Aperila—Magaaho ke ‘Gahua Malolo mo e Fakamakutu a Tautolu’
1 Ko e tau fahitapu tata atu ke he Fakamanatuaga ko e magaaho manamanatu hokulo ma e tau tagata ha Iehova. Ko e magaaho anei ke manamanatu e mena ne taute he mate ha Keriso mo e ke manamanatu ke he amaamanakiaga ha tautolu ne foaki mai he Atua ha ko e toto ne liligi e Iesu. He liu a koe ke manatu a Aperila 19 he tau kua mole, ko e heigoa ne tokaloto e koe? Manatu nakai e koe a lautolu he po tau tupu ia? ko e takatakaiaga fakaagaga mitaki he Fakamanatuaga? ko e fakatutalaaga hokulo ke he Tohi Tapu mo e tau liogi mai he loto? Liga ke fifili e koe ke fakatata katoatoa e hokulo he fakaaue hau ma e fakaalofa ne fakakite e Iehova mo Iesu ki a koe. Lauia fefe a koe mogonei he manamanatuaga pihia?
2 Kua maaliali ai kua fakakite he tau tagata a Iehova e fakaaueaga ke he tau puhala kehekehe. (Kolo. 3:15, 17) Mahomo atu ki a Aperila kua mole, ne hokotia a tautolu ke fakakite e loto fakaaue ke he tau foakiaga ha Iehova ma e fakamouiaga he fakafita e tautolu a tautolu ke he fekafekauaga faka-Kerisiano. Ko e tau paionia fakaku ne numera ke 1,780 kua tokoluga tali mai he 1997. Ko e tau laliaga ha lautolu, fakalataha mo e falu tagata fakailoa he Kautu, ne fua ai ke he tapunu fou he tau foakiaga he tau mekasini mo e loga he tau fakaako Tohi Tapu fou.
3 Moli, ko e mauokafua he amaamanakiaga ha tautolu kua fakalagalaga a tautolu ke gahua. Tuga ni ne tohi he aposetolo ko Paulo: “Ko e mena ia ni kua gahua ai a tautolu, mo e fakakelea ai a tautolu, ha kua amaamanaki tuai a tautolu ke he Atua moui, ko ia ko e Fakamoui he tau tagata oti, ka e au atu kia lautolu kua tua.”—1 Timo. 4:10.
4 Ko e mahina Fakamanatu nei, to fakatata fefe e koe e tua hau he tau foakiaga ha Iehova ma e moui? Ia Aperila kua mole ne kitia e tautolu 12,571 ne o he fonua. Fakalahi atu nakai e tautolu e numera ia, ia Aperila nei? Maeke ia tautolu ke foli ki ai. Ka kua lata he tau tagata fakailoa takitaha, papatiso mo e nakai papatiso, ke fakalataha. Tokologa a lautolu ne fou ka lata foki ke fai vala. He taute e tau pulega hau ke gahua malolo mo e fakamakutu ia Aperila nei, manamanatu e tau puhala ke maeke ia koe ke fakalagalaga e falu, lauia ai a lautolu kua fou mo e nakai iloa lahi, ke hoa mo koe.
5 Lagomatai Falu ke Liliu ke he Fekafekauaga ha Lautolu: Ka iloa e koe falu ne nakai la o ia he gahua he fonua ke taha po ke ua e mahina, liga ke fakamalolo e koe a lautolu mo e uiina a lautolu ke hoa mo koe ke he gahua he fonua. Ka fai ne nofo tua he fakapotopotoaga, to lali pauaki e tau motua ke ahi atu mo e fakamalolo a lautolu ke liu kamata ia Aperila.
6 Igatia a tautolu ke fakatumau ke ole ma e agaga ha Iehova ke fakamalolo a tautolu he hana gahua. (Luka 11:13) Ko e heigoa ka taute e tautolu ke moua e agaga ia? Totou e Kupu omoomoi he agaga he Atua. (2 Timo. 3:16, 17) Kua lata foki a tautolu ke ‘logona e mena kua talahau he Agaga ke he tau ekalesia’ he fakalataha ke he tau feleveiaaga oti ne lima he fahitapu. (Fakakite. 3:6) Ko e magaaho ni anei ke lagomatai a lautolu kua to tua mo e nonofo tua ke fakatolomaki e tau aga fakaako ha lautolu mo e fakave e fakatumauaga he o mai ke he feleveiaaga. (Sala. 50:23) Taute e tautolu e mena nei ka e mataala fakatumau foki ke he tuaga fakaagaga ha tautolu. Ka e, fai mena foki kua lata.
