Gahua kua Fakahauhau
1 Kua fakahauhau he fekau he Tohi Tapu a lautolu oti kua talia mo e fakagahua ai ke he tau momoui ha lautolu. (Sala. 19:7, 8) Kua lagomatai a lautolu ke vevete kehe mai he tau fakaakoaga fakavai mo e tau gahua matematekelea mo e foaki e amaamanakiaga mauokafua ma e vaha anoiha. Pete ia, ko lautolu kua moua e tala mitaki kua nakai ni aoga ki a lautolu hokoia. Ne fakahauhau foki ki a lautolu ne talahau atu ke he falu e tau kupu moli he Tohi Tapu.—Fakatai 11:25.
2 Tupuolaola ha ko e Fekafekauaga: Ne tala age a Iesu ko lautolu ne talia e lakau hahamo he tuaga tutaki he Kerisiano, kua putoia ai e gahua fakamatala mo e taute tutaki, ka ‘moua e okiokiaga ma e tau solu ha lautolu.’ (Mata. 11:29) Kua moua e ia e tupuolaola he fakamatala ke he falu. Kua tuga e mena kai ia ma hana. (Ioane 4:34) He fakafano e ia e tau tutaki toko 70 ke fakamatala, ne olioli a lautolu he kitia e lalagoaga ha Iehova ke he tau laliaga ha lautolu.—Luka 10:17.
3 Tokologa e tau Kerisiano he vaha nei kua tupuolaola pihia foki he fakalataha ke he gahua fakamatala. Taha e matakainaga fifine ne pehe: “Kua tupuola e fekafekauaga ha kua foaki ke he moui haku e puhala mo e fai kakano. Ko e tau lekua fakatagata mo e tau tupetupe he tau aho takitaha ne galo fakahaga ka fakalataha au ke he fekafekauaga.” Taha foki e fekafekau makai ne pehe: “Ko e fekafekauaga . . . kua eke a Iehova ke moli ki a au ke he tau aho takitaha mo e mai ki a au e mafola mo e lahi e fiafia he loto nukua nakai moua he ha puhala kehe foki.” Ko e fakamonuina ha ia ke eke mo ‘tau ekegahua fakalataha mo e Atua’!—1 Kori. 3:9.
4 Totonu e Lakau Hahamo he Keriso: He tomatoma ke he tau Kerisiano ke ‘eke taha fakamalolo a lautolu,’ ne nakai poaki a Iesu ke he mena ne nakai maeke a tautolu ke foaki. (Luka 13:24) Moli, kua uiina fakaalofa e ia a tautolu ke ‘o mai ki lalo he lakau hahamo hana fakalataha mo ia.’ (Mata. 11:29, matahui tala NW.) Ko lautolu kua lata ke fahia ke he tau tuaga uka kua maeke ke mauokafua ko e gahua solu katoa ha lautolu, pete ni he fakakaupa, kua fakafiafia lahi ke he Atua.—Mareko 14:6-8; Kolo. 3:23.
5 Ko e fakahauhau ha ia ke fekafekau ke he Atua nukua loto fakaaue ke he ha mena ne taute e tautolu ke lata mo e hana higoa! (Hepe. 6:10) Kia tutuli tumau a tautolu ke foaki ki a ia e otiaga he fahia ha tautolu.