Kia Fakamakamaka ke he Mahani Mitaki!
1 He hohoko atu a tautolu ke he magahala Fakamanatuaga 2003, kua loga lahi e tau kakano ha tautolu ke ‘fakamakamaka ke he mahani mitaki.’ (1 Pete. 3:13) Mua atu ke he tau kakano ia e poa lukutoto ha Iesu Keriso. (Mata. 20:28; Ioane 3:16) Hagaao ke he mena nai, ne tohi he aposetolo ke Peteru: “Ha kua iloa e mutolu nakai lukutoto a mutolu ke he mena ke popo, ko e ario po ke auro, mai he mahani nakai aoga ha mutolu . . . Ka ko e toto uho a Keriso, tuga ne toto he punua mamoe kua nakai fai ila, ti nakai fai kelea.” (1 Pete. 1:18, 19) Ko e fakaaueaga ha tautolu ke he fakakiteaga kehe lahi nai he fakaalofa kua omoomoi a tautolu ke lavelave he taute he mitaki, he mailoga ko Iesu ne “foaki mai e ia a ia ma tautolu ke lukutoto aki a tautolu mai he tau holifono oti kana, mo e fakamea ai e ia māna ke eke mo motu fifili kua fakamakutu ke he tau gahua mitaki.”—Tito 2:14; 2 Kori. 5:14, 15.
2 Ka taute e tautolu e tau mena mitaki ke he fofoga he Atua, to olioli e tautolu e fakafetuiaga mitaki mo ia mo e nonofo ki lalo hifo he hana levekiaga fakaalofa. Ne holo atu a Peteru ke talahau: “Ha ko ia kua manako ke he moui, ke iloa foki e tau aho mitaki, . . . Kia kalo kehe mo e kelea, ka kia eke e tau mena mitaki; kia kumi e mafola mo e tutuli ki ai. Ha kua hagao e na fofoga he Iki ke he tau tagata tututonu, kua fanogonogo mai foki hana tau teliga ke he tau liogi ha lautolu.” (1 Pete. 3:10-12) He tau vaha kelea nai, ko e fakamonuina ha ia ke iloa ko Iehova hane tokamata a tautolu mo e mautali ke gahua ma tautolu, “ti leveki e ia a [tautolu] ke tuga ne alito mata hana.”—Teu. 32:10; 2 Nofo. 16:9.
3 Pete he fehagai mo e tau kamatamata, ko e tau Kerisiano fakamua ne tohi a Peteru ki ai ne velagia he fakamakamaka ne nakai maeke ke tamate, ti fakamatala fakalaulahi e lautolu e tala mitaki ke he otiaga he tau malolo ha lautolu. (1 Pete. 1:6; 4:12) Kua pihia moli foki ke he tau tagata he Atua he vaha nai. Pete kua nonofo a tautolu he “tau aho uka,” ko e fakaaueaga ha tautolu ma e mitaki ha Iehova hane omoomoi a tautolu ke taute fakamakamaka e finagalo he Atua. (2 Timo. 3:1; Sala. 145:7) O mai la ke fakatutala ke he falu gahua mitaki ka lavelave a tautolu ki ai he magahala Fakamanatuaga nai.
4 Uiina e Falu ke he Fakamanatuaga: Taha puhala ke fakakite aki e fakaaue ha tautolu ke he mena fakaalofa kehe lahi nai he lukutoto ke fakalataha atu ke he fakamanatuaga he mate ha Iesu ne fa taute lagataha he tau, ka fakahoko he tau nai he Aho Lotu, Aperila 16, ka mole e toaga la. (Luka 22:19, 20) He tau kua mole, mai he 94,600 he tau fakapotopotoaga he lalolagi katoa ne hokotaki ko e 15,597,746 e katoatoa he tau tagata ne fakalataha atu ai ki ai! Kua molea e 220,000 ha lautolu ne lafi fou mai ke fakatatai ke he tau fakamua atu.
5 Tokofiha ka o mai he tau nai? Ko e tokologa to falanaki ni ke he tau laliaga fakamakutu ha tautolu ke fakamafana falu ke fakalataha mai mo tautolu. Kamata he tohi oti e tau higoa ha lautolu ne manako a koe ke uiina. Ko e tau higoa ka o mai mua kua lata ko e magafaoa tata hau. Ka nakai tua e hoa hau, tala age ki a ia e loto fiafia hau ke fakalataha mai a ia mo koe. Taha e tane nakai tua ne talahau ne fano a ia he tau kua mole he kitia e ia kua kakano lahi hana fakalataha atu ke he hoana hana. Ko e falu higoa ka lafi ke he tau higoa ia hau liga ko e magafaoa, tau katofia kaina, tau kapitiga gahua, po ke tau kapitiga aoga. Manatu ke uiina e tau tagata fakaako Tohi Tapu hau.
