Ko e Kupu Moli e Kupu he Atua
1. Ko e heigoa e tau vala tala aoga ne toka he Tohi Tapu?
1 “Kua moli ni hāu a tau kupu,” he tohia he salamo. (Sala. 119:160) He puhala mai he Kupu omoomoi he hana agaga, ne ta mai e Iehova e tau tali makona ke he tau huhu aoga lahi he moui. Foaki mai e ia e mafanatia mo e amaamanaki ki a lautolu ne tupetupe. Ti fakakite e ia e puhala ke fakatata atu a tautolu ki a ia. “Ko e ako he kupu moli mai he Tohi Tapu kua tuga e toka hifo e matakavi pouli tatago mo e nakai fiafia mo e hu atu ke he poko maama, kikila, mo e fulufuluola,” he talahau he taha fifine loto fakaaue. Kua eketaha nakai a koe ke talahau e kupu moli mai he Kupu he Atua he tau magaaho oti kua lata tonu ai?
2. Fakatolomaki ki mua fefe he Tohi Tapu e tau momoui he tau tagata?
2 Malolo ke Liliuina mo e Mahuiga ke he Lalolagi mo e Lagi Katoatoa: Ko e kupu moli he Tohi Tapu ne ha ha ai e malolo ke aamotia e tau loto mo e liliuina e tau momoui. (Hepe. 4:12) Ko e fifine fuata ne higoa ko Rosa ne putoia a ia ke he mahani fakataka, pihia mo e fakaaoga hehe he kava mo e tau tulaki. “Taha aho, he magaaho ne lahi e fakaatukehe haku,” he talahau e ia, “ne tutala e hoa Fakamoli ki a au hagaao ke he puhala ne maeke he Tohi Tapu ke lagomatai a tautolu ke fakatonu e tau lekua ha tautolu. Ne kamata au ke fakaako e Kupu he Atua, ne kua fulufuluola lahi ai ki a au. Ke he taha ni e mahina ne moua e au e malolo ke kamata e moui mea mo e fou. Ha kua fai kakano e moui haku mogonei, kua nakai kumi fakatotokaaga au ke he kava po ke tau tulaki. Ti he manako lahi au ke eke mo kapitiga ha Iehova, ne eketaha au ke moui fakatatau ke he hana tau tutuaga. Ane mai nakai ma e pulotu aoga he Kupu he Atua, iloa moli e au ka liga hoko mai ke he magaaho nei kua liga fita e fakaoti e au e moui haku.”—Sala. 119:92.
3. Ko e ha ne nakai lata a tautolu ke mataofi he talahau atu e fekau he Tohi Tapu ke he falu?
3 Ne nakai tuga e laulahi he tau tohi he vaha nei, ko e Tohi Tapu kua mahuiga ke he tau tagata ‘he tau motu oti, tau faoa, tau tagata kehekehe, mo e tau vagahau kehekehe.’ (Fakakite. 7:9) Ko e finagalo he Atua ke “fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) Ko e mena ia, kia nakai manatu teao a tautolu to nakai talia e ia e tala mitaki ha ko e hana a tuaga. Pete ia, talahau e fekau he Kautu ke he tau tagata oti, he taute fakahako mai he Tohi Tapu he ha magaaho ka lata tonu ai.
4. Fakaaoga fefe e tautolu e Tohi Tapu ka fakamatala?
4 Fakaaoga e Tau Tohiaga Tapu: Na loga e tau magaaho ke fakaaoga e Tohi Tapu he fekafekauaga. Ka foaki e tau mekasini, lali ke putoia e kupu tohi ne tu he fakataitaiaga ne fakakite mai. Ka fakaaoga e tohi foaki ma e mahina, kua moua he falu e lauiaaga mitaki ke totou taha e kupu tohi kua fifili fakamitaki he kamataaga he fakatutalaaga ha lautolu. Ka taute e tau liu ahi atu, tutala ke he taha po ke loga e tau kupu Tohi Tapu he tau magaaho oti ke lagomatai e tagata he kaina ke moua fakahaga e iloilo tonu. Ka taute e fakaakoaga Tohi Tapu, fakamatapatu e fakatutalaaga aki e tau matapatu kupu tohi. Ka nakai fakalataha ke he fekafekauaga fakatoka pauaki, kia toka tata e Tohi Tapu ke fakaaoga he magaaho ka lata ke taute e fakamatala nakai mautali.—2 Timo. 2:15.
5. Ko e ha kua lata ia tautolu ke eketaha ke fakaaoga e Tohi Tapu he ha tautolu a fekafekauaga?
5 Kia lagomatai e tautolu e falu ke moua e aoga mai he malolo omoomoi he kupu moli he Kupu he Atua he fakaaoga e Tohi Tapu he tau magaaho oti ka lata tonu ai he fekafekauaga ha tautolu.—1 Tesa. 2:13.