Kua Fakaaoga Tumau Nakai e Koe e Kupu he Atua?
1 Ke he lalolagi ne nakai talitonu ke he Tohi Tapu, kua tapiki fakamakai e tau Kerisiano mooli ke he Kupu he Atua. He iloa tonuhia “ko e tau Tohi Tapu oti kana mai he [a]gaga he Atua ia,” ati talia e tautolu mo Iesu Keriso, ne talahau fakamooli he liogi ki a Iehova: “Ko e hau a kupu ko e kupu moli haia.” (2 Timo. 3:16; Ioane 17:17) Liga maeke fēfē a tautolu ke lauia mitaki he fakaaoga tumau e Kupu he Atua?
2 Ako e Tau Tohiaga Tapu: Nakai fakauaua kua ako fakamakutu e Iesu e Kupu he Atua. Kua fakamalolō he mena nei a ia ke fakaako atu, mai he tau Tohiaga Tapu ke he fekafekauaga katoa haana. (Luka 4:16-21; 24:44-46) Fakaputu fēfē e tautolu i loto he manamanatuaga ha tautolu e tanakiaga lagomatai he tau kupu tohi? Taute pihia e tautolu he totou e Tohi Tapu he tau aho takitaha ti manamanatu fakahokulo ke he kupu tohi ne moua e tautolu ke atihake po ke lagomatai pauaki ma e fekafekauaga. Ka tauteute ke lata mo e tau feleveiaaga, kua lata ia tautolu ke kumi mo e totou fakahako mai e tau kupu tohi ne tūtū he Tohi Tapu ti liga taute e tali. Ka ō he feleveiaaga, kua lata ia tautolu ke muitua ke he Tohi Tapu ha tautolu ka totou he tagata lauga e tau kupu tohi. He ako e tau kupu Tohi Tapu ka tauteute a tautolu ke “fakatokatoka fakahako e kupu moli.”—2 Timo. 2:15.
3 Fakaatā e Tohi Tapu ke Tutala: He fakalataha ke he fekafekauaga, kua lata ia tautolu ke fakaatā e Tohi Tapu ke tutala. Ma e fakatai, ka maeke he tuaga, kua lata ia tautolu ke lali ke totou e kupu tohi ke he tagata he kaina. Ka hūhū po ke vagahau totoko mai a ia, kua mitaki lahi ke fakaaoga e Tohi Tapu ke foaki e tali. Ka lavelave e tagata he kaina, liga maeke ia tautolu ke fakamaama e manatu he Tohi Tapu he talahau, “Ato fano au, fakaatā au ke totou ki a koe taha e kupu tohi nei.” Ka maeke, totou fakahako mai he Tohi Tapu, he fakaatā e tagata fanogonogo ke muitua he totou a koe.
4 Taha e tagata he kaina ne fakakite ki ai e tau kupu tohi ke fakatonu aki e Tolu Taha, ne pehē a ia, “Fano au he tapu he moui katoa haaku, nakai la iloa ia e au na talahau he Tohi Tapu e mena nei!” Ne talia fiafia e ia e fakaakoaga Tohi Tapu. Ne pehē a Iesu to logona he haana tau mamoe e leo haana. (Ioane 10:16, 27) Ko e puhala mitaki lahi mahaki ke mailoga e lautolu ne loto fakamooli e kupu mooli ke kitia fakahako mai he tau Tohiaga Tapu. Ati o mai ā tautolu ke fakaaoga tumau e kupu mooli he Kupu he Atua!