“Kia Fakamokoi, mo e Ta Atu Noa e . . . Tau Mena”
1 He tau senetenari i tuai ne fakaako he aposetolo ko Paulo a Timoteo ke fakamalolo e tau matakainaga talitonu ke “mahani mitaki atu a lautolu, kia maukoloa a lautolu ke he tau gahua mitaki, kia fakamokoi, mo e ta atu noa e lautolu ha lautolu a tau mena.” (1 Timo. 6:18) Ne fakamanatu age foki e Paulo ke he tau Kerisiano Heperu ke nakai nimo “ke mahani mitaki atu mo e fakaalofa atu.” (Hepe. 13:16) Ko e tohi he ha e ia e tau fakaakoaga nei? Kakano na iloa e ia to ha ha ai e “fakahekeaga, mo e lilifu, mo e monuina kia lautolu oti kua eke e mahani mitaki.”—Roma 2:10.
2 Kakano ko e hana tuaga Tufuga, ko e Pule a Iehova ko e Atua ke he tau mena oti. (Fakakite. 4:11) Kua loto fakaaue moli a tautolu ke he mena kua taute e ia ke lata mo e hana tau koloa. Pete ne aga nakai fakaaue he tau tagata tokologa, kua fakatumau ni e Mua Ue Atu ke fakaata e tau tagata ke aoga mai he tau foakiaga fakamokoi hana ma e tumauaga he moui. (Mata. 5:45) Ti foaki foki e ia e Tama fakahelehele hana ke eke mo poa ke liga maeke ia tautolu ke moua e moui tukulagi. Nakai kia ko e fakaalofa kua fakakite ki a tautolu nukua omoi a tautolu ke fakamoli kua fakaaue a tautolu he fakamokoi ke he falu tagata?—2 Kori. 5:14, 15.
3 Ko e Heigoa ha Tautolu ka Ta Atu Noa? Kua lata tonu ni hokoia ke fakaaoga e tautolu ha koloa kua ha ha ia tautolu ke he puhala kua mitaki ke he fofoga he Atua. Moli kua manako a tautolu ke lalago e gahua he Kautu he lalolagi katoa ke he puhala fakatino mo e fakaagaga. Moli, ko e koloa uho lahi e tala mitaki ka moua he ha tagata, ha ko e “mana he Atua ia ke momoui ai.” (Roma 1:16) He fakaaoga fakamokoi e tau magaaho mo e tau koloa ha tautolu he tau mahina takitaha ke lagomatai e gahua fakamatala mo e fakaako, liga maeke ia tautolu ke ta atu e koloa fakaagaga nei ke he falu, takitaki atu ke moua e lautolu e moui tukulagi.
4 Fiafia lahi a Iehova ka lagomatai e tautolu a lautolu ne nonofogati. Kua mavehe mai e ia e tau monuina, ti fakamanatu mai foki e ia ki a tautolu: “Nakai aoga e koloa ke he aho ke tupu ai e ita; ka ko e mahani tututonu to laveaki e ia mai he mate.” (Fakatai 11:4; 19:17) Ko e lagomatai fakatino e gahua he Kautu mo e fakalataha katoatoa he fakamatala e tala mitaki ko e tau puhala homo ue atu kua fakakite e fakamokoi, mo e ta atu noa e tau mena.