6 Ka oti he tohi e koe e tau higoa, setulu e magaaho ke feleveia tino atu ke uiina a lautolu. Fakaaoga e tau lau uiina ke he Fakamanatuaga ne kua lolomi. Ke lagomatai e tau tagata ke manatu e tula mo e matakavi ka taute ai e fakamanatuaga, fakaaoga e lomi tohi po ke tohi fakamitaki e tula mo e matakavi he Fakamanatuaga ke he matapotu i lalo he lau uiina. Ka tata mai a Aperila 16, liu ke fakamanatu a lautolu ne tohi e koe e tau higoa, he hoko tino po ke hea atu he telefoni. Kia lagomatai e tautolu e tokologa kua maeke ia tautolu ke hohoko mai ke he magaaho tapu lahi nai.
7 Lagomatai a Lautolu ka O Mai ke he Fakamanatuaga: Ko e po he Fakamanatuaga ko e magaaho fiafia tumau. Kua moua e tautolu e magaaho ke fakafeleveia a lautolu ne nakai fa mahani ke o mai ke he tau feleveiaaga ha tautolu. Taute e tau fakatokaaga ke hohoko mai tuai mo e ke nonofo fakaloaloa, ka maeke ke taute pihia. Kia matamua atu ke iloa a lautolu ka fou mai. Kia mafanatia mo e fakamokoi.—Roma 12:13.
8 Liga fai nakai ia lautolu ka o mai ke he Fakamanatuaga ka lagomatai ke fakatolomaki fakalahi ki mua e tuaga fakaagaga he fakaako Tohi Tapu he kaina? Fakamakutu ke moua e tau higoa mo e tau nonofoaga he ha tagata ka ahiahi mai ne nakai la fai tagata kua ahi atu ki ai ke maeke ia koe ke liu ahi atu ki a ia. He lagomatai fakaalofa atu, to eke falu ia lautolu mo tau tagata fakamatala nakai la papatiso to hoko e Fakamanatuaga he tau ka hau. Ka liu ahi atu ki a lautolu ne o mai ke he Fakamanatuaga, uiina fiafia ke o mai ke he lauga pauaki ka fakahoko ia Aperila 27.
9 Maeke Nakai ia Koe ke Paionia Fakaku he Magahala Mateafu Nai? He tau tau takitaha ko e fakamakamaka ha tautolu ma Iehova ne omoomoi a tautolu ke eketaha katoatoa ke he fekafekauaga he tau mahina gahua fakateokarasi pauaki. Ko e tau laliaga auloa he fakapotopotoaga katoa he fakamakamaka ke fakamatala e tala mitaki he magahala Fakamanatuaga kua maeke ke moua mai e tau fua mitaki.
10 Taha e fakapotopotoaga ne toko 107 e tagata fakailoa mo e hiva e paionia mau ne hokotaki ko e “mahina kua mua atu e mitaki” a Aperila he tau kua mole, ne 53 e paionia fakaku, putoia oti e tau motua mo e tau fekafekau lagomatai. Fakaohooho fefe he tau motua e fakamakai ke paionia fakaku he mahina ia? Ne kamata tuai a lautolu, he fakamalolo e tokologa ke huhu atu ke he gahua ia. Ne taute e feleveia ma e gahua ke he fonua he tau tula kehekehe he aho ke felauaki mitaki mo lautolu oti he fakapotopotoaga. Ne peehi fakalahi e fakamatala he telefoni, mua atu ki a lautolu ne nakai tino malolo.
11 Taha e matakainaga fifine ne 86 e tau tau he moui, ne nakai maeke ke fano he nakai tino malolo, ne tohi ke paionia fakaku. He kamata he magaaho pogipogi, ne fakaaoga e ia ua e tula he fakamatala he telefoni he nofo he laulau kai, okioki ke he tau tula gahoa, ti liu matutaki atu. Taha e tagata ne vilo a ia ki ai ne kua mamate e tane mo e ua e tama tane ke he magahala he ua e tau kua mole ti nakai maama e kakano ne fakaata he Atua e tau mena kelea ke tutupu. Ne foaki e fakamatala mitaki, ti kamata ai e fakaako Tohi Tapu. Ko e fakamatala he telefoni he tau magaaho afiafi mo e he falu magaaho foki ko e puhala lauia mitaki ke moua e tau tagata ne nonofo he tau fale po ke tau matakavi ne nakai hoko ki ai. Kua maeke foki e tau tagata fakailoa ke moua e tau tagata ne nakai nonofo he tau kaina he aho.
