Manatu a Lautolu kua Momotua ne Fakamoli
1 Pete ni ko e takape mo e fuakau, ko Ana ne 84 e tau he moui ne “nakai fano kehe a ia he faituga.” Kua omoi he mahani fakamoli hana a Iehova ke foaki ki a ia e palepale pauaki. (Luka 2:36-38) He vaha nei, tokologa e tau matakainaga ne fakakite e aga tuga ia ha Ana pete ni e fehagai mo e tau tutuaga uka. Ha kua taufetului pauaki a lautolu ia ne fakamoli mo e tau lekua po ke tau kuku he malolo tino ha ko e fuakau, to liga logona e lautolu e lolelole ke he tau magaaho. O mai la tautolu ke manamanatu ke he falu puhala aoga ke maeke ia tautolu ke fakamalolo a lautolu mo e lagomatai a lautolu ke fakatumau e fakaholoaga fakaagaga mitaki.
2 Tau Feleveiaaga mo e Fekafekauaga: Ka foaki he falu e lagomataiaga fakaalofa ke uta, tokologa a lautolu kua motua ne fakamoli nukua mukamuka lahi ke o atu tumau ke he tau feleveiaaga Kerisiano. Kua atihake he mena nei e tuaga fakaagaga he tau fekafekau fakamoli nei kua leva ti aoga foki ke he fakapotopotoaga. Liga fai vala kia a koe he gahua mitaki nei?—Hepe. 13:16.
3 Ko e fakalataha tumau ke he fekafekauaga kua tamai e olioli mo e makona ke he tau Kerisiano moli. Ka ko e taute pihia kua eke mo paleko ma lautolu kua motua mo e lolelole. Kua maeke kia he taha he tau fakahele nei ke faihoani a koe he “gahua fakalataha” ke he falu puhala he gahua fakamatala? (Roma 16:3, 9, 21) Liga maeke ia koe ke uiina a ia ke taute mo koe e fakamatala ke he telefoni po ke fano mo koe he liu ahi atu po ke ke he fakaakoaga Tohi Tapu. Ka nofo ni a ia kua motua he kaina, maeke nakai e tagata fakaako Tohi Tapu ke hau ke he kaina hana ma e tau fakaakoaga?
4 Fakaako mo e Feoakiaga: Mahani ai, kua uiina he falu a ia kua motua po ke lolelole ke fakalataha ke he fakaakoaga fakamagafaoa ha lautolu, ti hoko ke taute foki e fakaakoaga he kaina hana. Taha e matua fifine ne uta e fanau ikiiki tokoua hana ke he kaina he matakainaga fifine motua ma e ha laua a fakaako he My Book of Bible Stories, ti kua fakamalolo oti ai ha ko e feoakiaga. Ko lautolu ia kua fiafia foki he uiina ke taumafa po ke ke he falu magaaho fakafiafia foki. Ka lolelole lahi a lautolu ne lolelole kua ahiahi atu a tautolu ki ai, liga lata ke hea atu po ke afe fakaku a koe ke totou ki a lautolu, liogi mo lautolu, po ke talahau e iloaaga atihake.—Roma 1:11, 12.
5 Kua ofania e Iehova a lautolu kua momotua mo e fakamoli. (Hepe. 6:10, 11) Kua maeke ke fifitaki a tautolu ki a ia he fakakite e loto fakaaue ki a lautolu mo e lagomatai a lautolu ke fakatumau e fakaholoaga fakaagaga mitaki.