Kalo Kehe he Tutuli e ‘Tau Mena Noa’
1 Taha e puhala mahuiga ke matutaki he vaha nai ko e E-mail. Pete kua liga felauaki mitaki ke feutaaki e tau iloaaga mo e tau manatu fakatagata ke he vahaloto he magafaoa mo e tau kapitiga he fakaaoga e koloa nai, ko e heigoa e ‘tau mena noa’ ka liga putoia ke he fakaaoga nakai fai fakakaupaaga he E-mail?—Fakatai 12:11.
2 Tau Hatakiaga Hagaao ke he E-Mail: Ko e falu kua talahau ke logona hifo e matutakiaga tata mo e fakatokatokaaga ha Iehova he magaaho ka moua e lautolu e tau vala tala ne piko a lautolu kua fou mai he E-mail. Liga putoia ai e tau iloaaga, tau tala tutupu he Peteli, tau hokotaki ke he tau matematekelea tutupu pauaki po ke favaleaga, mo e pihia ke he tau vala tala fakaeneene kua fakamatala he Tau Aoga Fekafekau he Kautu. Ko e falu kua alaala lahi ke fakafano e tau fekau pehenai, he amanaki ko ia ne tala age mua e vala tala ia ke he ha lautolu a tau kapitiga.
3 Ke he tau magaaho, ko e tau vala tala mo e tau iloaaga kua kehe mamao po kua fakalahilahi. Po ke liga ha ko e tau laliaga ke fakafuluola, kua talahau he falu e tau manatu fakavai. Ko lautolu kua fakatepetepe ke fakakite e tau fekau pehenai kua fa nakai moua katoatoa e tau tala moli. (Fakatai 29:20) Ke he falu tutuaga, pete ni ko e tala kua uka ke moli, kua feutaaki ai he fia iloa tala. Ko e tau hokotaki nakai hako po ke fakavaia pihia kua lafi ke he “tau tala tuai,” ne nakai fakatolomaki e tau mahani Atua moli.—1 Timo. 4:6, 7.
4 Kaeke fakafano e koe e tala ti hoko ki mui ko e tala hepe, kua fai vala foki ka lago ki a koe ha ko e momoko po ke malokiloki kua fakatupu he mena nai. He magaaho ne moua e Tavita e hokotaki fakalahilahi kua mamate oti hana tau fanau tane, ne “hehe ai e ia hana tau tapulu” he ita lahi. Pete ia, ko e tala moli, tokotaha ni he tau tama tane hana ne mate. Kua fakatupetupe tuai e mena ia, ka e kua lafi ki luga e fakatupetupe ha Tavita ha ko e tala fakalahilahi nei. (2 Samu. 13:30-33) Moli kua nakai manako a tautolu ke taute ha mena ke fakahehe po ke fakalolelole aki ha matakainaga ha tautolu.
5 Halavaka ne Kotofa he Atua: Kia tokaloto nukua kotofa he Matua ha tautolu he lagi e halavaka he matutakiaga, “e fekafekau fakamoli mo e loto matala.” Ko e “fekafekau” ia kua kotofa ke fifili ko e heigoa e tau vala tala ka foaki ke he magafaoa he tua, pihia foki “ke he tau magaaho kua lata” ke fakatoka mai ai. Ko e tau mena kai fakaagaga nai kua puhala mai ni he fakatokatokaaga fakateokarasi. Kua lata a tautolu ke onoono tumau ke he halavaka ne kotofa he Atua ma e tau vala tala kua moli, nakai ke he matakau fakaaoga he Internet.—Mata. 24:45.
6 Tau Fahi Web he Internet: Na fai fahi Web pauaki he Internet a tautolu: www.watchtower.org. Lata ni he fahi nai ke tuku atu e tau vala tala ke he tau tagata. Ti kua nakai lata he ha tagata tokotaha, komiti, po ke fakapotopotoaga ke talaga e lau Web hagaao ke he Tau Fakamoli a Iehova. Ko e falu kua tuku e tau mataulu tala he tau tohi ha tautolu fakalataha mo e tau kupu tohi oti mo e tau tohi lagomatai katoatoa mo e hokotia foki ke foaki e tau fakatokaaga lauga he fonoaga ko e tau mena fakaalofa. Pete kua fai po ke nakai fai muka kua putoia ai, ko e tauteaga ia ke liu talaga mo e tufatufa e tau tohi he Tau Fakamoli a Iehova ke he tau lagaki eleketoniki ko e holia a ia he tau matafakatufono copyright. Liga kitia he falu e mena nai ko e taute he fekau ma e tau matakainaga, kua nakai talia ki ai ti lata ke fakamamutu.
7 He fakagahua e fakafiliaga mitaki mo e mahani fakalatalata he magaaho ka fakaaoga ai e puhala matutaki eleketoniki nai to fakapuke moli e tau loto ha tautolu aki e “tau koloa oti ni kua uho mo e fulufuluola.”—Fakatai 24:4.