Ko e Tali Fakamakai!
1 Ko e tau magafaoa Kerisiano he tau matakavi oti ne fakakite e fakaaueaga fakamakai ha lautolu ma e vitio Young People Ask—How Can I Make Real Friends? Ne pehe e matua tane he Tau Fahi Kaufakalataha he oti e kitekite ki ai, ne nonofo fakalogologo e tau tama tane hana—kua maeke ia lautolu ke talia e tau mena oti he vitio! Kua talahau he hokotaki mai i Malaui kua mailoga foki he tau matakainaga fuata i ai ha kua tupu e tau pehiaaga pihia ki a lautolu mai he tau kapitiga atutaha ha lautolu he aoga. Ne pehe e matua tane i Sihamani hagaao ke he vitio: “Kua onoono au ki ai ko e tali ke he tau liogi haku.” Ne pehe e fuata: “Fakaaue he fakamanatu mai ki a au na leveki moli e Iehova au.” Ne hokotaki he motua i Niu Silani: “Ne lagomatai e taha he ha maua a tau fuata mui ke liu mai ke he puhala he moui.” Ne kitekite ai he fifine fai tane mo e pehe: “Ko e manako ha ia haku ke kitekite he tau tagata fuata oti he kupu moli e vitio nei mo e fakalagalaga ai ke eke e kupu moli ma lautolu ni!” Tau magafaoa, he ha he liu ke kitekite foki? Ka oti ia, ti fakatutala auloa ke he tau huhu na i lalo.
2 Kamataaga: Ko e heigoa e kapitiga moli?—Fakatai 18:24.
3 Tau Mena Vihi ke he Kapitiga: Maeke nakai ia koe ke fahia mai he logonaaga tonoa? (Filipi 2:4) Ko e lata he ha ia koe ke fiafia ke fakaholo ki mua e aga fakatagata hau, ti ko hai ka lagomatai a koe ke taute pihia? Ko e heigoa ka hafagi e tau magaaho ke moua loga e tau kapitiga, ti moua i fe a lautolu ia?—2 Kori. 6:13.
4 Kapitiga mo e Atua: Maeke fefe ia koe ke feaki e fakafetuiaga mo Iehova, ti latatonu he ha e laliaga? (Sala. 34:8) Ko hai kua mua ue atu e fakamaloloaga ke he kapitiga hau mo e Atua?
5 Tau Vahega Kapitiga Hepe: Ko hai a lautolu e tau feoakiaga mahani kelea? (1 Kori. 15:33) Maeke fefe he tau kapitiga hepe ke takitaki taha ke moumou fakaagaga? Ko e heigoa kua fakaako atu he tala he Tohi Tapu ki a koe hagaao ki a Tina?—Kene. 34:1, 2, 7, 19.
6 Ko e Taute Tala he Vaha Fou Nei: Lauia fefe a Tara he matimati? Fakamaama fefe e ia nukua mitaki e feoakiaga hana mo e tau fuata he lalolagi? Ko e heigoa e tau hagahagakelea ne fakatapakupaku e lautolu a ia ki ai? Ko e kaumahala he ha e tau matua hana ke kitia e hagahagakelea kua hoko ki a ia, ka e he aga fe ne lagomatai e laua a ia ke liu malolo fakaagaga? Fakamoli fefe e matakainaga fifine paionia ke eke mo kapitiga moli ki a Tara? Kua lata he ha e tau Kerisiano ke muitua ke he Tau Fakatai 13:20 mo e Ieremia 17:9? Ko e heigoa e fakaakoaga aoga ne ako e Tara?
7 Fakaotiaga: Ko e heigoa e tau fakaakoaga ne ako mai e koe he vitio nei? Fakaaoga fefe e koe ke lagomatai aki e falu?—Sala. 71:17.