Fakatumau ke Aoga Mai he Ko e Kolo Toko mo e Awake!

Kua fakaoti tuai e tau ota mekasini fakahu he tau Kolo Toko mo e Awake! mogonei, ti kua manako mo e lali ke iloa moli e tautolu, mo lautolu kua fakamatala a tautolu ki ai, ke aua neke to noa ha fufuta.

Tau Lagaki Fakatagata: Ka fakaoti e ota mekasini fakahu hau ni, kia fakamalikiti e ota hau mogonei ke he tau mekasini moua. Kua lata e tau matua ke ota fakalahi e tau mekasini ke igatia e tau tagata he magafaoa mo e lagaki ni hana. He tohi e higoa hau he lagaki fakatagata ka fakakite ke nakai pokia ke foakiaga ke he fonua. Ka hoko mai e tau mekasini, ko e matakainaga ne taute ai ka taute e tau fufuta takitaha ke moua mafiti he Fale he Kautu.

Tau Fakaholoaga Mekasini: Kua lata e tau tagata fakailoa ke lali ke fakatu e fakaholoaga mekasini mo lautolu kua manako moli ke moua e tau fufuta takitaha. Ko e hoko tino atu ke ta atu e tau mekasini ki a lautolu ia ka moua e magaaho ke feaki e fiafia kua fakakite ti kamata e tau fakaako Tohi Tapu.​—Kikite Ha Tautolu a Fekafekauaga he Kautu ia Oketopa 1998, lau 8.

Lautolu ne Lata Pauaki: Ka fakakite he taha e manako moli ka e nofo mamao, fai fakaataaga ai ke maeke ia ia ke moua e tau mekasini he puhala ota mekasini fakahu. Kaeke nofo e tagata he matakavi he fakapotopotoaga ka e nakai moua e fakaholoaga mekasini ka kua manako moli ke moua e tau mekasini, kia fakatutala e matakupu mo e Komiti Fekafekau he Fakapotopotoaga. Ka talia e lautolu, kua maeke ke taute e ota mekasini fakahu ma e tagata ia ne manako. Ko e tau lau ota mekasini fakahu kua fakatoka (M-1 mo e M-101) ka fakaaoga ma e kakano nei.

Mauokafua a tautolu to fakatumau a Iehova ke fakamonuina e tau laliaga oti ha tautolu ke talahau e Kautu he puhala he Ko e Kolo Toko mo e Awake!