“Mahani Mitaki . . . ke he Tau Tagata Oti Kana”
1 “Kia Fakamatala Tolomaki e . . . Kupu he Atua” mo e “Maukoloa . . . ke he Tau Gahua Mitaki” ko e tau mataulu tala ne fakaaoga he uho he Ha Tautolu a Fekafekauaga he Kautu ia Fepuari mo Mati 2002. (Kolo. 1:25; 1 Timo. 6:18) He tau fufuta ia ne fakamalolo ki a tautolu ke foaki fakalahi e laliaga ke lagomatai a lautolu ne fiafia ke o atu ke he Fakamanatuaga, ke lagomatai a lautolu ne lolelole ke liu putoia foki ke he fakapotopotoaga, mo e ke lagomatai e tau fanau ha tautolu mo e tau tagata fakaako Tohi Tapu kua lata ke kamata fakailoa e tala mitaki. Nakai fakauaua ai kua olioli e tautolu e kautuaga ha ko e fua he ha tautolu a tau laliaga fakamakai. Mogonei, “kia mahani mitaki a tautolu [he fakatumau ke] fakalata ke he tau aho ha i ai ia tautolu, ke he tau tagata oti kana.”—Kala. 6:10.
2 Uiina a Lautolu ke Liliu Mai: He la matapatu he matakavi ha Niu Silani, molea e 12,000 he tau tagata ne nakai la tagata fakailoa ia he tala mitaki, nukua fakalataha ke he Fakamanatuaga he tau tau takitaha. Ha ko e ha lautolu a fakalataha mai kua fakakite e fai vala fiafia, ko e heigoa kua lata ke taute e tautolu ke fakalagalaga aki a lautolu kua “kotofa ke he moui tukulagi” he eke mo ‘tua a lautolu oti.’ (Gahua 13:48) Fakamalolo a lautolu ke liliu mafiti ke he tau feleveiaaga he fakapotopotoaga.
3 Ko e ha he uiina e tagata fiafia ke fina atu ke he Fakaakoaga Tohi he Fakapotopotoaga ke olioli e fakatutalaaga alaala he perofetaaga ha Isaia? Kaeke ko e magafaoa po ke kapitiga a koe he tagata fiafia ia ti kaeke setulu a koe ke taute e lauga he tapu hake he Aoga Fekafekau Fakateokarasi, ati uiina e koe a ia ke hau mo e fanogonogo ke he vala hau. Fakailoa age tuai ki a ia e tau mataulu he tau lauga he tau Aho Tapu i mua. (Kua lata ke tau hake e setulu fou he lapa fakailoaaga.) Kumi magaaho ke fakaalaala e manako he tagata ke tapuaki a Iehova. Ti moli, ka nakai la fakaako e ia e Tohi Tapu mo e ha tagata he fakapotopotoaga, maeke ia koe ke fakailoa totonu age ke fakaako mo ia.
4 Fakamalolo Tumau a Ia ne Lolelole: Tokologa ia lautolu kua fakalataha atu ke he Fakamanatuaga ne fita he tukulele ki a Iehova. Pete ia, he taha magahala ne mamutu e fakamatala malolo ha lautolu ke he tala mitaki. Ka e, tomatoma e Paulo a tautolu ke “mahani mitaki . . . ke he tau tagata oti kana, ka e au atu ke he faoa ne tua.” (Kala. 6:10) Ko e mena ia, ko lautolu ne kua lolelole kua lata ke lagomatai fakalahi.
5 Liga fita e falu he talia e fakamaloloaga mai he tau motua mo e falu ke liu fakalataha foki ke he fekafekauaga. Kaeke ke kotofa he tau motua a koe ke gahua mo e tagata fakailoa kua liu gahuahua, kia iloa ko e fakaalofa ni hau ma Iehova mo e fekafekauaga he fonua ka ati hake e mauokafua hana. Fakakite age ki a ia e puhala ne gahua a koe ke he tau fahi kehekehe he fekafekauaga ke maeke ia ia ke moua e olioli i ai, ka fakatumau ke he gahua fakamatala, ti liga moua e tau monuina ha Iehova.
6 Foaki ke he Tau Tagata Fakailoa Fou e Kamataaga Mitaki: He magaaho ne mailoga he fifine fiafia fou kua moua e ia e fakatokatokaaga moli he Atua, ne manako a ia ke kamata mogoia ni e fekafekauaga. He mole e ako e mena kua manako ki a ia, ne pehe a ia: “O mai a ke kamata agataha.” Ka fai tagata kua fakaako e Tohi Tapu mo koe nukua talia ke kamata e gahua he fonua, lagomatai a ia ke kitia e lata ke “kamata agataha” ti fakatoka e tagata fakailoa fou ke he kamataaga mitaki. Lagomatai a ia ke feaki e fakaholoaga he tauteute mo e fai vala tumau ke he fekafekauaga he fonua he tau fahitapu takitaha.
7 Kaeke ko e tama ni hau kua eke mo tagata fakailoa fou nakai la papatiso, gahua mo ia ke fakatolomaki ki mua he felauaki ni mo e hana a tau he moui mo e lotomatala. Mo e lagomatai tote mai ia koe, liga fakaofo e ia a koe he mitaki e puhala kua maeke ia ia ke fakatutala ke he taha tagata, totou mai he Tohi Tapu, mo e foaki e tohi. Ka ha ha ia ia e liu ahi atu mitaki he gahua he fonua, fakamahani a ia ke taute e liu ahi atu mo e fina atu tumau ki a ia.
8 Fakalaulahi Hau Ni a Fekafekauaga: Fakaata nakai he tau tutuaga hau a koe ke fakatolomaki ki mua e gahua fakamatala hau pihia foki ka mole e magahala Fakamanatuaga? Maeke nakai ia koe ke lafi taha po ke ua e tula he tau fahitapu oti ke he mena ne fa mahani a koe ke taute he fekafekauaga? Onoono taha atu nakai a koe ki mua he kalena ke he magaaho ka liu a koe ke paionia fakaku? Po ke fakatokatoka nakai e koe e puhala moui hau ke hu atu ke he fekafekauaga mau? Ko e tau laliaga oti ne foaki e tautolu ke he fekafekauaga ka lagomatai taha tagata ke talia e kupu moli! (Gahua 8:26-39) He onoono atu a tautolu ki mua, kia “fakamalolo a [tautolu] nakai noa ke he mena mitaki, ko e taha kia taha, katoa mo e tau tagata oti kana.”—1 Tesa. 5:15.
[Puha he lau 3]
Fakatumau ke Lagomatai:
□✔ Tau tagata ne o atu ke he Fakamanatuaga
□✔ Tau tagata fakailoa kua liu gahuahua
□✔ Tau tagata fakailoa fou nakai la papatiso