“Kia Maukoloa . . . ke he Tau Gahua Mitaki”

¹ He tau vaha fakahiku he hana fekafekauaga makutu, ne gahua fetataaki e aposetolo ko Paulo mo Timoteo mo Tito. Kia laua tokoua, ne tohi fakatatai e ia e tau kupu fakamalolo. Ne tala age a ia ki a Tito ko “lautolu kua tua ke he Atua” nukua lata ke “fakamahani ke he tau gahua mitaki.” (Tito 3:8) Ne tala age a ia ki a Timoteo ko lautolu kua fakave ha lautolu a amaamanakiaga ke he Atua kua lata “kia maukoloa . . . ke he tau gahua mitaki.” (1 Timo. 6:17, 18) Ko e hatakiaga mitaki ue atu anei ma tautolu oti! Ka ko e heigoa ka fakalagalaga a tautolu ke taute e tau gahua mitaki he tau momoui ha tautolu? Ti ko e heigoa e tau gahua pauaki ka liga taute e tautolu he tau aho i mua?

² Ko e fakalagalaga ma e monuina ke he tau gahua hako kua puna mai he taofiaga mo e fakaalofa ha tautolu ma Iehova mo e mai he amaamanakiaga homo ue atu kua foaki mai e ia ki a tautolu. (1 Timo. 6:19; Tito 2:11) Mua atu ke he magaaho nei he tau, kua fakamanatu ki a tautolu na fakafano mai e Iehova hana Tama ke he lalolagi ke maeke ia Iesu ke fakatokoluga hana Matua mo e foaki e puhala ke he moui ma e tau tagata oti kua lata. (Mata. 20:28; Ioane 3:16) To kitia maali e mena nei ke he Fakamanatuaga he mate he Keriso ia Mati 28. He tali atu ke he amaamanakiaga kua ha ha ia tautolu he moua e moui tukulagi, nakai kia fakalagalaga a tautolu ke taute e tau mena oti kua maeke ia tautolu “kia maukoloa . . . ke he tau gahua mitaki”? Hane taute pihia e tautolu! Ko e heigoa e tau gahua kua liga taute e tautolu mogonei?

³ Tau Gahua Mitaki ke Taute ia Mati Atu ki Mua: Moli, to fakalataha a tautolu ke he Fakamanatuaga​—ko e mena tupu aoga lahi he tau ma e Tau Fakamoli a Iehova he lalolagi katoa. (Luka 22:19) Ka e manako a tautolu ke folafola e olioli he magaaho ia mo e tokologa. Onoono ke he hokotaki he fekafekauaga he 2002 Yearbook, mo e to kitia e koe he tau kua mole he tau motu loga he lalolagi katoa, ko e fakalatahaaga he Fakamanatuaga ko e tolu, fa, lima, po ke molea e fakalahi he numera he tau tagata fakailoa. Moli kua gahua malolo a lautolu oti he tau fakapotopotoaga ke tufatufa fakalaulahi e tau uiina he Fakamanatuaga he matakavi katoa ha lautolu. Ko e mena ia, kua manako a tautolu ke fakaaoga fakalahi e tau magaaho ka maeke ia tautolu he vahaloto mogonei mo e Mati 28 ke uiina e tau tagata ke he Fakamanatuaga, he lagomatai a lautolu ke ako hagaao ke he amaamanakiaga he fakamouiaga.

⁴ Magaaho ka hoko mai a Aperila, to moua fefe a tautolu ke “maukoloa ke he tau gahua mitaki”? He fakatumau ke folafola hakahakau ke he gahua fakamatala he tala mitaki, hane “fakamakutu ke he tau gahua mitaki.” (Tito 2:14; Mata. 24:14) Ka nakai maeke ia koe ke paionia fakaku ia Mati, maeke nakai ia koe ke taute pihia ia Aperila mo/po ke ia Me? Kaeke ke paionia a koe ia Mati, maeke nakai ia koe ke matutaki?

