Fakaaoga he Internet​—Kia Mataala ke he Tau Hagahagakelea!

¹ Kua olioli he tau tagata a Iehova e feoakiaga fiafia mo e falu. Kua olioli a lautolu he fetutalaaki ke he tau mena iloa he fekafekauaga he fonua, mo e fakaaue he logona hagaao ke he tau mena tutupu kua matutaki mo e Tau Fakamoli a Iehova mo e gahua he Kautu he lalolagi katoa. Kua manako a lautolu ke iloa hagaao ke he ha mena kehe lahi ne kua tutupu ke he tau matakainaga ha tautolu, tuga e matematekelea tufakaofo po ke tutupu pauaki, ti manako a lautolu ke iloa kaeke kua fai mena ke taute e lautolu he lagomatai. Ko e fiafia pihia kua fakakite e fakalatahaaga he fakamatakainaga, fakamoli ai kua taute moli e tautolu e feofanaki ke he taha.​—Ioane 13:34, 35.

² Kua logona mafiti e tautolu he vaha nei e tau mena tutupu he lalolagi. Ko e fakapuloaaga he letio mo e televisoni ne talahau fakamatafeiga e tau mena tutupu ke he tau tagata he lalolagi katoa. Kua taute foki e telefoni mo matutakiaga mafiti mo e tau tagata he lalolagi. Ko e matutakiaga talahaua lahi he vaha fou nei he lalolagi ko e Internet.​—Kikite Awake!, Iulai 22, 1997.

³ Ko e mouaaga he telefoni ne hafagi e puhala ke fakamafiti e matutaki fakatagata ke he lalolagi katoa. Pete ni e aoga lahi e telefoni, kua lata e mataala ke he puhala ne kua fakaaoga aki, ha kua eke ia mo kanavaakau ma e feoakiaga po ke tau matagahua nakai tonu, ti ko e molea e fakaaoga he telefoni kua tauuka. Ko e televisoni mo e letio kua fai aoga ma e fahi he fakaakoaga. Momoko ai, kua lahi he tau fakaholoaga ko e moumou he mahani mitaki, mo e hagaaki mau ki ai kua moumou magaaho. Kua fakamahino mai ko e pulotu kua lata ia tautolu ke fifili e puhala fakaaoga he televisoni mo e letio.

⁴ Kua maeke he Internet ke fakamatutaki nakai totogi lahi mo e tau tagata miliona he lalolagi, ti hafagi ai e hala ke he tau vala tala loga lahi mahaki. (Awake!, Ianuari 8, 1998) Ko e fakaaoga fakahanoa he Internet, kua fakatapakupaku e tagata ke he tau hagahagakelea lahi fakaagaga mo e mahani kelea. Maeke fefe e mena nei?

⁵ Tokologa ne kua manamanatu hagaao ke he mouaaga mafiti he vala tala kua fakakite e puhala ke talaga aki e tau kanavaakau, putoia ai e tau pomu. Kua gugu e takitaki gahua ha kua lahi e magaaho ne moumou he tau tagata gahua he fakaaoga e Internet. Kua lahi mahaki e mena kua talahau he tau tohi ha tautolu hagaao ke he tau hagahagakelea fakaagaga kua maaliali ne fehagai mo e Internet. Loga e fahi Web kua fakakite e tau tohi favale mo e telefua ne kua nakai ke lata ma e tau Kerisiano. (Sala. 119:37) Lafi ke he tau mena hagahagakelea nei, ha ha i ai e hagahagakelea muitui ne kua lata pauaki he Tau Fakamoli a Iehova ke mataala ki ai. Ko e heigoa e hagahagakelea nei?

⁶ To uiina nakai e koe e tagata kehe ke he kaina hau ka e nakai kumi fakamua ko hai a ia? Ka e kua ka nakai maeke ia koe ke iloa a ia? Maeke nakai ia koe ke fakaata e tagata kehe ia ke nonofo mo e fanau hau hoko lautolu ni? Ko e mena kua maeke moli anei he Internet?

