“Loto” Kia a Koe ke Lagomatai e Falu?
1 Ne leveki moli a Iesu ke he tau tagata. He fina atu e lepela ki a ia ma e lagomatai, ne fakaolo atu e Iesu e lima hana, mo e aamo e tagata, mo e pehe: “Mena loto au ki ai; kia mea a koe.” (Mare. 1:40-42) Ko e heigoa e tau puhala kua maeke ia tautolu ke muitua ke he aga ha Iesu he lagomatai e falu?
2 Tau Tagata ne Manako: Kua igatia e tau tagata he fakapotopotoaga mo e fai vala he lagomatai a lautolu ne manako ke eke mo tau tagata tapuaki ha Iehova. Ka o mai e tau tagata fou ke he feleveiaaga, fakafeleveia atu ki a lautolu mo e fakamahani ki ai. Kumi puhala ke fakamalolo a lautolu. Nava atu ki a lautolu ke he tau tali ha lautolu. Fakakite e loto fakaaue ma e tau laliaga ha lautolu he fakagahua e tau matapatu fakaakoaga he Tohi Tapu ke he tau momoui ha lautolu. Lagomatai ki a lautolu ke kitia e tau lauiaaga mitaki ne ha ha ia lautolu ka moua e tau kapitiga moli i loto he fakapotopotoaga.
3 Tau Matakainaga Talitonu: Kua lata pauaki e tau puhala lagomatai kehekehe ha tautolu ke “au atu ke he faoa ne tua.” (Kala. 6:10) Taufetului e tokologa mo e tau matematekelea malolo tino. He aahi atu ke atihake, maeke ia koe ke foaki e feoakiaga kua lata mo e liga lagomatai foki ke he tau puhala aoga. Liga fehagai e falu mo e tau mena uka he tau momoui ha lautolu. Fakakite e kapaletu hau he foaki e magaaho ke fanogonogo ki a lautolu mo e ati hake a lautolu. (1 Tesa. 5:14) Kua manako foki e tau motua ke he kaufakalataha ha tautolu he fa e hahamo e lautolu ha lautolu a tau matagahua. (Hepe. 13:17) He fakagahuahua e aga makai mo e lagomatai, maeke ia tautolu ke eke “mo fakamafanatia” ke he tau matakainaga talitonu ha tautolu.—Kolo. 4:11.
4 Tau Tagata he Magafaoa: Kua lata ke lali foki a tautolu ke muitua ke he kapaletu ha Iesu ma e tau tagata he magafaoa ni ha tautolu. Ko e kapaletu hokulo kua omoi e tau matua ke ‘leveki e fanau ke he tau kupu akonaki mo e tau kupu fakamafana ha Iehova.’ (Efeso 6:4) Maeke he tau fanau ke taute e vala ha lautolu he mafiti ke mautauteute ka hoko e magaaho ma e fakaako fakamagafaoa, tau feleveiaaga he fakapotopotoaga, po ke gahua he fonua. Maeke he tau fanau lalahi ke fakaata e fakaalofa hohofi ha Iesu he lagomatai fakamitaki e tau mamatua ha lautolu ke fahia mai he tau mena uka ne tamai he vaha fuakau. He tau puhala nei mo e falu foki, igatia a tautolu mo e “ako e [tautolu] ke fakamua e mahani mitaki ke he tau faoa ha [tautolu].”—1 Timo. 5:4.
5 He fifitaki a tautolu ki a Iesu he lagomatai e falu, kua liga maeke ia tautolu ke fakatote e tau lekua mo e futiaki fakatata auloa ha tautolu a tau magafaoa mo e fakapotopotoaga. Mua atu ai, tamai e tautolu e lilifu ki a Iehova, “ko e Matua hana e fakaalofa hofihofi.”—2 Kori. 1:3.