7 Ne fakamaama he aposetolo ko Peteru kua foaki he Atua hana agaga tapu “ke he tau tagata kua omaoma kia ia.” (Gahua 5:32) Ko e omaoma pihia kua putoia e talia ke “fakamatala atu ke he tau tagata, mo e talahau fakatonu atu.” (Gahua 1:8; 10:42) Ti, pete ne moli kua lata a tautolu mo e agaga he Atua ke fakamalolo a tautolu ke fakamatala, kua moli foki ke lata ia tautolu ke kamata ke fakatata e manako ha tautolu ke fakafiafia a Iehova ke lagomatai fakalahi atu foki e ia a tautolu. Kia nakai fakatote e tautolu e aoga he taute e tau lakaaga fakamua he omaoma fakamakutu!
8 Lagomatai e Tau Ikiiki: Tau mamatua, kitia nakai e koe e fakamoliaga kua manako e fanau hau ke tutala ke he falu hagaao ke he kupu moli? Kua hoa nakai e lautolu a koe he gahua he fonua? Mitaki nakai e tau mahani ha lautolu? Ka pihia, ko e fakauaua he ha? Fina atu ke he taha he Komiti Fekafekau he Fakapotopotoaga, ti kitia kua lata nakai e tama hau ke eke mo tagata fakailoa ia Aperila nei. (Kikite e tohi Our Ministry, lau 99-100.) Mailoga kua maeke he tau tama hau ke limalima auloa ke he puhala lahi he talahau e fakahekeaga ki a Iehova he magahala he Fakamanatuaga nei.—Mata. 21:15, 16.
9 Ne fakamalolo tumau he matua fifine Kerisiano i Georgia, U.S.A., hana tama fifine tote ke tutala ke he falu hagaao ki a Iehova. He tau kua mole, he gahua e tama fifine he fekafekauaga mo e matua fifine hana, ne foaki e ia e porosua Manako ke he tagata tane ti fakamaama fakaku e tau mataulu tala i loto. Ne huhu a ia ke he tama fifine: “Fiha e tau hau?” Ne tali a ia: “Fitu.” Ne ofo e tagata tane ke kitia a ia he talahau e fakatataaga kakano lahi. Ati fepaaki ai, na iloa e ia e kupu moli he tote a ia, ka kua uta fakateaga e puhala moui ia. Nakai leva, ti fakahoko e fakaako Tohi Tapu mo e tagata tane, hoana hana, mo e tama fifine hana.
10 Tokologa e tau ikiiki kua fita he eke mo tau tagata fakailoa, ti olioli e tautolu a lautolu he gahua auloa mo tautolu he fekafekauaga. Maeke he tau fuata nei ke fakalagalaga mo e fakamalolo e falu he atu taha ha lautolu. Kua latatonu foki e magaaho ia Aperila ma e tau magafaoa takitaha ke fakamalolo e tau vahaloto ha lautolu mo e atihake fakaagaga a lautolu he gahua auloa ke he fekafekauaga tapu. Kua lata ke taki he tau ulu magafaoa e mena nei.—Fakatai 24:27.
11 Lagomatai a Lautolu kua Fou: Ka e kua a lautolu kua fou nukua fakaako mo koe e Tohi Tapu? Liga ke limalima foki a lautolu ke he laliaga pauaki ia Aperila nei? Liga ke fakakite e lautolu e manako ke talahau ke he falu e mena ne fakaako e lautolu he oti e veveheaga 2 he paratafa 22, po ke veveheaga 11 he paratafa 14, ke he tohi Iloilo. Ka teitei oti e tohi hau, mau tauteute ke fakatutala fakamahino e matakupu nei he oti e veveheaga 18 he paratafa 8, nukua tohi: “Liga kua lahi e manako hau ke tala age ke he hau a tau faoa, tau kapitiga, mo e falu foki e tau mena ne fa e ako e koe. Kua moli, liga kua fita he taute e koe e mena nei, na pihia foki he talahau e Iesu e tala mitaki ke he falu he tau magaaho noa. (Luka 10:38, 39; Ioane 4:6-15) He mogonei kua liga manako a koe ke lahi atu e mena ka taute.” Moli nakai e mena nei ki a lautolu ne fakaako mo koe?
