Ko e Uiina Fakalaulahi!
KO E uiina fakalaulahi ke he heigoa? Ke ahiahi e taha he tau la ofisa he Tau Fakamoli a Iehova, ne fa hagaao ki ai ko e Peteli. Kua 118 e la matapatu pehēnei he tau motu kehekehe. Ko e tau tagata ne ahiahi atu kua fa loto fakaaue ke he tau mena kua kitia e lautolu hane taute he Peteli.
He mole e kitia e tokologa he tau tagata gahua malolō hane fekafekau fiafia ki a Iehova he la ofisa i Mesikō, ne nava lahi e taha fuata ne fakaako Tohi Tapu ti hūhū a ia: “Ko e heigoa haaku ka taute ke nofo hinei?” Ne tala age ki a ia: “Fakamua, kua lata a koe ke papatiso. Ti mitaki mogoia ke gahua paionia—ko e tagata fakapuloa mau he Kautu.” Ne taute he fuata taane nei e tau mena ne tala age ki a ia, ti ua e tau he mole ne uiina a ia ke gahua he Peteli i Mesikō, ne fekafekau ai a ia ke molea e 20 e tau mogonei.
Ko e Heigoa e Peteli?
Ke he vagahau Heperu, kua kakano e kupu “Peteli” ko e “Fale he Atua.” (Kene. 28:19, matahui tala NW.) Ko e tau matakavi he tau la ofisa kehekehe ne fakaaoga ke lolomi mo e tufatufa e tau Tohi Tapu mo e tau tohi faka-Tohi Tapu mo e foaki e tau lagomatai fakaagaaga ke he molea e 100,000 fakapotopotoaga he Tau Fakamoli a Iehova he lalolagi katoa. Teitei 20,000 tagata gahua he Peteli—tau taane mo e tau fifine ne o mai he tau tuaga mo e tau feakiaga kehekehe—kua foaki noa ke fekafekau mau ki a Iehova mo e tau matakainaga fakaagaaga ha lautolu. Ko lautolu nukua leva e fakalataha ke he gahua faka-Kerisiano nei kua gahua auloa mo e tau fuata hakahakau. He tau magaaho afiafi mo e tau matahiku faahi tapu, ko lautolu he tau magafaoa Peteli ne fiafia ke fakalataha mo e tau fakapotopotoaga ne tata mai he Tau Fakamoli a Iehova ke he tau feleveiaaga mo e ke he fekafekauaga Kerisiano. Fakaaoga foki e lautolu e tau magaaho atā ha lautolu ke fakaako e Tohi Tapu, fakafiafia, mo e taute e tau mena fakatagata.
Kua moua e lautolu he magafaoa Peteli e tupe lagomatai tote he tau mahina takitaha. Olioli e lautolu e tau kai lolo mo e huhua mitaki ti nonofo he tau poko meā mo e hagahaga mitaki. Nakai talaga e tau kaina Peteli ke eke mo tau fale kua mua atu e mautū. Ka kua hagahaga mitaki. Ne nava e tau tagata ahiahi ha ko e maopoopo he tau fale mo e tau fonua mo e fakatokatokaaga holo mitaki ti pihia foki ke he aga totonu mo e kaufakalataha ne ha ha he Peteli. Gahua malolō e tau tagata oti, ka e nakai fai tagata ne lavelave lahi ke fakakite e aga kapitiga. He Peteli kua nakai fakavahega e tau tagata po ke fai logonaaga kua mua hake ha ko e matagahua haana. Kua aoga e tau matagahua oti, pete ko e fakameā fale, gahua he katene, tunu kai, po ke gahua he faahi taute pepa po ke ofisa. Ko e tau matakainaga he Peteli, kua gahua auloa ko e matakau ke lalago e fekafekauaga he Tau Fakamoli a Iehova.—Kolo. 3:23.
