Fakaaoga Fakalaulau Hau a Tau Magaaho
1. Ko e heigoa e paleko ne fehagai mo e tau tagata he tau matakavi oti he vaha nei?
1 Ke he magahala he vaha nei mo e tau matini kua fakamukamuka aki e gahua, tokologa ne moua kua mua atu e loga he tau mena ke taute mo e tote e magaaho ke taute ai. Ko e paleko nakai ki a koe ke fakatumau e fakaholoaga fakaagaga mitaki? Kua manako nakai a koe ke lahi e magaaho ma e fekafekauaga? Maeke fefe ia tautolu ke fakaaoga fakamitaki e tau magaaho ha tautolu?—Sala. 90:12; Filipi 1:9-11.
2, 3. Ko e heigoa e paleko nukua fakatoka mai he tau puhala uta fekau, mo e maeke fefe ia tautolu takitokotaha ke kikite hifo e tagata ki a ia ni?
2 Mailoga e Tau Mena Moumou Magaaho: Kua lata ia tautolu oti ke kumikumi hifo he taha magaaho ke he taha magaaho e puhala ne fakaaoga e tautolu ha tautolu a tau magaaho. Kua fakamalolo mai he Tohi Tapu: “Hanai, a mutolu kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia [“fakatau e tau magaaho ne lata ma mutolu,” NW], ha kua kelea e tau aho ainei.” (Efeso 5:15, 16) Manamanatu ke he tau paleko ne kua tupu mai ha ko e holo ki mua he tau puhala uta fekau. Pete kua aoga e tau komopiuta mo e falu koloa eleketoniki, kua maeke e tau mena ia ke eke mo matahele kaeke kaumahala a tautolu ke fakaaoga fakalaulau ha tautolu a tau magaaho.—1 Kori. 7:29, 31.
3 Lata ia tautolu ke igatia mo e huhu hifo ki a ia ni: ‘Kua fai magaaho kia a au ne fakaaoga he tau aho takitaha ke totou mo e tali e tau fekau E-mail ne tuga kua fakatauhele? Kua fa tumau kia a au ke hea po ke fakafano he tau fekau matatohi ke he telefoni hagaao ke he tau mena fakateaga? (1 Timo. 5:13) Kua fa kumikumi viko noa kia a au ke he Internet po ke hikihiki noa ni he tau channel ka kitekite televisoni? Kua eke kia e lavelave haku ke he tau pele eleketoniki ke tauhele e fakaako haku he Kupu he Atua?’ Maeke e tau tutuliaga pihia ke fofo halahu e moui fakaagaga ha tautolu.—Fakatai 12:11.
4. Ko e heigoa e hikiaga ne taute he taha fuata, mo e ko e ha?
4 Fakaaoga Fakapulotu e Tau Magaaho: Kua hihiga e tau koloa eleketoniki ke fofo e tau magaaho mo e tau manamanatuaga ha tautolu. Ko e fuata ne kua mamafa lahi ke he tau pele komopiuta ne talahau: “Falu magaaho ne pele au to fano ke he fekafekauaga po ke ke he feleveiaaga Kerisiano, ne uka lahi ia au ke fanogonogo. Kua teitei laulahi ni au ke manamanatu tumau hagaao ke he puhala ke taute aki e lekua he pele ka liu ki kaina. Ne lauia kelea e haku a fakaakoaga fakatagata mo e totou tumau he Tohi Tapu. Ne kamata e olioli haku he fekafekau ke he Atua ke tolomuli ki tua.” He mailoga kua lata ia ia ke taute e tau hikiaga, ne uta kehe oti e ia e tau pele komopiuta hana. “Ne uka lahi e mena ia,” he talahau e ia. “Kua lahi mahaki e manamanatu haku ke he tau pele ke he mena ne manatu e au. Ka e mailoga foki e au e logonaaga fiafia he kautu ha kua iloa kua taute ai e au ma e mitaki haku ni.”—Mata. 5:29, 30.
5. Maeke fefe ia tautolu ke fakatau e tau magaaho ma e tau tutuliaga fakaagaga, mo e aoga fefe ki a tautolu ka taute pihia?
5 Kua liga latatonu e tau fafatiaga pihia kaeke fai vala ne kua lata ia koe ke taute e tau hikihikiaga ki ai. Maeke nakai ia koe ke fakatau hafa e tula he tau aho takitaha mai he tau gahua nakai aoga? Kua kavi ke lahi pihia e magaaho ke maeke ia koe ke totou e Tohi Tapu katoa he taha e tau. Ko e palepale fakaagaga ha ia ka pihia! (Sala. 19:7-11; 119:97-100) Kia fakatoka fakatonu e tau magaaho ke totou e Tohi Tapu, tauteute ma e feleveiaaga, mo e fekafekauaga he fonua. (1 Kori. 15:58) Ko e taute he mena nei to lagomatai a koe ke mailoga e tau mena moumou magaaho mo e to lagomatai a koe ke ‘iloa e finagalo ha Iehova.’—Efeso 5:17.