Kia Fakalagalaga e Fakaako Atu Haau
1. Ko e heigoa ne fa putoia he lauia mitaki e fakaaoga he Kupu he Atua ke he gahua he fonua?
1 Ko e tau fekafekau lauia mitaki, tuga e aposetolo ko Paulo ne iloa ko e “fakatokatoka fakahako e kupu moli” kua nakai ni putoia e fatiaki he tau Tohiaga Tohi Tapu. (2 Timo. 2:15) Ka fakaaoga e Kupu he Atua, liga fakaaoga fēfē e tautolu e “ole atu” po ke, fakalagalaga ke he fakaako atu ha tautolu?—Gahua 28:23.
2. Fakahokulo fēfē e loto fakaaue ha tautolu ke he Kupu he Atua?
2 Fakaatā e Kupu he Atua ke Vagahau: Fakamua, hagaaki ke he Tohi Tapu he puhala fakalilifu ke he pulotu faka-Atua ne toka i loto. Ko e mauokafua ha tautolu ke he Kupu he Atua kua liga omoomoi e tau tagata fanogonogo ha tautolu ke fakateliga fakamitaki ke he totouaga he kupu tohi. (Hepe. 4:12) Maeke ia tautolu ke pehē: “Aoga lahi kia au he moua e tau manatu he Atua ke he matakupu nei. Mailoga e mena ne talahau he Kupu Haana.” Ka maeke, kia fakaatā e Kupu he Atua ke vagahau he totou hako mai i loto.
3. He oti e totou e kupu tohi, ko e heigoa ka taute ke lagomatai aki e tau tagata fanogonogo ha tautolu ke maama e kakano?
3 Uaaki, fakamaama e kupu ne totou. Tokologa e tagata ne uka he magaaho fakamua ke maama e kupu ne totou. Kua aoga mooli ke fakamaama e kupu tohi ne totou. (Luka 24:26, 27) Hagaaki ke he tau matapatu manatu. Liga lagomatai e hūhū ke fakamooli aki kua maama mitaki e manatu.—Fakatai 20:5; Gahua 8:30.
4. Ko e heigoa e lakaaga fakahiku kua lata ke fakalagalaga ke he fakaako atu ha tautolu?
4 Fakakakano he Fakaaoga e Tau Tohiaga Tapu: Toluaki, eketaha ke hokotia ke he manamanatuaga mo e loto. Lagomatai e tagata he kaina ke kitia e puhala kua aoga e kupu tohi ki a ia ni. Fakakakano he fakaaoga e tau Tohiaga Tapu ka fakalagalaga e tagata ke hiki e manamanatuaga haana. (Gahua 17:2-4; 19:8) Ma e fakatai, he oti e totou he Salamo 83:18 maeke ia tautolu ke fakakakano he puhala kua uho lahi ke iloa e higoa he taha tagata ke feaki e fakafetuiaga fakatagata. Ti, liga hūhū, “Logona nakai e koe ko e iloa e higoa he Atua to fai kakano lahi e tau liogi haau?” He matutaki e kupu tohi ke he moui ni he tagata he kaina he puhala nei kua fakakite e aoga lahi. Ko e fakaakoaga fakalagalaga pihia mai he Kupu he Atua kua futiaki e tau tagata loto fakamooli ke tapuaki ki a Iehova, ko e Atua mooli mo e moui.—Iere. 10:10.