Falanaki ki a Iehova ma e Malolo
1 Ma e loga e tau kakano, kua lata ia tautolu ke falanaki ki a Iehova. He fakamatala e tala mitaki “ke he tau atu motu oti” ko e matagahua paleko. (Mata. 24:14) Kua taufetului mau a tautolu mo e tino agahala ha tautolu. (Roma 7:21-23) Lafi ki ai, ‘ko e mena tau a tautolu ke he tau iki he pouli ha he lalolagi nai.’ (Efeso 6:11, 12) Mailoga ai, kua lata lagomatai a tautolu. Moua fefe e tautolu e malolo mai ia Iehova?
2 He Liogi: Kua foaki noa e Iehova hana agaga tapu malolo ke he tau fekafekau hana kua ole ki ai. (Luka 11:13) Kua nakai mauokafua kia a koe he lotomatala hau ke fakamatala he taha fale ke he taha fale, he puhala tu, po ke he telefoni? Kua ma kia a koe he fakamatala noa? Kua tote maka kia e makai hau ha ko e favale he tau tagata he fonua? Ka e kua ka peehi a koe ke fakahui e tua po ke mahani fakamoli hau? Falanaki ki a Iehova. Liogi ma e hana malolo.—Filipi 4:13.
3 He Kumikumi Fakatagata: Tuga ni he moua e tautolu e malolo he kai e tau mena kai tino, ti malolo fakaagaga foki a tautolu he fagai tumau ke he Kupu he Atua mo e ke he tau tohi he “fekafekau fakamoli mo e loto matala.” (Mata. 4:4; 24:45) He huhu ki a Stanley Jones ko e heigoa ne foaki ki a ia e malolo ke fakauka he tau tau fakahala he fale pouli i Saina ka e nakai fai Tohi Tapu, ne pehe a ia: “Maeke ia tautolu ke tutu mau he tua. Moli, kua lata ke fakaako mua a tautolu. Nakai fai malolo a tautolu i loto ka nakai fakaako a tautolu.”
4 He Fakalataha ke he Feleveiaaga: He feleveiaaga Kerisiano he senetenari fakamua, “kua fakamafana [a Iuta mo Sila], mo e fakamalolo e laua e tau matakainaga ke he tau kupu loga.” (Gahua 15:32) Pihia foki ke he vaha nei, ko e mena kua logona e tautolu he tau feleveiaaga kua fakahokulo e loto fakaaue ha tautolu ma Iehova, ati hake e tua ha tautolu, mo e omoomoi a tautolu ma e fekafekauaga. Kua ta mai he tau feleveiaaga e matutaki tumau ha tautolu mo ‘lautolu ni kua gahua fakalataha ke he kautu he Atua,’ nukua eke ai mo “fakamafanatia” ki a tautolu.”—Kolo. 4:11.
5 Lata lagomatai a tautolu he ‘tau aho fakamui ko e tau aho uka’ nei. (2 Timo. 3:1) Hagaao ki a lautolu kua moua mai e malolo ia Iehova, kua mafanatia a tautolu: “To o hake a lautolu ke he tau tapakau po ke aeto; to tafepoi a lautolu ka e nakai mategugu; to o a lautolu, ka e nakai lolelole ai a lautolu.”—Isa 40:31.