⁷ Ko e tohi eleketono ne fakafano mo e moua mai he falu a tagata kua nakai iloa e koe. Ko e mena taha ia ka tutala fakaeleketono a koe ke he fonoaga po ke poko tututala. Ko e tau tagata ne fakalataha ki ai kua talahau falu magaaho ko e Tau Fakamoli a Iehova, ka e nakai moli. Falu tagata kua liga talahau ke eke mo fuata ka e nakai. Po kua talahau fakavaia e tagata ke eke mo tagata tane po ke fifine.

⁸ Ko e vala tala ne fakahoko atu ki a koe kua hau he puhala he tau iloaaga po ke tau tala hagaao ke he tau taofiaga ha tautolu. Ko e vala tala nei kua fakahoko atu ke he falu, ti maeke he falu ke fakahoko atu foki ke he falu. Ko e vala tala kua fa nakai fakamaama mo e liga nakai moli. Liga ufitia he tau talahauaga e puhala ke fakaholofa aki e tau kakano he tiaki e taofiaga.​—2 Tesa. 2:1-3.

⁹ He tokaloto e hagahagakelea nei, ka fakaaoga e koe e Internet, huhu ki a koe ni: ‘Ko e heigoa kua fakaaoga e au ki ai? To fai puhala kia ke fakahagahagakelea fakaagaga aki au ha ko e puhala hane fakaaoga ai e au? Kua lafilafi kia au ke he kelea fakaagaga he falu?’

¹⁰ Tau Fahi Web he “Tau Fakamoli a Iehova”: Manamanatu la, ma e fakatai, ko e tau fahi Internet kua fakatu he tau tagata ne kua talahau ko e Tau Fakamoli a Iehova. Kua uiina e lautolu a koe ke kikite atu ke he tau fahi ha lautolu ke totou e tau iloaaga ne tohi he falu kua talahau ai ko e Tau Fakamoli. Kua fakamalolo a koe ke talahau e tau manatu mo e tau onoonoaga hau ke he tau tohi he Sosaiete. Kua foaki he falu e tau fakaaueaga hagaao ke he tau fakatataaga ne kua aoga ke he fekafekauaga he fonua. Kua foaki he tau fahi nei e tau poko tututala ma e tau tagata ke fakamatutaki ki ai, ke fakaata e fakamatutakiaga mo e falu ke tatai ke he tutala he telefoni. Fa mahani ke takitaki a koe ke he falu fahi ne kua maeke ia koe ke feleveia mo e Tau Fakamoli a Iehova he lalolagi katoa. Ka e iloa moli nakai e koe ko e tau matutakiaga nei na liga moua mai he tau tagata tiaki e taofiaga?

¹¹ Ko e feoakiaga ne moua he Internet kua nakai matutaki mau mo e hatakiaga ne moua he Efeso 5:15-17. Ne tohia he aposetolo ko Paulo: “Hanai, a mutolu kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia fakaaoga e mutolu e tau aho he mouiaga nai, ha kua kelea e tau aho ainei. Hanai, aua neke goagoa a mutolu, ka kia iloa e mutolu e finagalo he Iki.”

