Puhala ke Fakamafoki e Falu
1 Ne talahaua ai e aposetolo ko Paulo mo fekafekau fakamafoki. (Gahua 19:26) Ti tala age foki e Patuiki ko Akeripa ki a ia: “Toe tote ni, ati fakamafoki ai e koe au ke eke mo Kerisiano.” (Gahua 26:28) Ko e heigoa ne taute e fekafekauaga ha Paulo ke fakamafoki lahi? Ne fakakakano fakamitaki e ia mai he tau Tohiaga Tapu, he hikihiki ai hana tau matakupu ke he hana tau tagata fanogonogo.—Gahua 28:23.
2 He fifitaki ki a Paulo, kua lata foki ia tautolu ke fakamafoki he fekafekauaga ha tautolu. Fefe? He fakaaoga e maamaaga ka tututala mo e fanogonogo ke he falu. (Tau Fakatai 16:23) Tolu e lakaaga aoga ka lagomatai a tautolu ke fakakatoatoa e mena nei.
3 Fanogonogo Fakamitaki: He vagahau e taha tagata, fanogonogo ke he mena kua fa mahani ti atihake ai. Ka fakakite e ia e totokoaga, lali ke manamanatu ke he kakano i tua. To lagomatai ke iloa mahino e mena kua talitonu a ia ki ai, kakano kua talitonu ai, mo e mena kua omoomoi a ia ki ai. (Fakatai 18:13) Kia utu mai fakailoilo a ia.
4 Kia Huhu: Ka fakakite he tagata e taofiaga ke he Tolu Taha, kia huhu a koe: “Kua talitonu tumau kia a koe ke he Tolu Taha?” Mui mai mo e: “Kua taute nakai e koe e kumikumiaga fakamatafeiga ke he mena kua talahau he Tohi Tapu hagaao ke he vala tala?” Kia huhu foki a koe: “Kaeke ko e Atua taha vala he Tolu Taha, nakai kia amanaki a tautolu to talahau fakamahino mai pihia he Tohi Tapu?” Ko e tau tali ka moua e koe to lagomatai a koe ke fakakakano mo e tagata ke he mena kua talahau he tau Tohiaga Tapu.
5 Fakaaoga e Fakakakanoaga Mitaki: Ne huhu e Fakamoli ke he fifine ne talitonu ko e Atua a Iesu: ‘Ka lali a koe ke fakatai ua e tagata kua tatai, ko e heigoa e fakafetuiaga he magafaoa kua liga fakaaoga e koe?’ Ne tali e ia: “Liga fakaaoga e ia ua e lafu tugaane.” Ne lafi e ia: “Liga mo e mahaga tatai foki. Ka e he fakaako a tautolu ke onoono ke he Atua ko e Matua mo e ko ia ko e Tama, ko e heigoa e manatu ne fakakite e Iesu?” Kua moua he fifine e manatu ko e taha kua fakamua mo e lahi e pule. (Mata. 20:23; Ioane 14:28; 20:17) Nukua hokotia e manamanatuaga mo e loto hana ke he puhala he fakamafokiaga.
6 Moli, nakai fanogonogo oti e tau tagata ke he kupu moli, pete ne iloilo mo e tonutika e fakamatalaaga ha tautolu. Ka e tuga a Paulo, kia fakailoilo a tautolu he kumi a lautolu kua loto fakamoli he matakavi ha tautolu, he fakamafoki a lautolu ke talia e fekau he Kautu.—Gahua 19:8.