⁵ Ko e falu kua gahua tupe kua maeke ia lautolu ke fakaaoga taha e tula po ke fiha ke he fekafekauaga he fina atu ke he gahua, he fakamatala he puhala tu po ke ahi atu ke he tau tagata gahua pisinisi kua hafagi tuai he magaaho pogipogi. Kua fakatoka he falu e vala he tau magaaho kai la ha lautolu ke fakamatala. Ko e falu ia lautolu ne maeke ai ke taute e fakaakoaga Tohi Tapu he magaaho ia mo e tagata gahua. Tokologa he tau matakainaga fifine ko e tau hoana ne maeke ke fakatoka e magaaho ma e gahua he fonua ka ko e tau tama agaia he aoga. He uhu matike tuai he falu aho ke taute e tau gahua kaina, lahi mogoia e magaaho ha lautolu he aho ma e fakamatala mo e gahua fakaako.​—Efeso 5:15, 16.

⁶ Pete ne nakai maeke ia koe ke paionia fakaku, liga maeke ia koe ke fakatokatoka e fakaholoaga fakatagata hau ke gahua fakalahi he fekafekauaga, he taute e mena kua fahia a koe ke ‘mahani mitaki atu kia maukoloa ke he tau gahua mitaki, kia fakamokoi, mo e ta atu noa e tau mena’ ko e kupu moli ke he falu.​—1 Timo. 6:18.

⁷ Manatu e Gahua Mitaki he Taute Tutaki: He tau tau takitaha ha ha i ai a lautolu kua fiafia ke o mai ke he Fakamanatuaga. Maeke nakai e falu he fakapotopotoaga ke onoono ki a lautolu kua fakalataha mai ka e nakai la fakaako ia mogonei? Mitaki nakai he liu ahi atu ki a lautolu mo e onoonoaga ke lagomatai a lautolu ke tolomaki fakaagaga? Neke teke ko e falu ia lautolu nei ne fakalataha ke he Fakamanatuaga ko e tau magafaoa he Tau Fakamoli. Liga ko e falu ne fakaako fakamua mo e lata ni ma e falu fakamaloloaga ke liu fakaako mo e ke fakalataha mai ke he tau feleveiaaga he tau magaaho oti. Ko e olioli ha ia ka tamai ki a tautolu ke kitia a lautolu ko e tau fekafekau malolo ha Iehova kua fakalataha mo tautolu!

⁸ Fakalataha mo e tupu ki mua he gahua he fekafekauaga ia Mati mai ki mua, liga to moua loga e tautolu e tau tagata fiafia ke liu ahi atu ki ai. Lali ke toka a lautolu aki e huhu. Ti mavehe to tala age e tali ka liu atu ai. Ka taute e tautolu e mena nei, to fakave e puhala ma e liu ahi atu. Ka mafiti e liu ahi atu ha tautolu, kua mitaki lahi. Ka nakai maeke ia tautolu ke kamata e fakaakoaga he ahi atu fakamua, manako a tautolu ke lali ke kamata ai he ahi atu ke uaaki ka maeke.

⁹ Ka fakalataha a tautolu he taute e fakamatala he puhala tu, kua lata ia tautolu ke mataala he lali ke kamata e tau fakatutalaaga mo e tau tagata. Tokologa e tau tagata fiafia ne age e tau higoa, tau kaina, mo e numera telefoni ke he tau tagata fakailoa ko lautolu haia ne feleveia he gahua he puhala tu. Kaeke ke nakai nofo e tagata ne feleveia he matakavi hau, moua e lau Please Follow Up (S-43) he Fale he Kautu, ti fakapuke, ti age ke he tohikupu he fakapotopotoaga, ko ia haia ka age ke he fakapotopotoaga he matakavi ne kua nofo ai e tagata ia. Ka nakai maeke he tohikupu ke taute, to fakafano atu e ia ke taute he la matapatu. He puhala nei, to maeke ke feaki e tagata fiafia.

¹⁰ Ka moua e numera telefoni ka e nakai ko e kaina, ti taute e liu ahi atu he vilo atu ki a ia. Mautauteute tuai e vala kua manako a koe ke tutala ki ai. Tuku fakatata tumau e tohi Reasoning ke fakaaoga. Hane moua he falu e kautuaga mitaki he fakaako mo e tau tagata he telefoni, putoia a lautolu ne uka ke moua he tau kaina. Ne kamata e matakainaga fifine ke huhu e tau numera telefoni he tau fifine nukua fiafia ne feleveia e ia he tau gutuhala he fekafekauaga, ti ko e fua ne maeke ia ia ke kamata ua e fakaakoaga Tohi Tapu.