¹² Ko e fakapotopotoaga Kerisiano ko e puhala fakateokarasi ne kua fagai fakaagaga he “fekafekau fakamoli mo e loto matala” a tautolu. (Mata. 24:45-47) I loto he fakatokatokaaga he Atua, kua moua e tautolu e takitakiaga mo e puipuiaga ke fakatumau a tautolu ke vevehe kehe mai he lalolagi ti pihia foki mo e fakalagalaga ke lavelave tumau ke he gahua he Iki. (1 Kori. 15:58) Ne fakakite he salamo ne moua e ia e olioli mo e logonaaga haohao mitaki he tau tagata fakapotopoto he Atua. (Sala. 27:4, 5; 55:14; 122:1) Ne foaki foki he fakapotopotoaga e lalagoaga mo e lagomataiaga fakaagaga ma lautolu ne fakalataha ki ai. Ko e mena ia, maeke ia koe ke moua e matakau he tau kapitiga fakaalofa, manamanatu, mo e leveki​—ko e tau tagata kua iloa fakatagata e koe ti mautali he makai ke lagomatai mo e fakamafana falu he tau magaaho tupetupe. (2 Kori. 7:5-7) Ko e tau tagata he fakapotopotoaga kua puipui he tau foakiaga faka-Tohiaga Tapu he tuku ki tua a lautolu ne kua agahala nakai fakatokihala po kua fakaohooho e manatu ke tiaki e taofiaga. (1 Kori. 5:9-13; Tito 3:10, 11) Maeke nakai ia tautolu ke moua e tau fakatokatokaaga fakaalofa pehenei ka feoaki mo e falu he Internet?

¹³ Kua kitia maali ai e nakai moli. Ko e falu fahi Web kua maaliali he puhala mai e tau tohi he tiaki e taofiaga. Ko e tau fahi Web pihia kua kehe e talahau, mo e ko lautolu kua fakatoka e fahi ia kua foaki e fakamaamaaga fakamatafeiga ke fakamau aki ko lautolu moli ko e Tau Fakamoli a Iehova. Liga ole foki a lautolu ke he vala tala mai ia koe ke maeke ke fakakite ko koe taha he Tau Fakamoli a Iehova.

¹⁴ Manako a Iehova ki a koe ke fakagahuahua e lotomatala. Ko e ha? Ha kua iloa e ia to puipui mai a koe he tau hagahagakelea kehekehe. Kua hafagi e Tau Fakatai 2:10-19 he talahau: “Ha ko e mena hoko atu e iloilo ke he loto hāu; ti mitaki foki kia koe e pulotu; to leveki a koe he loto manamanatu; to leoleo a koe he pulotu.” Puipui a koe mai he heigoa? Mai he tau ‘puhala kelea,’ haia lautolu kua toka e puhala tututonu, mo e tau tagata kua mahani kelea mo e eke lagatau ke he ha puhala ni ha lautolu.

¹⁵ Ka hohoko a tautolu ke he Fale he Kautu, nakai fakauaua ai ko tautolu mo e tau matakainaga ha tautolu. Iloa e tautolu a lautolu. Nakai fai tagata kua lata ke fakamoli e mena nei ha kua kitia maali ai e fakaalofa fakamatakainaga. Kua nakai lata fakatagata a tautolu ke foaki e tau fakamoliaga ke fakakite aki ko tautolu moli ko e taha he Tau Fakamoli a Iehova. Kua moua mogoia e tautolu e feutaaki moli he fakamaloloaga ne kua vagahau ki ai a Paulo ia Heperu 10:24, 25. Kua fakamalolo he tau fahi Web e feoakiaga ne nakai falanaki ke he mena kua foaki e mena nei. He tokamau e tau kupu he Salamo 26:4, 5 kua fakamataala a tautolu ke he hagahagakelea kua mukamuka lahi ke fehagai ka fakaaoga e tau fahi Web he Internet.

¹⁶ Nakai fai fakakaupaaga po ke fakakia ke he tau faga vala tala kua fakamau mo e moua ai he tau tagata fakaaoga e Internet. Fa mahani, ko e tau fanau mo e tau fuata mui kua mukamuka lahi mo tau matahele he favale mo e fakakelea he mena nei. Kua falanaki, tuaha, mo e tepetepetu e tau fanau ke kumikumi e lalolagi fou he tau komopiuta (cyberspace). Ko e mena ia kua lata e tau mamatua ke leveki e tau fanau ha lautolu mo e foaki age ki a lautolu e takitakiaga faka-Tohiaga Tapu hagaao ke he puhala ke fakaaoga e Internet, tuga ni he hataki e lautolu a lautolu ke he fifiliaga he ha lautolu a leo kofe po ke tau kifaga.​—1 Kori. 15:33.