12 Talitonu nakai e tagata fakaako hau ke he Kupu he Atua? Fakagahua nakai e ia e tau matapatu fakaakoaga he Tohi Tapu? Kua fakalagotatai nakai e ia hana moui ke he tau poakiaga faka-Atua? Kua hau nakai a ia ke he tau feleveiaaga he fakapotopotoaga? Manako nakai a ia ke fekafekau ki a Iehova ko e Atua? He ha he fakamafana a ia ke tutala ke he tau motua ke maeke ia lautolu ke fifili kua lata nakai a ia he eke mo tagata fakailoa nakai la papatiso mo e gahua mo koe ia Aperila? (Kikite tohi Our Ministry, lau 97-9.) He puhala nei kua maeke ia ia ke kamata ke iloa tonu e puhala ka lagomatai he fakatokatokaaga a Iehova a ia he laliaga hana ke fekafekau ki a Iehova.
13 Moli, kua mafiti lahi e holo ki mua he falu tagata fakaako mai he falu. Ti, fakalagotatai ai mo e hatakiaga he Ha Tautolu a Fekafekauaga he Kautu ia Iuni 2000 he lau 4, paratafa 5-6, tokologa kua fakaako e tohi ke uaaki mo e tau tagata kua fakakite e fiafia fakamua ka kua lata ma e falu lagomatai ke fakalataha malolo ai. Kia fakamanavalahi a tautolu to eke a lautolu nei kua loto moli mo tau tutaki ha Keriso, he ‘magaaho tote ni po ke leva.’ (Gahua 26:29) Kaeke ke fai mahina he fakaako a koe mo lautolu ia nukua fakamaama ai kua “leva,” kia eke e magahala Fakamanatuaga nei mo magaaho mitaki ma e tagata fakaako ke kamata fakatata e hokulo he hana loto fakaaue ma e lukutoto ha Keriso?
14 Puhala ke Lagomatai a Lautolu ke Fakalataha: Lahi e mena ka ako e tautolu he lagomatai a lautolu kua lata ke kamata e fekafekauaga he kumikumi e puhala ne fakamahani e Iesu e falu. Nakai ni kumi e ia e moto tagata mo e tala age ke he tau aposetolo ke kamata e tutala. Ne peehi fakamua e ia e lata ma e gahua fakamatala, fakamalolo e aga liogi, ti age ki a lautolu tolu e foakiaga aoga: ko e hoa, ko e matakavi gahua, mo e fekau. (Mata. 9:35-38; 10:5-7; Mare. 6:7; Luka 9:2, 6) Taute pihia foki e koe. He lagomatai ni e koe e tama hau, tagata fakaako fou, po ke ha tagata ne fai magaaho ne nakai hokotaki e gahua, kua latatonu ke taute e laliaga pauaki ke kumi e tau foliaga nai.
15 Talahau e Manako: Peehi ke he tagata e aoga he gahua fakamatala. Kia fiafia hagaao ki ai. Talahau e tau mena tutupu ke fakakite e katoatoa he fekafekauaga he fakapotopotoaga. Fakatata e aga ne fakakite e Iesu ia Mataio 9:36-38. Fakamalolo e tagata fakailoa kua ligaliga po ke ko ia kua nofo tua ke liogi hagaao ke he kaufakalataha hana ke he fekafekauaga ti pihia mo e kautuaga he gahua he lalolagi katoa.
16 Fakamalolo e Tagata ke Manamanatu ke he Tau Magaaho Loga ke Fakamatala: Tala age na maeke ke feleveia mo e matakau fakaako tohi ma e fakamatala he taha fale ke he taha fale. Tala age ke tutala mo e tau magafaoa mo e tau kapitiga mahani po ke tutala mo e tau kapitiga gahua po ke tau kapitiga aoga he tau magaaho kai la. Ka heke he peleoafi mo e tau tagata, kia kamata e fakatutalaaga he fakakite e fiafia hau ke he tau tagata ne heke auloa. Ka fakailoilo a tautolu, fa mahani e mena nei ke kamata e fakamatala mitaki. Moli, loga e magaaho ke folafola e amaamanakiaga ha tautolu ke he falu he “taha aho mo e taha aho.”—Sala. 96:2, 3.