Feleveia mo e Falu Matakainaga he Peteli
Kia o mai la a tautolu ke kitekite fakalaulahi ke he magafaoa nei he lalolagi katoa. Ko e heigoa ne omoi a lautolu ke manako ke gahua he Peteli? Manamanatu ke he mena ne tupu ki a Mario. He magaaho ne eke a ia mo taha he Tau Fakamoli a Iehova, ne gahua totogi lahi a Mario he kamupanī motoka talahaua i Sihamani ti maeke a ia ke fakalaulahi atu e gahua haana. Nakai leva e papatiso haana, ne gahua foaki noa a ia ke taha e faahi tapu he Peteli he motu haana. Ne kotofa a ia ke gahua he lagomatai e lolomiaga tohi. Kua maeke a Mario ke kitia e kehekehe lahi he tau kapitiga gahua haana he Peteli mo lautolu he kamupanī haana. Ti tuku e tohi ole haana ke gahua mau he Peteli. Pete kua tokologa he magafaoa haana mo e tau tagata ne gahua mo ia ne uka ke maama e fifiliaga haana, kua gahua fiafia a Mario mogonei he Peteli i Sihamani.
Tokologa ne o atu ke gahua he Peteli ne nakai fai fakaakoaga po ke lotomatala pauaki. Pihia e mena ne tupu ki a Abel, ne gahua he Peteli i Mesikō ke he 15 e tau tau. “Ko e aoga mooli e Peteli ki a au,” he talahau e ia. “Fakaako au ke fakagahua e tau matini lolomi ne halavihi lahi. Ne iloa e au ko e lotomatala nei, to loga e tupe haaku ka gahua i fafo he Peteli, ka e to nakai moua e au e tau mena ne olioli e au hinei—ko e moui mafola mo e fiafia ne nakai tupetupe mo e fetotokoaki ke tuga e loga e gahuaaga he lalolagi. Logona hifo e au kua moua e au e fakaakoaga kua mua atu e mitaki, ko e fakaakoaga ne lagomatai au ke tupu fakaagaaga mo e lotomatala. To nakai fakaai au ke moua e tau mena aoga fakaagaaga ia pete ka fano he univesitī ne mua atu e talahaua.”
Ko e Ahiahi ne Maeke ke Atihake
He ahiahi ke he Peteli kua maeke ke lauia mitaki ke he tuaga fakaagaaga he tagata. Pihia e mena ne tupu ke he tama taane ko Omar, i Mesikō. Ne fakaako he matua fifine haana a ia ke he kupu mooli he Tohi Tapu. Ka e he 17 e tau moui, ne nakai liu a Omar fano he tau feleveiaaga mo e nakai fakalataha ke he gahua fakamatala. Fakahiku ti putoia a ia ke he tau mahani matahavala mo e puhala moui velevelekoloa. Fai magaaho he mole he gahua ma e kamupanī fakahoko fekau, ko Omar e taha tagata he matakau ne ahiahi atu ke he Peteli i Mesikō ke fakatātā e falu matini. Ne talahau e Omar: “He oti e taute e mautolu e fakatātāaga, ne uta he tau tagata ne leveki a mautolu ke fakakitekite ki ai. Ko e tau mena ne kitia e au mo e mahani totonu mai ki a au ne taute au ke manamanatu ke he holoaga he moui haaku mogonei ne kua vevehe kehe mai ia Iehova. Ne kamata agataha au ke liu fina atu he tau feleveiaaga mo e fakaako e Tohi Tapu. Ono e mahina he mole e ahiahi atu au ke he Peteli, ne papatiso au. Fakaaue au ki a Iehova ma e omoomoiaga ne moua e au he ahiahi atu ia ke he Peteli.”
Ko Masahiko i Sapanī, ne feaki hake foki he magafaoa Fakamoli. Pete ia, ne kamata a ia ke manamanatu kua fakakikili lahi mahaki e moui Kerisiano. Ne putoia lahi a ia he tau gahua aoga ti oti e fina atu ke he tau feleveiaaga mo e nakai fakalataha ke he gahua fakamatala. Ne manatu e Masahiko: “Taha e aho ne fifili e magafaoa ha mautolu mo e falu kapitiga Kerisiano ke o atu ke kitekite e Peteli. Ha kua fakamakamaka e magafaoa haaku, ne fano foki au. He kitekite ke he Peteli, ne logona e au e malolō foou ne nakaila logona ia e au fakamua. Ko e fiafia ne moua e au he lafi mo e falu Kerisiano he o atu he fenoga ko e taha mena kua nakaila mailoga e au mo e tau kapitiga haaku ne nakai ko e Tau Fakamoli. Ne tupu hake ia au e manako ke he moui Kerisiano, ti fifili au ke ole ma e fakaako Tohi Tapu.” Kua eke a Masahiko mogonei ko e fekafekau mau he fakapotopotoaga haana.
