Tamai he Gana Fakalahi e Tau Monuina Loga
1 Onoono atu oti a tautolu ke he fakamoliaga he tau maveheaga mua ue atu ne tu he Kupu he Atua. Pihia foki mogonei, kua foaki mai e Iehova e tau monuina loga kua lafi ke he fiafia he tau momoui ha tautolu. Ke aoga katoatoa ki a tautolu takitokotaha, nukua falanaki fakalahi ai ke he laliaga kua foaki e tautolu. He talahau ai he aposetolo ko Paulo, “ko ia kua fakalahi hana saito kua gana, to fakalahi foki hana helehele mai.” (2 Kori. 9:6) Kitekite la ke he ua e fahi kua aoga ai e matapatu fakaakoaga nei.
2 Ko e Fekafekauaga Fakatagata ha Tautolu: He talahau atu e tala mitaki ke he falu ka maeke ia tautolu ke fakamatala kua tamai ai e tau fua loga. (Fakatai 3:27, 28) Nava ai, tokologa kua gana fakalahi he fakalaulahi e fai vala ha lautolu ke he fekafekauaga, putoia e paionia fakaku po ke tumau. Maeke ia tautolu oti ke gana fakalahi he liliu fakamoli ke feaki e fiafia ne moua mo e foaki e fakaakoaga Tohi Tapu ka maeke. (Roma 12:11) He eketaha a tautolu ke he tau puhala nei kua fua mai e tau mouaaga atihake mo e olioli holo ki mua he fekafekauaga ha tautolu.
3 Lagomatai e Tau Mena he Kautu: Ne talahau a Paulo hagaao ke he ‘gana fakalahi’ ke felauaki mo e foaki he tau koloa. (2 Kori. 9:6, 7, 11, 13) He vaha nei, lahi e mena ke taute e tautolu he foaki ke he puhala fakatino mo e koloa ke lagomatai aki e tau mena he Kautu. Maeke ia tautolu ke lagomatai e talaga he tau Fale he Kautu mo e tau Fale Toloaga. Foaki foki e tautolu a tautolu ke fakalataha he fakamea mo e leveki e tau matakavi nei ma e tapuakiaga moli. Lafi ki ai, maeke ia tautolu ke foaki fakatupe ma e tau mena totogi he fakapotopotoaga ti pihia mo e gahua fakamatala mo e taute tutaki he Kautu he lalolagi oti. He igatia a tautolu mo e taute e vala ha tautolu, ko e fiafia ha ia ke kitia e monuina lahi ha Iehova ki luga he gahua nei ne kotofa he Atua!—Mala. 3:10; Luka 6:38.
4 Kua tomatoma mai he Kupu he Atua ki a tautolu ke ‘mahani mitaki atu, kia maukoloa ke he tau gahua mitaki, kia fakamokoi, mo e ta atu noa ha lautolu a tau mena.’ He omaoma a tautolu ke he fakamafanaaga ia, kua olioli e tautolu e tau monuina loga he mogonei. He magaaho taha, kua “tauteute e [tautolu] e koloa ma [tautolu ni] ko e fakaveaga mitaki mo e tau aho ne tatali [mo e] toto atu e [tautolu] ke he moui tukulagi” i mua.—1 Timo. 6:18, 19.