17 He fakamafiti ai, to liga hagahaga mitaki ka gahua tokoua a koe mo e tagata fakailoa fou he taha fale ke he taha fale. Ka fakatoka e koe e foliaga ke malikiti e fekafekauga hau ia Aperila, huhu ke he fekafekau leveki matakavi, kua fai matakavi tata nakai. Ka pihia, to foaki atu he mena nei e magaaho ki a koe ke gahua fakamatafeiga ai. Ma e fakatai, ka oti e fekafekauaga po ke fenoga atu ke he tau feleveiaaga po ke falu matakavi, mailoga e koe kua fai tagata i kaina ne nakai moua e koe he magaaho fakamua po ke kitia e fiafia. Ka lata, ahi atu fakaku ki ai ko e magaaho fe kua hagahaga mitaki. To maeke he mena nei ke lafilafi atu ke he puhala he fakakatoatoa mo e olioli e fekafekauaga.
18 Tauteute e Fekau Futiaki: Ko e taha mena ma e tagata ke manako ke fakalataha ke he fekau he Kautu, ka ke he taha fahi ki a ia ke mauokafua e logonaaga ke he puhala matutaki hana ki ai, mua atu ka fou a ia po ke leva lahi e nakai fano he fekafekauaga. Ke lagomatai a lautolu kua fou mo e nonofo tua ke tauteute ko e mena aoga lahi. Ko e tau Feleveiaaga he Fekafekau mo e tau feleveia ma e gahua he fonua ka foaki e tau manatu lagomatai, ka e nakai fakahui e tauteuteaga fakatagata.
19 Lagomatai fefe e koe a lautolu kua fou ke tauteute ma e fekafekauaga? Kamata he fakatata e mekasini, ti fakamukamuka mo e fakaku ai! Ole kia lautolu ke manamanatu ke he tau mena tutupu he tau vala tala ka kapeletu ki ai a lautolu he matakavi, ti kumi e manatu he taha he tau mekasini fou ke matai aki. Fakagahuahua tokoua e fakatataaga, ti fakaaoga fakamafiti ai he fekafekauaga.
20 Fakatupu e Amaamanakiaga ha Tautolu ma e Malikiti he Vaha Anoiha: Ko e katoatoa he tau tagata ne o ke he Fakamanatuaga he tau kua mole he lalolagi katoa kua molea e 14.8 e miliona. Ko e numera kua hokotaki ko e tau tagata fakailoa kua molea fakatote e ono e miliona. Kakano e mena nei ko e kavi ke 8.8 e miliona he tau tagata ne fiafia ke o mai ke he fakaholoaga pauaki nukua logona e lautolu e taha he tau matapatu fakaakoaga he Tohi Tapu kua fakamaama. Kua maeke ke iloa mitaki e lautolu falu ia tautolu, nukua liga nava a lautolu ki ai. Tokologa ia lautolu kua nava lahi ia tautolu, foaki ke he gahua ha tautolu he lalolagi katoa mo e lalago a tautolu ki mua he falu. Kua hukui he matakau lahi nei e amaamanakiaga ke he tupu ki mua he vaha anoiha. Ko e heigoa ka taute e tautolu ke lagomatai a lautolu ke holo ki mua?
21 Ko e laulahi ha lautolu ne fou kua fakalataha ke he Fakamanatuaga ha kua fua mai he uiina ni he taha ia tautolu. Kakano he mena nei, taha e tagata he toloaga ne mahani mo lautolu. Ka fai tagata ka hau ha ko e talia e uiina ha tautolu, ko e matagahua ha tautolu ke fakafeleveia fakamitaki a ia mo e lagomatai a ia ke aoga katoatoa mai he fakaholoaga. Ha ko e mena to apiapi ai e fale, ti lagomatai a ia ke kumi e nofoa. Age ki a ia e Tohi Tapu, ti uiina a ia ke uhu tokoua he lologo hau. Tali ha huhu kua huhu e ia. Ko e matakaki mafanatia hau ko e matapatu vala he feaki hana fiafia. Moli, fakalataha oti a tautolu he matagahua nei—ka kitia e tautolu e mata nakai fa mahani, fakakite e fakaalofa mafanatia, ti tutala fakaku mo ia ke iloa a ia.
