga ma e Fekafekauaga he Peteli

● Papatiso kavi ke taha e tau

● Tagata fakaagaga mo e fakaalofa lahi ki a Iehova mo e hana fakatokatokaaga

● Mitaki e tuaga fakaagaga, manamanatuaga, loto, mo e fakatino

● Nofo mau i Niu Silani

● Maeke ke totou, tohi mo e vagahau faka-Peritania fakamitaki

● 19-35 e tau he moui