Magaogao Nakai a Koe ke Fekafekau he Matakavi ne Tokogaogao?

¹ Ha ha i ai nakai ia koe e manamanatuaga ke finatu ke he taha matakavi ne tokogaogao e tau tagata fakamatala he Kautu? Kaeke uiina ke “hau a . . . , mo e lagomatai mai,” to tali nakai a koe tuga e aposetolo ko Paulo? (Gahua 16:9, 10) Ne loga e tau fakapotopotoaga ne manako lahi ke he tau magafaoa malolo fakaagaga, e tau paionia ke eke lagomatai ke he fonua, po ke tau motua lotomatala mo e tau fekafekau lagomatai ke takitaki. Lafi ki luga, laulahi e tau maga tote ne veha mamao ke he tau matakavi lalahi i fafo he taone. Kua mamao ligo e Fale he Kautu ne kua tatatata ki ai. Kua temotemoai e tau pu gahua. Ne fa nakai mitaki e matagi i ai. Ati mahalo nakai a koe ke talia e paleko pihia? Ti kua kautu mai fefe he mena nei?

² Kia Tua mo e Falanaki: He maveheaga he Atua, ne toka hifo e Aperamo e kaina hana i Uro ti tukufenoga atu 960 kilomita ki Karana fakalataha mo e hana hoana, nefiu, mo e matua tane motua, ko Taraha. (Kene. 11:31, 32; Nehe. 9:7) Ne mate a Taraha, ti poaki e Iehova a Aperamo, anei e tau ko e 75, ke toka hifo a Karana mo e tau magafaoa hana ke fenoga ke he motu ka fakakite age he Atua ki a ia. “Ti o ai” a Aperamo, Sarai, mo Lota. (Kene. 12:1, 4, 5) Kua moli, nakai finatu a Aperamo ha kua tokogaogao e tau fekafekau ne manako i ai. Ka e ha i ai e mena ne aoga ke he hana fenoga. Ko e heigoa a ia?

³ Nukua tua mo e falanaki a Aperamo ati kua maeke ke taute e fenoga pihia. Ko e manamanatuaga mo e puhala he mouiaga hana kua faliu lahi. Ne toka hifo e ia e tau faoa mo e haohaoaga mitaki hana. Ka e tua a ia ki a Iehova ke leveki age a ia mo e hana magafaoa. Tokologa he vaha nei ne fakakite e falanakiaga pihia ki a Iehova.

⁴ Kua fifili tuai e Iehova ke fakamatala e tala mitaki “ke he tau atu motu oti” to hoko mai ai e fakaotiaga. (Mata. 24:14) Nukua iloa e mena nai, kaeke maeke ia koe, mahalo nakai a koe ke fano ke he taha matakavi ne tokogaogao lahi? Loga e tau matakavi ne ha ha i ai e manako pehenai.

⁵ Fano ke he Matakavi ne Tokogaogao: Kua okioki kia a koe? Fai tupe moua nakai ne ha ha ia koe? Kaeke nakai, ti maeke nakai ia koe ke kumi taha gahua ma hau? Ka e kua he fakaaoga e telefoni po ke komopiuta ko e puhala ke taute e gahua he ha matakavi noa? Kaeke nakai ata a koe ke fano kehe, ti maeke nakai ia koe ke lagomatai taha he hau a magafaoa ke fekafekau he taha matakavi?

⁶ Kaeke kua oti e liogi ti logona kua maeke ia koe ke fano ke he matakavi ne tokogaogao e tau tagata, ti fakatutala ke he magafaoa hau mo e tau motua he fakapotopotoaga hau. Ati, tohi e tohi ti age ke he tau motua ke fakamau hifo foki e lautolu e tau talahauaga mo e tau tomatomaaga ha lautolu ato fakafano atu ke he la ofisa.

⁷ Heigoa kua lata ke fakamau hifo ke he tohi hau? E tau he hau moui, aho he papatisoaga, e tau matagahua ke he fakapotopotoaga, tuaga he fakamauaga, mo e po kua fai fanau ikiiki nakai a koe. Fakamau hifo e tau fahimotu ne manako a koe ke fekafekau ki ai, hagaao ke he tuaga hau. Ke fakatai, maeke nakai ia koe ke nofo he tau fahi kua vela mo e aafu? Maeke nakai ia koe ke fakauka ke he tau matakavi makalili? Vagahau nakai e koe e vagahau he taha motu kehe?

⁸ Ko e tagata makaukau mo e makutu nakai a koe? Ataina nakai ia koe ke fekafekau he matakavi ne tokogaogao lahi e tau tagata? Kaeke pihia, ati kitekite e puhala kua liligi hifo tumau e Iehova e tau fakamonuinaaga lahi ue atu ki luga ia lautolu ne falanaki ki a ia ha kua fakakite e lautolu e aga fakamakai!​—Sala. 34:8; Mala. 3:10.