12 Ne fakahiku he tau motua ha lautolu a hokotaki he pehe: “Ne mitaki ha ia he tau magaaho ia mo e fakaaue lahi ke he tau kotofaaga mo e tau monuina ha Iehova ne foaki ma tautolu takitokotaha.” He fakatokatoka fakamitaki, to maeke foki e fakapotopotoaga ha mutolu ke olioli e tau monuina pihia.
13 Ukufakina ke Fakalataha 100 e Pasene ke he Fekafekauaga: Ko e fakaalofa ha tautolu ma e Atua mo e katofia kua fakaohooho a tautolu ke fakatau e tau magaaho he tau mahina takitaha ke folafola e tala mitaki ke he falu. (Mata. 22:37-39) Ko e tau leveki Fakaakoaga Tohi he Fakapotopotoaga mo e ha lautolu a tau tagata lagomatai kua lata ke fakamakutu ke lagomatai a lautolu he matakau ha lautolu ke fakalataha ke he fekafekauaga he tau mahina takitaha. Ko e puhala mitaki ke taute aki e mena nai ke fakatokatoka tuai ke gahua he fekafekauaga mo lautolu takitokotaha he matakau. He nakai fakatali ke hoko ke he matahiku mahina to taute pihia, ka e kia kamata tuai. To foaki he mena nai e loga he tau magaaho ma hau ke foaki e lagomatai fakaalofa.
14 Fai tagata fakailoa nakai he matakau fakaakoaga tohi hau kua nakai tino malolo ti uka ke fakalataha ke he fekafekauaga? Ka fai ne leveki ke he tau kaina leveki fuakau po ke nonofo fale, kua maama ai to fakakaupa ni ha lautolu a tau magaaho ke fakamatala. Ka e he fakaaoga e tau magaaho tote kua moua e lautolu ke fakakikila ha lautolu a maama, to liga fakaohooho e falu he kitia e tau gahua mitaki ha lautolu ke fiafia moli ke he kupu moli. (Mata. 5:16) Ko e leveki fakaakoaga tohi kua lata ke tala age na maeke ia lautolu ia ke taute e hokotaki ma e gahua ke he fonua ke he tau 15 minuti. He maeke ke hokotaki e tau tula ha lautolu ne fakaaoga ke fakamatala to fakamalolo e tau tagata fakailoa tua fakamoli nai, ti tamai foki ki a lautolu e olioli. To lagomatai foki ke taute e hokotakiaga hako ma e tau gahua he tau tagata he Atua he lalolagi katoa.
15 Tau Fuata kua Lavelave he Taute he Mahani Mitaki! Kua hauhau ha ke kitia e tau fuata Kerisiano hane fakaaoga ha lautolu a tau malolo katoatoa he gahua ha Iehova! (Fakatai 20:29) Kaeke ko e fuata tote a koe, fakakite fefe e koe e fakamakamaka hau ma Iehova ke he tau mahina gahua pauaki nai?
16 Ka nakai la eke a koe mo tagata fakailoa nakai la papatiso he fakapotopotoaga, kua maeke nakai ia koe ke tutuli e tuaga ia? Huhu e tau huhu nai ki a koe ni: ‘Kua iloa nakai e au e tau matapatu fakaakoaga moli he Tohi Tapu? Kua manako nakai au ke fakalataha ke he fekafekauaga he Kautu? Eke nakai e mahani haku mo fakafifitakiaga? Maeke nakai au ke fakakite fakatagata e tua haku he tutala ke he falu hagaao ke he tala mitaki? Fakaohooho mai he loto nakai au ke taute pihia?’ Ka tali e koe, e, ke he tau huhu ia, ti tutala ke he tau matua hau hagaao ke he manako hau ke eke mo tagata fakailoa. To maeke he tau matua hau ke tutala ke he taha he tau motua he komiti fekafekau.