¹⁷ Momoko ai, ko e falu kua eke mo tau matakainaga ha tautolu he magaaho fakamua ne tuku ai ki tua ha ko e feoakiaga ne kamata he feleveia mo e tau tagata he lalolagi he tau poko tututala he Internet mo e he magaaho fakamui ne tataki ai ke he mahani feuaki. He ofo mate ai, ne tohitohi mai e tau motua kua tiaki moli he falu e tau tane po ke tau hoana ha lautolu ke tutuli e fakafetuiaga kua kamata he Internet. (2 Timo. 3:6) Ne fakatikai he falu tagata e kupu moli ha ko e talitonu ke he vala tala kua foaki he tau tagata tiaki taofiaga. (1 Timo. 4:1, 2) Manamanatu ai ke he tau hagahagakelea mamahaki nei, nakai kia tonu ke mataala neke putoia ke he tau magaaho tututala he Internet? Moli ai, ko e fakagahuahua e pulotu, iloilo, manamanatuaga, mo e lotomatala ne talahau he Tau Fakatai 2:10-19 kua lata ke takitaki a tautolu he mena nei.

¹⁸ Mailoga ai, kua tokologa e tagata ne kua fakatu e tau fahi Web ke fakamatala e tala mitaki. Loga he tau fahi nei ne fakatokatoka ai he tau matakainaga nakai pulotu. Falu fahi na liga fakatokatoka he tau tagata tiaki taofiaga kua manako ke fakataki a lautolu ne tuaha. (2 Ioa. 9-11) Talahau ai kua lata nakai he tau matakainaga ha tautolu ke fakatu e tau fahi Web pihia, ko e Ha Tautolu a Fekafekauaga he Kautu, Novema 1997, lau 3, ne pehe: “Kua nakai lata he ha tagata taha ke tauteute e tau fakailoaaga i loto he Internet hagaao ke he Tau Fakamoli a Iehova, ha tautolu e feua, po ke ha tautolu a tau taofiaga. Kua foaki he fahi pauaki ha tautolu ko e [www.watchtower.org] ne fakakite e vala tala tonu ma e ha tagata ka manako ki ai.”

¹⁹ Tau Tohi Fakaako he puhala he Internet? Kua logona he falu kua foaki e lautolu e fekafekauaga ke he tau matakainaga he fakahu e vala tala kumikumi ne matutaki mo e tau matagahua fakateokarasi kehekehe. Ma e fakatai, liga taute he tagata e kumikumiaga ne fakave ke he fakatokaaga he lauga mo e fakahu e mena nei, manamanatu ai ko e vala tala nei to aoga ki a lautolu kua lata ke mautauteute e lauga taha ia. Kua fakahu he falu e tau kupu tohi ma e Fakaakoaga Kolo Toko po ke foaki e tohi ma e Aoga Fekafekau Fakateokarasi po ke Fakaakoaga Tohi he Fakapotopotoaga. Liga foaki he falu e tau manatu ma e tau fakatataaga he fekafekauaga he fonua. Lagomatai moli kia e tau mena ia?

²⁰ Ko e tau tohi kua foaki he fakatokatokaaga a Iehova kua fakalagalaga e tau manamanatu ha tautolu aki e tau manatu atihake mo e fakamahani a tautolu ke “mailoga e tau mena mitaki mo e tau mena kelea.” (Hepe. 5:14) Pehe nakai a tautolu kua moua e mena nei kaeke ke taute he falu e kumikumiaga ma tautolu?

