Tau Fonoaga he Fahimotu mo e Lalolagi Katoa kua Fakalagalaga a Tautolu Kia Fakaheke Atu ke he Atua!

Ko e tau Fonoaga Fahimotu mo e Lalolagi Katoa “Kia Fakaheke Atu ke he Atua” ne kua fakahoko nukua foaki e fakamatala mua ue atu. Ko e tau mena tutupu fakateokarasi aoga nei ne taute ke fakatokoluga aki e higoa ha Iehova mo e fakatolomaki e lotomatala ha tautolu ke “ta atu kia Iehova e fakahekeaga he hana higoa.” (Sala. 96:8) Moli, kua latatonu a ia ke fakaheke ha ko e hana tau gahua tufuga homo ue atu, nukua fakaata e tau mahani mitaki ue atu hana.​—Iopu 37:14; Fakakite. 4:11.

He fakaaoga e tau huhu na fakalataha mo e tau fakamaumauaga fakatagata hau, kia tauteute mo e fai vala he liu fakamanatu e fakaholoaga he fonoaga ka fakahoko he fahi tapu ha Tesemo 1.

1. Maeke fefe he tufugatiaaga nakai gahuahua ke fakapuloa e fakahekeaga he Atua, ti kehe fefe e mena ia mai he puhala kua fakaheke he tau tagata a ia? (Sala. 19:1-3; “Talahau he Tufugatiaaga e Fakaheke he Atua”)

2. Ko e heigoa e moliaga he mogonei kua fakaata he fakafaliuaga, ti ko e heigoa e puhala he tau Kerisiano he vaha nei kua fakalagalaga he moliaga nei? (Lauga taute pauaki, “Tau Fakakiteaga Lilifu Fakaperofeta kua Fakalagalaga a Tautolu!”)

3. Maeke fefe a tautolu ke feaki e mahani fakatokolalo ne fakatata he perofeta ko Tanielu, ti to aoga fefe ki a tautolu he taute pihia? (Tani. 9:2, 5; 10:11, 12; “Ne Fakakite e Fakahekeaga ha Iehova ki a Lautolu kua Fakatokolalo”)

4. (a) Ko e heigoa e tau mena tolu hagaao ke he fakafiliaga faka-Atua kua maeke ke ako e tautolu mai he perofetaaga ha Amosa? (Amosa 1:3, 11, 13; 9:2-4, 8, 14) (e) Ko e heigoa e fakaakoaga aoga kua moua mai he Tau Fakamoli a Iehova he vaha nei mai he fakafifitakiaga hataki ne moua ia Amosa 2:12? (“Ko e Perofetaaga ha Amosa​—Ko e Fekau Ia ma e Vaha ha Tautolu”)

5. (a) Ko e heigoa e tau hagahagakelea he nakai fakalatalata e fakaaoga he kava, pete he nakai konahia e tagata? (e) Maeke fefe ke fakahako e lekua he nakai mahani fakalatalata? (Mareko 9:43; Efeso 5:18; “Fakamamao Mai he Matahele he Fakaaoga Hehe e Kava”)

6. Aoga fefe a koe mai he tohi fou “See the Good Land”? (“‘Ko e Motu Mitaki’​—Ata he Parataiso”)

7. Ko e heigoa e tau puhala tolu kua maeke ia tautolu ke ‘fakakite tuga e mata nakai ufi e lilifu ha Iehova’? (2 Kori. 3:18; “Fakakite Tuga e Tau Fakaata e Lilifu ha Iehova”)

8. Ko e heigoa e punaaga he vihiatia nakai fakafili tonu, ti ko e heigoa kua maeke ke lagomatai a tautolu ke fakatumau e mahani fakamoli ha tautolu pete he moua e vihiatia ia? (Sala. 109:1-3; “Vihiatia Teao”)

9. Ko e heigoa e onoonoaga tuga e Keriso ke he mua ue atu, ti fifili fefe he tagata kua lata ia ia ke feaki fakamatafeiga e onoonoaga nei? (Mata. 20:20-26; “Feaki e Onoonoaga Tuga e Keriso ke he Mua Ue Atu”)

10. Ko e heigoa kua maeke ke lagomatai a tautolu ke tumau e hakahakau fakaagaga pete ne mategugu e tino? (“Lolelole ka e Nakai Mategugu”)

11. Ko e heigoa falu matakau kua fakaaoga e Satani ke fakatolomaki e mahani fakavai, ti ko e heigoa e tali faka-Tohiaga Tapu kua latatonu ke he tau laliaga ke liliu kehe e tua ha tautolu? (Ioane 10:5; “Mataala ‘ke he Leo he Tau Tagata Kehe’”)

12. (a) Maeke fefe he tau mamatua ke muitua e fakafifitakiaga ha Iesu ne fakamau ia Mareko 10:14, 16? (e) Ko e heigoa hau ne manako hagaao ke he tohi fou Learn From the Great Teacher? (“Ha Tautolu a Fanau​—Ko e Tufaaga Uho”)

13. Fakaheke fefe he tau fuata a Iehova? (1 Timo. 4:12; “Puhala Hane Fakaheke he Tau Fuata a Iehova”)

14. Ko e heigoa e tau vala kua mua atu ne manatu e koe mai he taute tala “Fakamatala Fakamalolo Pete e Totokoaga”?

15. Maeke fefe a tautolu ke muitua e fakafifitakiaga ne fakatoka e (a) Peteru mo Ioane? (Gahua 4:10) (e) Setefano? (Gahua 7:2, 52, 53) (i) he fakapotopotoaga Kerisiano he senetenari fakamua? (Gahua 9:31; taute tala mo e lauga “Fakapuloa e Tala Mitaki ‘mo e Nakai Fakalolelole’”)

16. (a) Ko e heigoa e tau puhala nukua mauokafua a tautolu ke foaki e fakahekeaga ke he Atua? (e) Ko e heigoa kua maeke ke iloa moli e tautolu he fakaaoga e mena ne ako e tautolu he Tau Fonoaga “Kia Fakaheke Atu ke he Atua”? (Ioane 15:9, 10, 16; “‘Kia Fua Loga Mai’ ke Fakaheke Atu ki a Iehova”)

He manamanatu fakahokulo ke he fakaakoaga fakaagaga mitaki ne fakatoka mai he fonoaga, to omoi a tautolu ke fakagahuahua e tau mena ne ako e tautolu. (Filipi 4:8, 9) To fakamalolo he mena nei e fifiliaga ha tautolu ke ‘eke e tau mena oti kana ke fakaheke ke he Atua.’​—1 Kori. 10:31.