17 Kaeke kua fita a koe he eke mo tagata fakailoa he tala mitaki, maeke nakai ia koe ke fakaaoga e magaaho okioki mai he aoga ke fakalaulahi atu hau a fakalataha ke he fekafekauaga? He mitaki e setulu mo e lagomatai mai he tau matua mo e falu, ne tokologa e tau fuata papatiso kua maeke ke paionia fakaku. Ka nakai maeke, kia fakamakutu ke fakalahi atu hau a fakalataha ke he fekafekauaga he fonua. Fakatoka e foliaga ma hau. Ke lafi ke he foliaga he tau tula, fakatoka foki taha foliaga ke fai kakano mitaki e gahua hau ke he fonua. Liga maeke ia koe ke lali ke totou e kupu tohi ke he tau gutuhala takitaha, fakatolomaki ki mua e lauia mitaki he tau puhala liu ahi atu hau, kamata e fakaako Tohi Tapu, po ke fakalaulahi atu e fekafekauaga hau ke putoia e fakamatala he telefoni po ke falu puhala foki he fekafekauaga. Ka e kua e foliaga ke fakalataha mai mo koe e katofia, kapitiga aoga, po ke taha he magafaoa ke he Fakamanatuaga he tau nai? Ko e fakalataha fakalahi atu ke he tau gahua fakateokarasi to palepale mitaki mo e to eke mo fakamafanaaga moli ke he falu he fakapotopotoaga.—1 Tesa. 5:11.
18 Lagomatai a Lautolu ne Fou ke Tupu ki Mua: Ke he tau he fekafekauaga kua mole, ko e avelesi he tau fakaako Tohi Tapu ko e 5,596 ne taute ai he tau mahina takitaha i Niu Silani. Fai magaaho, to tokologa e tau tagata fakaako nai kua tupu ki mua ke hokotia ke he tukuleleaga mo e papatisoaga. Pete ia, ato hokotia a lautolu ke he foliaga ia, kua lata tonu a tautolu ke lagomatai a lautolu ke hokotia ke eke mo tau tagata fakailoa he tala mitaki. Ko e lakaaga aoga lahi a nai ke fakaako a lautolu ne fou ke eke mo tau tutaki ha Iesu Keriso. (Mata. 9:9; Luka 6:40) Fai tagata fakaako Tohi Tapu nakai a koe ne kua mautali ke taute e lakaaga ia?
19 Ka fakauaua a koe ke he tupu fakaagaga he tagata fakaako hau, kumi lagomatai ke he leveki fakaakoaga tohi hau po ke leveki fekafekau. Liga uiina e koe a ia ke nofo mai he fakaakoaga. Ha ha he tau matakainaga tane nai e tau iloaaga aoga ne maeke ke fakaaoga ke filifilia aki e tupu fakaagaga he tagata fakaako. To liga fai manatu fakakite a lautolu ke lagomatai aki e tagata fakaako ke matutaki e tupu fakaagaga.
20 Ka tala atu e tagata fakaako hau kua manako a ia ke eke mo tagata fakailoa nakai la papatiso mo e kitia e koe kua hokotia tuai a ia, tutala ke he leveki fakapotopotoaga. To fakatoka e ia ua e motua ke feleveia mo koe mo e tagata fakaako ke fakatutala kua hokotia moli nakai a ia, he fakaaoga e tau vala tala mai he tohi Our Ministry lau 98-9. (Kikite The Watchtower, Novema 15, 1988, lau 17.) Ka talia e tagata fakaako ke eke mo tagata fakailoa, kia kamata agataha a koe ke fakamahani a ia. Ka taute e hokotaki hana he gahua ke he fonua, to fakailoa ai ke he fakapotopotoaga kua eke e tagata fakaako ia mo tagata fakailoa nakai la papatiso. Ko e amaamanaki ha tautolu ke totou afe e tau tagata fakailoa fou, tau fuata mo e momotua, ka hokotia ke he lakaaga uho nei he tau mahina gahua pauaki nei.
21 Ko e Fakatokatoka ka Lagomatai ke Moua Lahi e Mitaki: Ko e fakatokatoka tuai ka lafi ke he kautuaga he tau gahua fakateokarasi ha tautolu he magahala Fakamanatuaga nai. (Fakatai 21:5) Kua loga lahi e tau vala kua lata e tau motua ke kikite fakalahi ki ai.
22 Ke lagomatai e fakapotopotoaga ke moua lahi e mitaki mai he fekafekauaga ke he fonua, kua lata e tau motua ke taute e tau fakatokaaga ke feleveia ma e gahua ke he fonua he fahi tapu mo e matahiku fahi tapu. Ko e leveki fekafekau kua lata ke taki e tauteaga he tau fakatokaaga nai. Maeke nakai ke fai feleveia lafi ki luga he mogo pogipogi, po ke pale la, po ke afiafi? Kua lata e fakapotopotoaga ke iloa e tau fakatokaaga nai. Liga lagomatai foki ka tau hake e setulu he lapa fakailoaaga.