¹¹ Kaufakalataha mo e Tau Motua he Lagomatai a Lautolu ne Lolelole: Kua fiafia lahi e tau motua ke foaki e lagomataiaga fakaalofa ki a lautolu nei. Tokologa foki ia lautolu nei, he fakakaukau a lautolu, nukua fita he liu fakalataha mai ke he tau feleveiaaga he fakapotopotoaga. Kua mailoga e lautolu e manako ke kumi e feoakiaga tata mo e fakatokatokaaga ha Iehova ke maeke ke moua e haohaoaga fakaagaga ne fakamaama mai he Salamo 91. Ko e falu ia lautolu nei mogonei kua fita he liu fakalataha ke he gahua he fonua. Ka fai ia lautolu nei ne lolelole kua fakalataha mai he Fakamanatuaga he mahina nei, maeke ia lautolu ke talia e fakaakoaga Tohi Tapu fakatagata. Kaeke ke pihia, to taute he tau motua taha fakatokatokaaga ma e taha tagata ke fakaako mo lautolu kua manako lagomatai. Ka uiina a koe ke lagomatai ke he puhala nei, to lahi mahaki e fakaaue ke he hau a kaufakalataha.​—Roma 15:1, 2.

¹² Fakatumau ke “Fakamahani ke he Tau Gahua Mitaki”: Tokologa ne fakalataha ke he gahua paionia fakaku ma e taha po ke loga e mahina kua moua e lautolu e gahua ha lautolu ke he fonua kua holo ki mua he tau mahina kua mui mai. Ne feleveia a lautolu mo e tau tagata fiafia ne logona e lautolu kua lata ke liu ahi atu ki ai. Kua fakalagalaga he mena nei a lautolu ke tuku fakalahi e malolo ke fano tumau ke he gahua he fonua ke maeke ke liu matutaki mo lautolu ne fiafia. Ne kamata he falu e tau fakaakoaga, ti lagomatai he mena ia a lautolu ke fakalahi atu e gahua he fekafekauaga.

¹³ Ka e moua agaia he falu e olioli lahi he lahi e mena kua taute he gahua fakamatala mo e taute tutaki ne kua fakalagalaga a lautolu ke kumikumi e tau mena kua fakamua. Ti ko e fua, kua maeke he falu ke mumutu hifo e gahua tupe ka e eke mo tau paionia fakaku matutaki. Kua maeke he falu ke huhu atu ke he fekafekauaga paionia tumau. Kua maeke ia lautolu ke fakave fakalahi e amaamanakiaga ha lautolu ke he Atua mo e nakai ke he tau mena ne foaki he lalolagi. Ne moua e lautolu ko e “fakamokoi, mo e ta atu noa e lautolu ha lautolu a tau mena,” ne tamai e tau monuina loga mai ia Iehova mo e fakamalolo e amaamanakiaga he fiafia ke he “moui tukulagi.” (1 Timo. 6:18, 19.) Moli, he tokologa ne paionia, ne aoga ai e fakapotopotoaga katoa. Kua hihiga e tau paionia ke tutala hagaao ke he tau mena ne iloa e lautolu mo e uiina e falu ke fakalataha ke he fekafekauaga mo lautolu, ti fakatupu he mena nei e hahauaga tokoluga fakaagaga he fakapotopotoaga.

¹⁴ Kua lata ia tautolu oti “kia maukoloa . . . ke he tau gahua mitaki” he magahala he Fakamanatuaga nei mo e hoko atu ki mua e fakatolomaki e gahua ha tautolu ke he fekafekauaga he Kerisiano. Kia fakakite e tautolu e fakaaue ma e mena kua taute e Iehova ma tautolu he foaki mai ki a tautolu e amaamanakiaga he moui tukulagi ke he lalolagi tututonu fou.​—2 Pete. 3:13.