Ko e matakainaga fifine Fakamoli mai i Falani ne hiki ki Moscow ke gahua. I ai ne nakai matutaki a ia mo e tau tagata ha Iehova ti lolelole fakaagaaga. Ne putoia a ia ke he taute mena hehē ti fakahiku mau ke he tagata ne nakai ko e Fakamoli. Ne fina atu e matakainaga fifine fakaagaaga mai i Falani ke feleveia mo ia, ti ō tokoua a laua ki St. Petersburg, i Rusia, ke ahiahi atu e kaina Peteli i ai. Ne tohi e ia: “He Peteli, ne fakafeleveia mafanatia a maua, ti fai logonaaga au ke he mena nei. Kua ha ha i ai e mafola lahi. Ne logona hifo e au e agaaga ha Iehova. Maeke fēfē au ke taute e hehē he tafea kehe mai he fakatokatokaaga ha Iehova? He mole e ahiahi atu haaku ke he Peteli, ne liogi au ma e lagomatai ha Iehova ti kamata ke fakaako e tau fanau haaku ke he Tohi Tapu mo e loto malolō foou.” Lafi ke he falu lagomataiaga fakaagaaga ne liga moua he Fakamoli nei ne lolelole fakaagaaga he mogoia, kua fakamalolō lahi a ia mogonei ha ko e ahiahi atu ke he Peteli ti holo ki mua he magaaho fakamui.
Ka e kua e logonaaga ha lautolu ne ahiahi atu ke he Peteli ne nakai mahani mo e Tau Fakamoli a Iehova? He 1988, ko Alberto, ne putoia lahi mahaki ke he tau mena politika, ne ahiahi atu ke he Peteli i Parasili. Ne nava lahi mahaki a ia he meā, maopoopo, mo e mua atu ke he puhala atāina ne fakaholo aki e tau gahua. Nakai leva ato fina atu ke kitekite ke he Peteli, ne ahiahi atu a Alberto ke he aoga lotu ne fekafekau e taane he mahakitaga haana ko e akoako. Ne mailoga e Alberto e kehekehe. “Ko e tau mena oti ne taute i loto he aoga lotu kua taute fakagalogalo ai,” he talahau e Alberto. Nakai leva he mole e ahiahi atu haana ke he Peteli, ne talia e ia e fakaako Tohi Tapu, tiaki e tau mena politika, ti kua eke mogonei mo motua he fakapotopotoaga.
Ahiahi Mai ke he Peteli!
Tokologa ne lali fakalahi ke ahiahi atu e la ofisa he motu ha lautolu. Ma e fakatai, i Parasili, ko Paulo mo Eugenia ne fā e tau he fakaputu tupe ke totogi e fenoga ha laua he pasi ne 3,000 kilomita ke ua e aho ke kitia e Peteli he motu ia. Pehē a laua: “Ne aoga lahi mahaki e laliaga ia. Kua maama lahi e maua mogonei e fakatokatokaaga ha Iehova. Ka fakamaama e maua e gahua ne taute he Peteli ke he tau tagata fakaako Tohi Tapu ha maua, ne fa hūhū a lautolu, ‘Kua ō ka mua ki ai?’ Maeke a maua mogonei ke pehē ē.”
Fai la ofisa mo e kaina Peteli nakai e motu haau po ke motu ne tata mai? Kua uiina e mautolu a koe ke ahiahi atu e tau kaina nei. To fakafeleveia mafanatia atu mooli ki a koe mo e to moua e koe e malolō fakaagaaga lahi he ahiahi atu ke he Peteli.
[Fakatino he lau 18]
Mario
[Fakatino he lau 18]
Abel
[Fakatino he lau 18]
Sihamani
[Fakatino he lau 18]
Sapanī
[Fakatino he lau 18]
Parasili