23 Ko e tau motua kua lata ke kikite kua mau maopoopo e tau fakatokaaga ma e Fakamanatuaga ia Aperila 16. Putoia he tau mena nai e fakamatuuta mo e falu fakapotopotoaga ka fakaaoga foki e Fale he Kautu, fakameaaga he Fale he Kautu, fifili e tau fekafekau mo e tau tagata ke uta viko e tau mena fakatai, mo e moua e tau mena fakatai. Lata ke fakailoa ke he fakapotopotoaga e tula mo e matakavi ka taute ai e Fakamanatuaga mo e ha hikihikiaga ke he tau feleveiaaga ne setulu ma e fahi tapu ia. He fakamakutu ke taute e tau mena nai to fakahoko e fakamanatuaga ke he puhala kua “eke e tau mena oti mo e fulufuluola mo e taute fakamitaki.”—1 Kori. 14:40.
24 Liga manako e tau ulu magafaoa ke fakaaoga taha magaaho he fakaakoaga magafaoa ha lautolu ke fakatutala e puhala ke fakalahi atu e gahua he magahala Fakamanatuaga. Maeke nakai he magafaoa katoa hau ke paionia fakaku? Po ke maeke nakai he magafaoa ke omoi e taha po ke falu he magafaoa ke taute pihia? Ka nakai maeke ke taute pihia, fakatoka falu foliaga pauaki ko e magafaoa ke fakalahi atu e tau magaaho ka fakaaoga ke he fekafekauaga. Fai nakai he magafaoa ne tote agaia, ti he foaki e fakamalolo mo e lagomatai, to liga hokotia a ia ke eke mo tagata fakamatala nakai la papatiso? Tokofiha e tagata ka maeke e magafaoa hau ke uiina ke he Fakamanatuaga he tau nai? Ko e fakatokatoka fakamitaki ka tamai e tau monuina loga mo e tau olioli ke he magafaoa hau.
25 Fakaaoga Fakamitaki e Magaaho ne Toe: He tohi ke he tau Kerisiano he senetenari fakamua, ne fakamanatu age he aposetolo ko Peteru ki a lautolu e mafiti he tau magaaho ha kua tata e fakaotiaga he fakatokaaga faka-Iutaia. (1 Pete. 4:7) He vaha nai kua kitia mai he tau fakamoliaga oti kua tata tuai e fakaotiaga he fakatokaaga he lalolagi nai. Ke he taha aho mo e taha aho, kua lata ke fakaata he tau puhala momoui ha tautolu e fifiliaga ia ha tautolu. Ha ko e tau fekafekau fakamakamaka ha Iehova, kua lata ia tautolu ke fakamakutu ke he mafiti he gahua ke fakapuloa e tala mitaki.—Tito 2:13, 14.
26 Ko e magaaho a nei ma e fakamakamaka mo e gahua! Manamanatu ke he tau mena ne taute e Iehova ma hau, magafaoa hau, mo e fakapotopotoaga. Pete he nakai maeke ia tautolu ke totogi e tau puhala loga hana kua aoga ki a tautolu, kua maeke ia tautolu ke tuku age ki a Iehova e tapuakiaga solu katoa. (Sala. 116:12-14) Ko e ha tautolu a tau laliaga fakamakutu ka moua e tau monuina mai luga. (Fakatai 10:22) Kia ‘fakamakamaka ke he mahani mitaki’ a tautolu oti he magaaho gahua lahi pauaki nai, “kia fakaheke e Atua ke he tau mena oti kana, ha ko Iesu Keriso.”—1 Pete. 3:13; 4:11.
[Puha he lau 3]
Tau Tagata ne O ke he Fakamanatuaga he Lalolagi Katoa
1999 14,088,751
2000 14,872,086
2001 15,374,986
2002 15,597,746
[Puha he lau 4]
Ko Hai Hau ka Uiina ke he Fakamanatuaga?
□ Tau magafaoa tata mo e tau magafaoa
□ Tau katofia mo e tau tagata mahani
□ Tau kapitiga gahua mo e tau kapitiga aoga
□ Tau liu ahi atu mo e tau tagata fakaako Tohi Tapu
[Puha he lau 5]
Lagomatai a Lautolu ka O Mai ke he Fakamanatuaga
□ Fakafeleveia mafanatia ki a lautolu
□ Taute e tau liu ahi atu
□ Foaki ki a lautolu e fakaakoaga Tohi Tapu
□ Uiina a lautolu ke he lauga pauaki
[Puha he lau 6]
Ko e Heigoa e Tau Foliaga Hau ma e Magahala Fakamanatuaga?
□ Fai tagata ne uiina e koe ka hau ke he Fakamanatuaga
□ Kua hokotia ke eke mo tagata fakailoa he tala mitaki
□ Fai tula ne fakaaoga ke he fekafekauaga
□ Holo ki mua ke he taha puhala he fekafekauaga
□ Ke gahua ko e paionia fakaku