Maeke Nakai a Koe ke Foaki e Lagomatai?
1 Kua kumi puhala tumau a Iehova ke foaki e lagomatai ke he tau fekafekau fakamoli hana. (2 Nofo. 16:9; Isaia 41:10, 13) He fakatatai a ia ke he leveki mamoe totonu, ne tohi e Isaia: “To hapai e ia e tau punua mamoe ke he hana tau lima, mo e uta e ia a lautolu ke he hana fatafata; to takitaki fakatekiteki e ia e tau mamoe kua fai punua.” (Isaia 40:11) Manamanatu ke he falu puhala kua maeke ia tautolu ke fifitaki e logonaaga fakaalofa a Iehova.
2 Lagomatai ki a Lautolu ne Fou: Maeke ia tautolu ke foaki e lagomatai he uiina a lautolu ne fou ke olioli e feoakiaga mafanatia mo tautolu. (Fakatai 13:20) He liu manatu e puhala he falu ne lagomatai ki a ia he magaaho ne kamata a ia ke fakalataha mo e fakapotopotoaga, ne pehe e taha matakainaga: “He loga he tau magaaho, ne putoia he magafaoa au ke he fakaakoaga ha lautolu. He holo ki mua au, ne uiina tumau he hoa mau fuata au ke o mo laua he fekafekauaga ke he aho katoa. Mitaki lahi tumau e tau fakatutalaaga fakaagaga ha mautolu.” Ne lafi e ia: “Ato eke au mo Kerisiano, ne fa fano au he tau po Faraile mo e tau po Faiumu. Ka ko e magaaho ne fakaaoga e au mo e tau matakainaga haku kua fakapuke e manako haku ma e feoakiaga.” Ko e logonaaga fakaalofa he fakapotopotoaga ne lagomatai e matakainaga tane nei ke vakavaka mo e mauokafua mitaki ke he tua, ti kua eke a ia mogonei mo taha he magafaoa Peteli.—Kolo. 2:6, 7.
3 Fefakamafanaaki: Liga moua e tautolu e magaaho ke foaki e lagomatai ka felauaki e tau matakainaga ha tautolu mo e tau tutuaga paleko. Maeke nakai a koe ke fakatoka ke taute e fakamatala he telefoni mo e tagata fakailoa ne gagao po ke uiina a ia ke o mo koe he fakaakoaga Tohi Tapu, liga tamai foki e tagata fakaako ke he kaina hana? Liga loto fakaaue kia e matua ne fai tama ikiiki ke he lagomatai ka fakalataha he fekafekauaga? Ha ha i ai nakai a lautolu kua ma ka fiafia ke he lagomatai hau he magaaho ka taute e tau liu ahi atu po ke ka fakalataha ke he falu puhala he fekafekauaga? Ko e logonaaga fakaalofa ke he tau matakainaga ha tautolu ka omoi a tautolu ke kumi puhala ke fakamafana a lautolu.—Roma 14:19.
4 He muitua a tautolu ke he logonaaga hofihofi a Iehova ma e tau fekafekau hana, kua fefakamaloloaki a tautolu, lagomatai ke futia fakalataha e fakapotopotoaga ke he fakaalofa, mo e fakaheke e Matua ha tautolu he lagi.—Efeso 4:16.