Ko e Vitio kua Lata ke Manamanatu Fakahokulo ki Ai
“Taute he vitio nei a koe ke manamanatu!”
“Hokotia ai ke he loto haaku!”
“Ne lauia lahi e logonaaga haaku!”
1 Pihia nakai e logonaaga haau he oti e kitekite he vitio Young People Ask—How Can I Make Real Friends? He tau tau kua mole, ne fehagai e matakainaga taane fuata mo e tuaga vihi he moui haana, kakano ni ha ko e tau kapitiga ne fifili e ia. Ne fakatupu e lautolu a ia ke nakai fiafia ke he kupu mooli, mo e galo e fakafetuiaga haana mo Iehova. Ti fakatoka mai e vitio Real Friends. Ne tohi e ia: “He lagaloga e kitekite au ke he vitio, ne mokulu e tau hihina haaku. Ne fakaaue au ki a Iehova ma e lagomatai he magaaho tonu.” Ne omoomoi he vitio a ia ke hiki haana moui mo e kumi e tau kapitiga hako. Ne lafi e ia: “Kua iloa mooli e mutolu e tau mena ne fehagai mo e tau fuata mogonei.” Tau matua mo e tau fuata, ko e ha he nakai liu ke kitekite e vitio he fakaakoaga fakamagafaoa ha mutolu ka hau? Fakamanou he tau vala takitaha, ti ataina mo e fakamooli he fakatutala auloa ke he tau hūhū he tau paratafa i lalo.
2 Kamataaga: Ko e heigoa e kapitiga mooli?—Fakatai 18:24.
3 Tau Puhala ne Taofi e Aga Kapitiga: Maeke fēfē a koe ke kautu mai he logonaaga kua tu kehe tokotaha? (Filipi 2:4) Ko e ha kua lata ia koe ke makai ke fakaholo ki mua e aga haau, mo e ko hai ka lagomatai a koe ke taute e mena ia? Ko e heigoa ka hafagi e tau tutuaga mitaki ki a koe ke fai kapitiga atu foki, ti moua i fe a lautolu ia?—2 Kori. 6:13.
4 Kapitiga mo e Atua: Maeke fēfē ia koe ke feaki e fakafetuiaga tata lahi mo Iehova, mo e ko e ha kua aoga ai e laliaga ia? (Sala. 34:8) Ko hai kua mua atu e mitaki ke fakamalolō e kapitiga haau mo e Atua?
5 Ko e Tau Vahega Kapitiga Hepe: Ko hai e tau kapitiga kelea? (1 Kori. 15:33) Maeke fēfē e tau kapitiga hepe ke takitaki e tagata ke he moumou fakaagaaga? Ko e heigoa ne fakaako ki a koe mai he tala Tohi Tapu ki a Tina?—Kene. 34:1, 2, 7, 19.
6 Ko e Tala ne Tupu he Vahā Foou Nei: Lauia fēfē a Tara he matimati? Ne fakamaama fēfē e ia e kakano ati lafi a ia mo e tau fuata he lalolagi? Ko e heigoa e tau tutuaga hagahaga kelea ne fakatapakupaku e lautolu a ia ki ai? Ko e ha ne kaumahala e tau matua haana ke mailoga e hagahaga kelea kua putoia a ia ki ai, ka ko e heigoa e aga ne lagomatai e laua a ia ke liu malolō fakaagaaga? Fakamooli fēfē e matakainaga fifine paionia mo kapitiga mooli ha Tara? Kua latatonu he ha e tau Kerisiano ke omaoma ke he Tau Fakatai 13:20 mo e Ieremia 17:9? Ko e heigoa e fakaakoaga aoga ne ako e Tara?
7 Fakaotiaga: Ko e heigoa e tau fakaakoaga ne ako mai e koe he vitio nei? Fakaaoga fēfē e koe ke lagomatai aki e falu?—Sala. 71:17.