Fakakite e Fakaalofa Moli ki a “Lautolu kua Nakai Fai Matua”
1 Ko Iehova ko e “matua a ia kia lautolu kua nakai fai matua.” (Sala. 68:5) Ko e tupetupe hana ke he moui hagahaga mitaki ha lautolu kua fakaata mai he poakiaga nai ne age e ia ke he motu ha Isaraela i tuai: “Aua neke favale ke he fifine takape, po ke taha kua takaveli. Kaeke ke favale a koe ki ai, ti tagi mai ai a ia kia au, to fanogonogo ni au ke he hana tagi mai.” (Esoto 22:22, 23) Putoia foki he Fakatufono he Atua ke lagomatai a lautolu he tuaga ia mo e ha lautolu a tau manako koloa fakatino. (Teu. 24:19-21) Ki lalo hifo he fakatokatokaaga Kerisiano, ko e tau tagata tapuaki fakamoli kua tomatoma “ke ahi e tau tagata kua mamate e tau matua, mo e tau fifine takape ke he ha lautolu a matematekelea.” (Iako. 1:27) Maeke fefe a tautolu ke fifitaki e fakaalofa moli ha Iehova ki a lautolu kua tutupu hake he magafaoa matua tokotaha po ke mavehevehe fakalotu?
2 Feaki Fakaagaga: Kaeke ko e matua tokotaha a koe po ke nakai tua e hoa, liga ko e taute tumau he fakaako Tohi Tapu he kaina mo e fanau hau ko e paleko lahi. Ka ko e fakaako Tohi Tapu fai kakano mo e taute tumau kua aoga ke ati hake a lautolu ka manako ke eke mo tau tagata lalahi kua momotua mo e lagotatai. (Fakatai 22:6) Aoga foki ke tutala tumau ki a lautolu he tau aho oti ke he tau mena fakaagaga. (Teu. 6:6-9) Ke he tau magaaho, to logona e koe e lolelole e logonaaga, ka e ua fiu. Fuluhi ki a Iehova ma e malolo mo e takitakiaga he “leveki ai [hau a fanau] ke he tau kupu akonaki mo e tau kupu fakamafana he Iki.”—Efeso 6:4.
3 Kaeke manako lagomatai a koe ke leveki e tau matagahua faka-Tohiaga Tapu hau, kia tala age hau a tau manako ke he tau motua. To maeke ia lautolu ke foaki e tau manatu lagomatai po ke lagomatai a koe ke fakatu taha fakaholoaga fakaagaga mitaki ma e kaina hau.
4 Puhala ka Lagomatai he Falu: He senetenari fakamua, ne eke a Timoteo mo fekafekau tua fakamoli ha Iehova pete ne tupu hake a ia he kaina mavehevehe fakalotu. Ne nakai noa kua lauia mitaki e tau lali fakamakamaka he matua fifine mo e matua tupuna fifine hana ke fakaako ki a ia e tau Tohi Tapu hagaao ke he mena nai. (Gahua 16:1, 2; 2 Timo. 1:5; 3:15) Pete ia, ne moua mai foki e ia e aoga he lafi mo e falu Kerisiano, putoia ai e aposetolo ko Paulo, ne talahau hagaao ki a Timoteo “ko e haku a tama fakahele haia, mo e fakamoli ke he gahua he Iki.”—1 Kori. 4:17.
5 Ke tuga ni he vaha nai, ko e aoga ha ia ka fakakite he tau matakainaga motua fakaagaga e fakaalofa moli ke he tau tama tane mo e fifine ne nakai fai matua i loto he fakapotopotoaga! Iloa takitaha nakai e koe e tau higoa ha lautolu? Fa tutala nakai a koe mo lautolu he tau feleveiaaga Kerisiano mo e falu magaaho foki? Uiina a lautolu ke fakatauo mo koe ke he fekafekauga he fonua. Liga maeke a koe he taha magaaho ke uiina a lautolu, mo e matua tokotaha po ke matua ne tua ha lautolu, ke fakalataha mai ke he fakaakoaga po ke ha fakafiafiaaga fakamagafaoa hau. Kaeke kitia he fanau nai a koe ko e kapitiga ha lautolu, to liga mukamuka a lautolu ke fifitaki mo e talia e tau fakamaloloaga hau.—Filipi 2:4.
6 Hokulo e fakaalofa moli ha Iehova ke he fanau tane mo e fifine nakai fai matua, ti fakamonuina e ia e tau laliaga fakaalofa ha tautolu ke lagomatai a lautolu ke taute e kupu moli ma lautolu ni. Tokologa ne momoui hake he tau kaina matua tokotaha po ke mavehevehe fakalotu ne moua e tau fakamaloloaga pehenai ti hane fekafekau tua fakamoli ko e tau paionia, tau fekafekau lagomatai, tau motua, tau leveki faifano, tau misionare, po ke falu he magafaoa Peteli. Kia kumi e tautolu e tau puhala ke “fakalahi” e fakaalofa ha tautolu ki a lautolu kua nakai fai matua, he fifitaki e Matua ha tautolu he lagi.—2 Kori. 6:11-13.