Fakakatoatoa Fakatonu Kia e Koe e Fekafekauaga Hau?
1 He tohi ha Gahua, ne talahau ki a tautolu kua fakakatoatoa he tau tutaki e fekafekauaga ha lautolu he “talahau fakatonu atu” ai ke he tau tagata. (Gahua 2:40; 8:25; 28:23) Ko e foliaga moli he aposetolo ko Paulo a ia. (Gahua 20:24) Nakai kia ko e foliaga hau a ia ko e ekegahua he tala mitaki? Fakakatoatoa fefe e koe e mena nei?
2 Mautali e Fakatataaga Hau: Ke moli kua fakamatala mitaki a koe he fekafekauaga, kua aoga lahi e mautali. Kua mua atu e moli he mena nei ka foaki e koe e tau mekasini, ha ko e mena hikihiki tumau e matakupu he tau vala tala. Ke lagomatai a tautolu ke katoatoa mitaki, ko e fufuta nei he Ha Tautolu a Fekafekauaga he Kautu kua fakatata e tau puhala fou—ko e atu he fahi hema, ko e tau fakatataaga kehekehe ma e tau mekasini Watchtower mo e Awake! fou. Ko e matakupu ka fiafia ki ai e tau tagata tokologa kua fakakite ai he tau fufuta takitaha. To mailoga e koe e tau fakatataaga nei ke lata mo e tau mekasini faka-Peritania. Pete ia, to moua e koe falu fakatataaga he Watchtower nukua fakakite mai he falu fufuta faka-Niue. Kamata fefe e koe e tau fakatataaga kuku nei?
3 Fifili e talahauaga kua manatu e koe to lauia mitaki he matakavi hau. Totou fakamitaki e vala i loto, ti mailoga e tau manatu pauaki kua liga fakalagalaga e fiafia. Kumi e kupu tohi i loto he mekasini kua felauaki mo e fakatutalaaga mo e liga ke maeke ia koe ke totou ke he tagata he kaina. Lafi fakaku he fakahiku ki a ia ke fakamalolo e tagata fanogonogo hau ke totou e mekasini mo e talahauaga ku, ka lata, ti maeke he tagata he kaina ke foaki taha mena fakaalofa ke he gahua he Tau Fakamoli a Iehova he lalolagi katoa. Mogonei, ako tumau e fakatataaga hau.
4 Fakatoka ke Fakaaoga e Tohi Tapu: Mo e fakatokaaga mitaki, kia totou e kupu tohi he fakatataaga hau. Ma e fakatai, ko e tau tagata fakailoa mahani he tau matakavi loga kua kautu ai he o ke he tau gutuhala mo e Tohi Tapu ha he lima, ne fakafeleveia e tagata he kaina, mo e pehe:
◼ “Kua huhu a mautolu ke he tau tagata kaeke ke talitonu a lautolu ke he mena nei . . . ” Totou Kenese 1:1, ti huhu: “Talitonu nakai a koe mo e talahauaga ia?” Ka talitonu e tagata, ti talahau: “Talitonu foki au. Pete ia, manatu nakai a koe kaeke ke tufugatia he Atua e tau mena oti, kua lago foki kia ia e tau mahani kelea?” He talia e tali he tagata, totou e Fakamatalaaga 7:29. Hafagi e tohi Iloilo ke he lau 71 ti totou e paratafa 2. Fakamalolo e tagata ke totou e tohi.
5 Liu Ahi Atu ki a Lautolu Oti kua Fiafia: Nakai fakakatoatoa oti e koe e fekafekauaga hau ka nakai liu ahi atu a koe ke he tau tagata fiafia kua moua e koe. Ka fakatutala mitaki mo koe, pete ko e tau mekasini po ke tau tohi ne foaki e koe, kia fakamau hifo e higoa he tagata mo e kaina. Ko e lali fakamakamaka ke feaki e fiafia he tagata ka liu atu mafiti. Kia foaki e fakaakoaga Tohi Tapu.
6 Ne iloa he tau tutaki he senetenari fakamua na poaki e Iesu ki a lautolu ke “talahau fakatonu atu.” (Gahua 10:42) Kua hagaao foki e poakiaga ia ki a tautolu, ha ko e puhala ni a ia ke maeke ia tautolu ke taute tutaki. (Mata. 28:19, 20) Kia eketaha a tautolu ke fakakatoatoa oti e fekafekauaga ha tautolu.—2 Timo. 4:5.