²¹ Ne talahau ke he tau tagata Perea “kua mua e mahani mitaki ha lautolu nai ke he tau tagata Tesalonia.” Ko e ha? “Ha kua talia e lautolu e kupu mo e loto makutu, kua kumikumi ke he tau Tohi ke he taha aho mo e taha aho, po ke moli e tau mena ia.” (Gahua 17:11) Pete ni e fakamatala a Paulo mo Sila ki a lautolu, nakai eke e kupu moli ma lautolu ni ka nakai fai kumikumiaga fakatagata.

²² He fakaaoga e kumikumiaga he taha tagata ma e lauga po ke falu vala he feleveiaaga kua fakakaumahala moli e kakano he fakaakoaga fakatagata. Nakai kia ko e manako hau ke ati hake e tua fakatagata ni hau ke he Kupu he Atua? Fakave ke he malolo fakatagata, maeke ia koe ke fakakite ke he tau tagata e tua hau​—ke he tau lauga hau, ke he tau tali ke he tau feleveiaaga, mo e he fekafekauaga he fonua. (Roma 10:10) He fakaaoga e kumikumiaga he taha tagata kua nakai lautonu mo e talahauaga kua foaki he Tau Fakatai 2:4, 5 ke igatia ni mo e ‘kumi mo e moua ai e iloilo ke he Atua tuga e koloa galo.’

²³ Ma e fakatai, ka kumi e tau kupu he Tohi Tapu ni hau, maeke ia koe ke liu fakamanatu fakaku e tala he tau kupu takitaha. Maeke ia koe ke “kumi fakamakutu e tau mena oti kana,” tuga he taute e Luka he tohi e ia hana Evagelia. (Luka 1:3) Ko e laliaga fakalahi atu to lagomatai foki a koe ke pulotu he kumi e tau kupu tohi he fekafekauaga mo e ka taute e tau lauga. Tokologa ne talahau kua nava a lautolu ke he Tau Fakamoli a Iehova ha kua iloa e lautolu e puhala ke fakaaoga e tau Tohi Tapu ha lautolu. Ko e puhala ni ke fakaaoga e mena nei ki a tautolu ka taute e tautolu fakatagata ke kumi e tau kupu tohi he tau Tohi Tapu ni ha tautolu.

²⁴ Fakaaoga Fakapulotu e Magaaho ha Tautolu: Ko e taha manamanatuaga ke he mena nei kua hagaaki ke he lahi he magaaho kua fakaaoga e tautolu ke taute, totou, mo e tali ke he vala tala ne fakahu he Internet. Kua fakamalolo he Salamo 90:12 a tautolu ke liogi: “Kia fakaako mai pihia e koe a mautolu ke totou ha mautolu a tau aho, kia moua ai he tau loto ha mautolu e iloilo.” Ne talahau e Paulo: “Kua gahoa e tau aho kua toe.” (1 Kori. 7:29) Fakalaulahi ki ai: “Hanai, kia mahani mitaki a tautolu fakalata ke he tau aho ha i ai ia tautolu, ke he tau tagata oti kana, ka e au atu ke he faoa ne tua.”​—Kala. 6:10.

²⁵ Kua fakamaama mai he tomatomaaga ia e lata ha tautolu ke fakapulotu he fakaaoga e magaaho ha tautolu.” Ko e aoga lahi ha ia mogoia ka fakaaoga e tautolu e magaaho ke totou e Kupu he Atua! (Sala. 1:1, 2) Ko e feoakiaga mitaki lahi a ia ke moua e tautolu. (2 Timo. 3:16, 17) Tau mamatua, fakaako nakai e mua ke he tau fanau ha mua e uho he fakaaoga fakapulotu e magaaho ke he tau mena he Kautu? (Fakama. 12:1) Ko e lahi he magaaho ne fakaaoga he fakaakoaga Tohi Tapu fakatagata mo e he magafaoa, o atu he feleveiaaga, mo e fekafekauaga he fonua kua mahomo atu mai he fakamole e tau magaaho he onoono ke he Internet, he amanaki ai ke moua e tau lagomataiaga.