22 Ko e fakalataha ke he Fakamanatuaga kua fakamalolo moli ke he manamanatuaga he tagata. Ko e kakano kua hau a ia ke he feleveiaaga nukua talahau nakai la moua e ia e mena ne kumi a ia ki ai ti ko e mena ia ke foaki e tautolu taha mena kua logona e ia e lata ke kumikumi fakamakutu. Ko e fakamaama he foakiaga lukutoto mua ue atu kua liga ko e fakakiteaga mahomo atu ke he tagata ne nakai iloa e fakaalofa nakai fakakaupa ha Iehova. Kua kitia maali e ia kua kehe a tautolu—fakamoli, kapitiga, fakaalofa, mo e fakalilifu. Kua nakai tatai e fale ha tautolu mo e mena nukua kitia e ia he tau fale tapu kua fakakite e tau mena fakatai mo e tau faiagahau fakateaga. Maeke moli ia lautolu kua fou ke mailoga kua fakapotopoto e toloaga tagata mai ia lautolu he tau tuaga momoui kehekehe oti ti nakai fai oko tupe. Ko e fakatapakupaku nai ko e fifiliaga mauokafua ma lautolu ke liliu mai.
23 He mole e Fakamanatuaga, kua lata he taha tagata ke mataala ke foaki e lagomatai ke he tau tagata fou oti kua fakalataha mai. Ka uiina e koe a lautolu ne fou, ha ha ia koe e kotofaaga uho. To o kehe a lautolu, fakailoa age ki a lautolu falu he tau feleveiaaga he Fale he Kautu. Tala age e mataulu he lauga ke he tau tagata he tapu ka hau. Tala age ki a lautolu e matakavi mo e magaaho he Fakaakoaga Tohi he Fakapotopotoaga kua tata ke he kaina ha lautolu. Fakamui, foaki ki a lautolu e lagaki he tohi Magafaoa, ti tala age e fakatutalaaga ma e fahitapu ha Aperila 30 kua lauia e lau 82 ke he 89. Fakamaama e kakano kua pulega e fakapotopotoaga katoa ke o atu ke he fonoaga he fahimotu nukua fakatoka ma e lotoga he tau.
24 Mauloto ke ahi mafanatia atu ke he tau kaina ha lautolu. Mailoga kua fai porosua Manako mo e tohi Iloilo a lautolu, ke fakamahani a lautolu mo e tau matapatu fakaakoaga he Tohi Tapu. Ka nakai la fakaako a lautolu, foaki ki a lautolu e fakaako Tohi Tapu. Fakamafana age ke totou e lautolu e porosua Tau Fakamoli a Iehova, nukua fakakite e fakatino maaliali he puhala kua gahuahua a tautolu ko e fakatokatokaaga. Uiina a lautolu ke kitekite e tau vitio ha tautolu, tuga e Our Whole Association of Brothers. Fakatoka ma lautolu ke feleveia mo e falu he fakapotopotoaga. He tau mahina i mua, matutaki mo lautolu kua fou; uiina a lautolu ke fakalataha ke he tau feleveiaaga ka ahi mai e leveki he takaiaga po ke toloaga he takaiaga po ke aho toloaga pauaki. Foaki ki a lautolu e magaaho ke fakakite ki a lautolu ne “kotofa ke he moui tukulagi”!—Gahua 13:48.
25 Mena ka Taute he Tau Motua: Ko e kautuaga he lali malolo he fekafekauaga ia Aperila nei ka falanaki lahi ke he tau motua. Kaeke ko koe e takitaki he fakaakoaga tohi, fakamau hifo e tau mena ka taute e koe ke lagomatai e tau tagata oti he matakau fakaako tohi hau ke fakalataha ke he tau gahua pauaki nei. Fai nakai ne kotofa ke he matakau hau kua fuata tote, fou, to tua, po ke nofo tua? Fakakia ke kitia e tau matua, tau paionia, po ke falu tagata fakailoa ti fakailoilo ke lagomatai a lautolu. Foaki e lagomatai fakatagata ka maeke ia koe. Taha e matakainaga fifine ne kua leva e to tua he fekafekauaga he fonua ke ua e tau nukua molea e 50 he tula kua fakaaoga ke he fekafekauaga ia Aperila kua mole. Ko e heigoa e hikiaga ma hana? Ne pehe a ia ko e atihake he tau ahi leveki ne taute he tau motua.