²⁶ He mena nei, ko e puhala pulotu ke hagaaki e onoonoaga ha tautolu ke he tau mena fakaagaga mo e ke he tau mena kua aoga mo e latatonu ke he tau momoui ha tautolu ko e tau Kerisiano. Ne ui e mena nei he taute e tau fifiliaga manamanatu mitaki he fakalilifu e vala tala kua uho ke he magaaho mo e manatu ha tautolu. Ko e tau Kerisiano, kua aoga ke he tau momoui ha tautolu ne fakakatoatoa ai he Keriso, ne pehe: “Ka kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia kia mutolu.” (Mata. 6:33) Fiafia nakai a koe ka puke e moui hau he tau mouaaga he Kautu ka e nakai he ha matagahua foki?

²⁷ E-Mail he Internet: Pete kua tonu ke talahau e tau iloaaga po ke tau manatu fakatagata ke he magafaoa po ke tau kapitiga ne nonofo mamao, na fakaalofa moli kia ka talahau e tau mena nei ke he falu kua nakai iloa he magafaoa po ke tau kapitiga hau? Po kua lata kia e tau mena nei ke tuku he lau Web ma e ha tagata ke totou? Maeke kia e tau fekau fakatagata nei ke lolomi ti fakafano pulenoa ke he tau tagata kua iloa po ke nakai iloa e koe? Tuga anei, ka moua e koe e fekau mai he falu ne hoko noa atu ki a koe, kua fakaalofa kia ke fakaholo age ke he falu foki?

²⁸ Ka e kua ka talahau e koe e iloaaga nakai hako? Nakai kia ko e talahau noa tuai e koe e kupu nakai moli? (Fakatai 12:19; 21:28; 30:8; Kolo. 3:9) Moli, ke “o fakalaulau a [t]autolu; nakai tuga ne tau tagata goagoa ka kia tuga e tau tagata iloilo” ke omoi a tautolu ke manamanatu ke he mena nei. (Efe 5:15) Ko e fiafia ha ia ha tautolu ha kua puke e Yearbook, The Watchtower, mo e Awake! ke he tau mena kua fakafita ki ai ke fakamalolo aki a tautolu mo e fakalagalaga aki a tautolu ke tumau e o he “puhala”!​—Isa 30:20, 21.

²⁹ Ha ha i ai foki e hagahaga kelea. Ne talahau he aposetolo ko Paulo hagaao ke he falu: “Ka e mahani foki a lautolu ke he teva, kua neva fano ke he taha fale mo e taha fale; ti nakai kuenaia foki he teva a lautolu, ka e fa fakatutala a lautolu, to hanihani, to vagavagahau ke he tau mena nakai lata.” (1 Timo. 5:13) Ne totoko e mena nei ke he fakaaoga e magaaho mo e laliaga he fakahoko atu e tau vala tala fakalolelole ke he tau matakainaga ha tautolu.

³⁰ Manamanatu la foki ke he lahi he magaaho kua fakaaoga ke lagotatai mo e lahi mahaki he E-Mail. Fulufuluola ai, ko e tohi Data Smog ne pehe: “He lahi mahaki e fakaaoga he tau magaaho he onoono ki ai, kua mafiti e e-mail ke hiki mai he tau tohi fakalagalaga fiafia ke he fakamole magaaho, he loga e tau fekau ke totou mo e tali he tau aho takitaha mai he tau tagata gahua, tau kapitiga, magafaoa, . . . mo e tau tagata gahua fakatata koloa.” Fakaholo atu ke talahau: “Tokologa e tau tagata matakakana lahi ke he tau mena eleketono ne kua moua e aga kelea lahi he talahau atu e tau vala fakafiafia kelea kua moua e lautolu​—tau vaiga, tau talahauaga fakamotu tuai, tau tohi matutaki, mo e falu foki​—ke he tau tagata oti kua ha ha he tohi kaina fakaeleketono ha lautolu.”