26 Kua lata e tau motua mo e tau fekafekau lagomatai ke kau auloa ke kitia kua lahi e matakavi, tau mekasini, mo e tau tohi ma e tau mahina ia i mua. Maeke foki nakai ke fakatoka e tau feleveiaaga lafi ki luga ma e gahua he fonua? Ka pihia, fakailoa e tau fakaholoaga pauaki. Mua ue atu, ke he tau liogi auloa mo e tokotaha hau, ole ke he fakamonuina ha Iehova ma e tupu ki mua he gahua he Kautu ha tautolu he mahina nei.—Roma 15:30, 31; 2 Tesa. 3:1.
27 Ia Aperila kua mole ko e fakapotopotoaga i North Carolina, ne fakamalolo moli he tau motua e tupu ki mua he gahua he fekafekauaga. He tau feleveiaaga he tau fahitapu takitaha, ne uiina e lautolu e tau tagata fakailoa takitaha ke manamanatu he liogi ko e maeke nakai ia lautolu ke hu mo paionia fakaku. He tau magaaho oti, ne tutala fakamakutu lahi a lautolu he kau fekafekau ke taute a Aperila mo mahina homo ue atu. Ko e fua, 58 e pasene he tau tagata fakailoa, putoia e tau motua oti mo e tau fekafekau lagomatai, ne paionia he mahina ia!
28 Ko e Olioli he Fakalataha Katoatoa: Ko e heigoa e tau monuina he ‘gahua malolo mo e fakamakutu a tautolu’ he fekafekauaga? (1 Timo. 4:10) Hagaao ke he fekafekauaga fakamakai he fakapotopotoaga ia Aperila kua mole, ne tohi he tau motua ne talahau i luga: “Kua fa tutala mau e tau matakainaga hagaao ke he fakaalofa lahi mo e fetataaki lahi kua felogonaaki e lautolu tali mai he kamata fakalaulahi atu ha lautolu a gahua ke he fonua.”
29 Ko e fuata tane ne nakai fai peleoafi ne leva e manako ke fai vala he gahua pauaki ia Aperila kua mole. He pulega fakamitaki mo e he lagomatai he hana matua fifine mo e tau matakainaga fakaagaga, ne olioli e ia e mahina fua mitaki ko e paionia fakaku. Fefe e logonaaga hana ki ai? Ne pehe a ia: “Ko e magaaho fakamua la ia he moui haku, ne logona e au tuga e tagata malolo.”
30 Nakai fakauaua ai kua fakamonuina lahi e Iehova a lautolu kua tuku fakatokoluga e kotofaaga ha lautolu he tutala hagaao ke he tuaga patuiki. (Sala. 145:11, 12) He fakamanatu e tautolu e mate he Iki ha tautolu, maama e tautolu ko e tau monuina ma e mahani fakamoli Atua ka fua loga atu foki he vaha anoiha. Ne leva e manako he aposetolo ko Paulo ma e palepale he moui tukulagi. Ka e, ne iloa e ia e mena nei nakai ko e mena ke nofo noa mo e amaamanaki ki ai. Ne tohi e ia: “Ko e mena ia kua gahua ai au mo e fakamalolo, ke lata mo e gahua hana kua gahua ai ni ki loto ia au mo e malolo.” (Kolo. 1:29) Puhala mai e Iehova ia Iesu, ne taute a Paulo ke fakamoli e fekafekauaga fakahao moui, ti taute e Ia e mena taha ma tautolu he vaha nei. To eke nakai e iloaaga fakatagata ia ma hau ia Aperila?
[Puha he lau 3]
Ko Hai ka Fakamalolo e Koe ke Fakailoa ia Aperila?
Tama hau?
Ko e tagata fakaako Tohi Tapu?
Taha tagata kua leva e nofo tua?