³¹ Kua moli e mena nei ke he E-mail ne gahuahua ai he vahaloto he tau matakainaga tokologa​—ko e tau mena tuga e tau vaiga po ke tau tala fakafulufuluola hagaao ke he fekafekauaga; tau tala kuku fakataitai ne talahau ke fakave ke he tau taofiaga ha tautolu; tau fakatataaga mai he tau lauga kehekehe ne logona he tau toloaga, tau fonoaga, po ke he Fale he Kautu; tau iloaaga he fekafekauga he fonua; mo e falu atu foki—tau mena kua tuga e nakai fai kelea. Tokologa ne fakafano tumau atu e E-mail mo e nakai fakakiakia e punaaga, ne kua halahu ai ke iloa ko hai ne kamata, ati fakatupu ai taha ke manamanatu kaeke kua moli e vala tala.​—Fakatai 22:20, 21.

³² Ko e tau fekau fa vaiga pihia ne nakai ko e tau kupu tonu ne tokaloto e Paulo he tohi a ia ki a Timoteo, pehe: “Kia eke e koe mo fakafifitakiaga hau e tau kupu tonu, ne fanogonogo ai a koe kia au mo e tua mo e fakaalofa ha ia Keriso Iesu.” (2 Timo. 1:13) Kua ha ha he “vagahau mitaki” e “fakafifitakiaga he tau kupu moli” he Tohi Tapu ne fakave fakamatapatu ke he mataulu tala he Tohi Tapu ke fakatokoluga e pule katoatoa ha Iehova he puhala he Kautu. (Sefa. 3:9) Kua lata ia tautolu ke lali katoatoa ke foaki e tau magaaho mo e malolo ha tautolu kua moua ke lalago aki e fakatokolugaaga nei he pule katoatoa ha Iehova.

³³ Ha ko tautolu kua nonofo he lotouho he fakahikuaga he fakatokatokaaga nei, nakai fai magaaho ke fakatalofe ai a tautolu. Kua hataki mai he Tohi Tapu ki a tautolu: “Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia.” (1 Pete. 5:8) Kua holo atu ke talahau: “Kia tapulu a mutolu ke he tau tapulu tau katoa he Atua, kia maeke ia mutolu ke totoko atu ke he tau lagatau he tiapolo.”​—Efe 6:11.

³⁴ Ka fakaaoga fakahehe, kua eke e Internet mo pule atu a Satani ki a lautolu kua fakavaia he hana pule. Pete kua fakakaupa e fakaaogaaga, ha ha i ai e hagahagakelea ka nakai mataala. Kua lata pauaki e tau mamatua ke manamanatu hagaao ke he fakaaogaaga he tau fanau ha lautolu ke he Internet.

³⁵ He tokaloto ai e onoonoaga lagotatai ke he Internet ko e puipuiaga ia. Kua fakaaue a tautolu ke he fakamanatu magaaho tonu ha Paulo: “Ko lautolu kua toto e tau mena he lalolagi nai tuga he nakai toto fakalahi ki ai; ha ko e mena mole atu e mahani he lalolagi nai.” (1 Kori. 7:29-31) He moua e tau mena nei he loto ka lagomatai a tautolu ke tumau a tautolu mo e tau magafaoa ha tautolu mai he tauheleaga ne foaki mai he lalolagi, putoia foki e tau mena kua moua he Internet.

³⁶ Kua lata ia tautolu ke nonofo fakatata ke he tau matakainaga he fakapotopotoaga mo e fakaaoga fakapulotu e tau magaaho ne toe, he foaki fakalahi e tautolu a tautolu ma e fakalaulahiaga he tau mena he Kautu. He tata mai e fakaotiaga he fakatokatokaaga nei, “aua neke tuai mahani a [ta]utolu tuga e falu a motu kehe kua mahani a lautolu ke he goagoa he tau loto ha lautolu,” ka kia eke a tautolu ke “iloa . . . e finagalo he Iki.”​—Efe 4:17; 5:17.